2 Tawarika 34
34
Mokole Yosia ka pepokowo'ohu anu wineweuno
34:1-7
(2Mok. 22:1-2; 23:4-20)
1 #
Yer. 3:6
Tinuwuno i Yosia oalu nta'u tempono igagi mokole ka tolu pulu ka asa nta'u tehineno ipoparenta i Yerusale. 2Onae moweweu anu mentee a pongkita-Do i Ue, ka itondao sala ntumuwuno i Daudi, uempu'uno. Onae nahi pansia i koana ke i manggali. 3A nta'u ko'oalu poparentaano, tempono da tedoa mongura, onae mompu'u umungke Ira Ue Alano i Daudi, ama mpu'uno, ka ia ta'u kohopulu ka orua onae mompu'u mokomorinao Yehuda ka Yerusale inso a luwuno po'ianga pesombaa, karuno lahumoa, tinaha pina'o ka luwuno tinaha tinawa. 4#2Mok. 21:3; 2Taw. 33:3Luwuno meda pontunua pesombado Baala ipobangkuo i arono, umarino atuu iperawo-rawo ira pontunua dupa anu kongko i wawono. Ipuro-puroo ka ipokoropuo luwuno karuno lahumoa, luwuno tinaha pina'o ka tinaha tinawa, ka i'amba merawoakono a wawo ngkaburudo mia anu mpopesombaako pesomba a luwuno lahumoa atuu. 5#1Mok. 13:2Luwuno wukudo sando mpesomba lahumoa itunuo i wawono meda pontunua pesombado. Kanandiomo ipokomorinao Yehuda ka Yerusale. 6Ka luwuno kotano i Manase, i Eparai ka i Simeo hawe a luwuno kotano i Napatali, a petengi-tengino anu terawo, 7ipobangkuo luwuno meda pontunua pesomba ka karuno lahumoa, ipuroo ka rawo-rawoo luwuno tinaha pina'o saru pontunua dupa a luwuno wita i Isaraeli. Umarino atuu onae mekule i Yerusale.
Wunta Taura hinawe ka pedandia pinokowo'ohu
34:8-33
(2Mok. 22:3–23:3)
8Ia ta'u kohopulu ka oalu poparentaano, mansano mokomorinao wita ka Raha-Do i Ue, itenao i Sapani anano i Asalia ka i Ma'asea, anu pabawaio kota saru i Yoahi anano i Yoasi, puu mpopekaria arataado mokole, ka dompokomoikoo Raha-Do i Ue, Ue Alano. 9Me'aiwa ira ndi sando mpesomba langkai Hilikia ka mpeweengakono ndi onae doi anu winawaomo a Raha-Do Ue Ala ka anu domepumpuomo to Lewi, onaemo luwuno puu mpodagai pewowa, inso a ngkaedo to Manase ka to Eparai, inso a luwuno mia anu da tepo'ia i Isaraeli, ka inso a nto Yehuda ka to Benami, ka inso a mpalili i Yerusale. 10Dompeweengakono doi atuu a ngkaedo puu mpo'angga anu pinokogagi puu mpodagai a Raha-Do i Ue. Ondae anu mpo'angga i Raha-Do i Ue andio meluarakono po'owahi weweuno mokontekosio ka mokomoikoo raha atuu. 11Domeweeako ira luwuno puu mpo'angga keu ka puu mpowangu ka dompo'oli watu pina'o saru keu weweua luwuno pontumbo ka luwuno sobo anu ta pinasa a luwuno raha langkai, anu dompo'ineeomo mokole i Yehuda ka itebangku. 12Luwuno mia atuu mpetenunu me'anggao. Luwuno mia anu pinotoro gagi mandorodo, onaemo i Yahati ka i Obaja, to Lewi inso a inuleno i Merari, sekono i Sakaria ka i Mesulami inso a inuleno i Kehati gagi petewawado. Luwuno to Lewi anu pande mpemaeakono parewa mpenani, 13mandoroi ira mia mpo'angga ka petewawado luwuno puu mpo'angga hapamo koa. Inso a nto Lewi atuu hinao anu gagi puu mpoburi, puu mpo'atora ke puu mpodagai pewowa langkai.
14Tempono kontongaado mpoluarako doi anu winawaomo i Raha-Do i Ue, sando mpesomba Hilikia humaweo wunta Taura-Do i Ue, anu pineweengako molalo i Musa. 15Mepauomo i Hilikia ndi Sapani, puu mpoburi a poparentaa, ”Wunta Taura andio kuhaweomo i Raha-Do i Ue!” Ka i'amba wunta atuu ipeweengakono i Hilikia ndi Sapani, 16ka i Sapani wawao wunta atuu ndi ondae mokole. Ipauo mbo'u ndi ondae mokole, ”Luwuakoano anu itenaako ira atamiu, dome'anggao. 17Dome'alaomo luwu doi anu kongko i Raha-Do i Ue ka mpeweengakono a ngkaedo luwuno puu mpodagai ka mia mpo'angga.” 18I Sapani, puu mpoburi a poparentaa, pauako ira mbo'u mokole, ”Sando mpesomba Hilikia moweeakunemo wunta,” Ka i'amba i Sapani basao i arodo mokole. 19Rumongeo pauno Taura atuu, mokole berio sangkano hangano masusa aroano. 20Ka i'amba mokole parentao i Hilikia, i Ahikami anano i Sapani, i Abidoni anano i Mika, i Sapani puu mpoburi atuu ka i Asaia mbo'u, pegawaido mokole, ipotae, 21”Imelakomo, mpo'emaakune pontiso-Do i Ue, tiado to Isaraeli anu da tebinta i Isaraeli ka i Yehuda, mongkona pauno wunta anu hinawe andio, hangano mongkokongiriomo tensilano tekuda-Do i Ue ndi ontae. Hangano, ondae uempu'uto nahi dompekariao pau-Do i Ue saru meweweuo mengkena kana anu teburi a wunta andio!” 22Umarino atuu lumakoomo i Hilikia meronga luwuno mia anu tinenado mokole ndi nabi beine Huluda, kombiano i Salumi anano i Tokihati anano i Hasera anu mo'orusu sangka. Nabi beine atuu mo'ia i Yerusale, a Mpe'iniaa Wo'ohu. Dompepau ndi onae kana anu domepinarentaako. 23Nabi beine atuu sumangki ira, ”Kanandiomo pau-Do i Ue, Ue Alado to Isaraeli! Pauakonomo mia anu tumena komiu aiwa ndi ongkue! 24Kanandiomo pau-Do i Ue: Menteeano Aku mompotii masolaa a mpo'ianga andio ka palilino, onaemo luwuno totonaa anu teburi a laro wunta anu binasaomo i arono mokole i Yehuda, 25hangano domebinta Akumo ka mpotunu pesomba a mpinesombai susua. Hangano luwuno inanggano kaedo mpokontesingkao tekuda-Ku. Tensilano tekuda-Ku ta pinotii a mpo'ianga andio ka nahi pinokompepate. 26Sine ndi mokole i Yehuda anu tumena komiumo ka impo'ema pontiso-Do i Ue, asalakono imempauakono kanandio: Kanandiomo pau-Do i Ue, Ue Alado to Isaraeli: Mongkona pau anu urongeomo atuu, 27hangano omue me'o'ole ka me'urumako i aro-Do Ue Ala i tempono urongeo pau-Do te'aro a mpo'ianga andio ka palilino, ka hangano me'urumakokomo i aro-Ku, berio sangkamu ka mengese i aro-Ku, onaemo ka Kurongeo, kanandiomo pau-Do i Ue, 28menteeano Aku pumpuko saru uempu'umu, ka kokinaburu moiko. Matamu nahi ta kumitao luwuno masolaa anu Aku motiio a mpo'ianga andio ka a mpalilino.” Ka do'amba mpohaweo sangki atuu ndi ondae mokole.
29Umarino atuu mokole montena mia pumpu ira luwuno mia memota'u i Yehuda ka i Yerusale. 30Ondae mokole lumako a raha-Do i Ue meronga luwuno to Yehuda ka palili i Yerusale, luwuno sando mpesomba, to Lewi, luwuno palili, moiko anu langkai maupo anu kodei. I arodo ibasaako ira luwuno pau inso a Wunta Pedandia anu hinawe a Raha-Do i Ue atuu. 31Ka i'amba mokole mentade a mpo'iangano ka moweweu pedandia i aro-Do i Ue ta tumonda Ira i Ue, mekariao luwuno parenta-Do, atora-Do ka pompakosi-Do a tompaano aroa ka tompaano sumanga saru weweuo pauno pedandia anu teburi a wunta atuu. 32Itena ira luwu mia anu kongko i Yerusale ka Benami mpetonda a laro pedandia atuu. Onaemo palilino Yerusale ka dompoweweu menunu saru pedandia-Do Ue Alano uempu'udo. 33I Yosia tumadio luwuno mokoburua inso a luwuno witado to Isaraeli ka tumena ira luwu mia anu kongko i Isaraeli mpesomba ndi Ondae i Ue, Ue Alado. Asa ntinuwuno i Yosia ondae mpetenunu tumonda Ira i Ue, Ue Alano uempu'udo.
Currently Selected:
2 Tawarika 34: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
