2 Tawarika 31
31
1Mansano luwuno andio tampulaomo, luwuno to Isaraeli anu mehawe, melako a luwuno kota i Yehuda. Domempuro-puroo luwuno tugu lahumoa, domerongkao luwuno karuno pelahumoaa, ka pobangkuo luwuno po'ianga pesombaa ka meda pontunua pesomba i luwuno Yehuda ka Benami, saru i Eparai ka Manase, ranta tampula luwu. Ka i'amba luwuno to Isaraeli mpekule i luwuno kotano, singge mia a ntia pusakano.
I Hisikia mo'atora pompowee tiado luwuno sando mpesomba ka to Lewi
31:2-21
2Hisikia pakosio tumia ira sando mpesomba ka to Lewi, nte'o'asa bawaa, singge montonda anggaa a mpotorono gagi sando mpesomba ke to Lewi, anu mompesombaako pesomba tinunu ka pesomba tekaduduia, anu mpowuatako po'unde-unde ka mpenani, saru pompekakaako a luwuno pewowa langkai a mpekemaa-Do i Ue. 3#Pod. 28:1–29:39Pompoweeno mokole inso a arataano ninaa tiano pesomba tinunu, onaemo: pesomba tinunu mo'oru ka ngkiniwia, pesomba tinunu a oleo Saba ka wula wo'ohu ka a luwuno oleo langkai, kana anu teburi a laro Taura-Do i Ue. 4#Pod. 18:12-13; 21Iparenta ira palilino, palili i Yerusale, ka dompeweengakono pompowee anu gagi tiado sando mpesomba ka to Lewi, ka domempolio mpeweengakono rosodo tiano Taura-Do i Ue. 5Nahi tehine umarino parenta andio tepalele, to Isaraeli mpowawa hadio ntu'u hasili amba-ambano inso a gandu, anggoro, lana, siu hoani ka luwuno hasilino wita. Ondae mpowawa mbo'u hadio pesomba tia hopulu inso a luwuakoano. 6To Isaraeli ka to Yehuda anu mpo'ia a luwuno kota i Yehuda mpowawa ira mbo'u pesomba tia hopulu, onaemo sapi ka asa bawaa bembe bimba, ka pesomba tia hopulu, onaemo pesomba mempori anu pinesusuaomo tia-Do Ue Alado. Luwuno domenaao mpehowu-howu. 7Dompompu'u meweweuo luwuno hinowu langkai ia wula ko'otolu, ka umari ia wula ko'opitu. 8I Hisikia ka luwuno petewawa aiwa kumitao luwuno hinowu atuu, ka do'amba umunde-unde Ira i Ue ka melangkai ira to Isaraeli, bawaa-Do i Ue. 9I Hisikia mesikeno a luwuno sando mpesomba ka to lewi mongkona hinowu atuu, 10ka i Asaria, petewawado sando mpesomba, inuleno i Sadoki sumangkio, kanandio, ”Mompu'u iwinawa pesomba pinesusua a raha-Do i Ue, mpongkaa kami ranta ka kimemowohi, sine toreano da hadio. Hangano Doronsoomo i Ue bawaa-Do, ranta anu torea da tedoa hadio ntu'u.”
11Ka i'amba i Hisikia meparenta ka ipinatinda luwuno bolongko a raha-Do i Ue, onaemo ka dompatindao. 12Mpetenunu ira mewawao i ra'ai pesomba pinesusua, tia hopulu, ka luwuno parewa mempori atuu. I Konania, to Lewi, dumagaio luwuno, ka i Simei pepaekompono, onaemo mia ko'orua. 13I Yehieli, i Asasia, i Nahati, i Asaeli, i Yerimoti, i Yosabadi, i Elieli, i Yisimakia, i Mahati ka i Benania, ondaemo puu mpodagai pinarentano i Kunaia ka i Simei, pepaekompono, menunu saru pontisono mokole Hisikia ka i Asaria, petewawa a raha-Do Ue Ala. 14I Kore anano i Yimina, to Lewi, puu mpodagai pewowa langkai i sabaano oleo, dumagaio luwuno pompowee a moleono aroa tia-Do Ue Ala, saru montia-tia pesomba pinesusua anu wineeako Ondae i Ue ka luwuno pesomba tedoa mempori. 15A luwuno kotado sando mpesomba, hinao anu metenunu mokowalio, onaemo i Edeni, i Miniami, i Yesua, i Semaya, i Amaria ka i Sekania anu tumia-tiao a luwuno pepaekompodo montonda pebawaado, moiko a mia anu sompoomo tinuwuno maupo a nana'ote, 16sompo mia susua anu mewinso a raha-Do i Ue, ia luwuno oleo anu pinakosi, montonda anggaa a mpotorono asa mia ka asa mia, ka montonda pebawaano, luwuno tama anu teburi tinuwuno otolu nta'u kontahane. 17Luwuno sando mpesomba atuu binuri a laro mpoburia montonda pepe'etuado, sekono luwuno to Lewi anu tinuwuno rua pulu nta'u kontahane binuri montonda anggaa ka pebawaado. 18Ondae nteburi saru luwuno ihino somborido, kombiado saru anado tama ka beine, luwuno tepumpuado, hangano mpetenunu ira mpokomemporio koroido tiano pesomba mempori. 19Luwuno sando mpesomba inuleno i Haruni, anu mpo'ia a ntonga mpada molue petengi-tengino luwuno kotado, i sompo kota hinao mia anu binuri neeno, ka ipontia a sompo tama inso nsomborido sando mpesomba ka sompo to Lewi anu teburi.
20Kanandiomo anu wineweuno i Hisikia a luwuno Yehuda. Onae moweweu hapa anu moiko, moleo, ka mentee i aro-Do i Ue, Ue Alano. 21A sompo anggaa anu pinu'uno tiano pompekakaako i Raha-Do Ue Ala, ka tiano weweuano Taura ka parenta-Do Ue Ala, i'ungkeo pontiso-Do Ue Alano. Luwuno iweweuo tompaano aroano, onaemo ka ipehasili.
Currently Selected:
2 Tawarika 31: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
