2 Tawarika 29
29
Mokole Hisikia
29:1-2
(2Mok. 18:1-3)
1Tinuwuno i Hisikia rua pulu ka olima nta'u tempono igagi mokole ka rua pulu ka osio nta'u tehineno ipoparenta i Yerusale. Neeno ineno, onaemo i Abia, anano i Sakaria. 2Onae moweweu hapa anu mentee a pongkita-Do i Ue, mengkena kana anu wineweuno i Daudi, ama mpu'uno.
I Hisikia wali mokomemporio Raha-Do i Ue
29:3-36
3A nta'u amba-ambano poparentaano, a laro wula amba-ambano, i'ungkahio luwuno tondono Raha-Do i Ue ka mokomoikoo. 4Itena ira sando mpesomba ka to Lewi me'aiwa, ka i'amba pumpu ira a kintalano i sabaano oleo. 5Ipotaeako ira, ”Rongeomo, oo to Lewi! Kanandio-andio impokomemporiomo koroimiu ka Raha-Do i Ue, Ue Alano uempu'umiu! Tadiomo luwuno anu mokoburu inso a mpo'ianga mempori. 6Hangano ondae uempu'uto nahi dompetenunu. Mpoweweu ira anu mosa'o a pongkita-Do i Ue, Ue Alato, ka binta Ira. Domewolilio rupado inso a mpo'ianga-Do i Ue ka mpebungkui Ira. 7Tendeano dometondoo luwuno pewowano bolongko a Raha-Do i Ue ka mpepateo luwuno hulu. Nahi dompotunu pesomba mana mo'ahi ka mpopesombaako pesomba tinunu ndi Ondae Ue Alado to Isaraeli a mpo'ianga mempori, 8ranta tekuda-Do i Ue umaluo Yehuda ka Yerusale. Ondae Doweweuo gagi aasa anu mongkokongiri ka mongkokodoito saru pasinggiri kana anu imengkitaakono matamiu isa'a. 9Hanganomo atuu ondae uempu'uto memateako ponai, ka luwuno anato, tama ka beine saru luwuno kombiato gagi mentinawa. 10Kanandio-andio montoo aku mowutu pedandia saru Ondae i Ue, Ue Alano i Isaraeli, ka tekuda-Do anu tensila atuu ka ibinta kita. 11Luwuno anaku kanandio-andio si memangulele, hangano dobiniki komiumo i Ue mentade i aro-Do mekakaako Ira, ka impoweweu pesombaa ka montunu pesomba tia-Do.”
12Umarino atuu melako iramo to Lewi, onaemo inso a inuleno i Kehati: i Mahati anano i Amasai, ka i Yoeli anano i Asaria; inso a inuleno i Merari: i Kisia anano i Abadi ka i Asaria anano i Yehaleleeli; inso a to Geresoni: i Yoahi anano i Sima ka i Edeni anano i Yoahi; 13inso a inuleno i Elisapani: i Simiri ka i Yeieli; inso a inuleno i Asapi: i Sakaria ka i Matania; 14inso a inuleno i Hemani: Yehieli ka i Simei, ka inso a inuleno i Yedutuni: i Semaya ka i Usieli. 15Ondae pumpu ira pepaekompodo ka mokomemporio koroino. Ka do'amba me'aiwa montonda parentado mokole, menunu saru pau-Do i Ue, ka dompokomemporio raha-Do i Ue. 16Umarino atuu mpewinso iramo sando mpesomba a laro raha-Do i Ue ira mpokomemporio. Luwuno anu mokoburu, anu hinawe a laro Raha-Do i Ue, domewawao a kintalano Raha-Do i Ue. Luwuno to Lewi tumarimao ka iwinawa i bungkuno, i Lembono Kidironi. 17Dompompu'u mpokomemporio Raha atuu ia tanggala asa wula anu amba-ambano. Ia oleo ko'oalu wula atuu mehawe ira a bolongko i arono Raha-Do i Ue ka mpokomemporio luwuno Raha-Do i Ue i larono oalu oleo. Dome'umari ia oleo kohopulu ka onoo wula amba-ambano.
18Ka i'amba mpewinso iramo mpe'aro ndi mokole Hisikia ka dompotae, ”Umari kamimo mpokomemporio luwuno Raha-Do i Ue, ka meda pontunua pesomba tinunu saru luwuno parewano ka meda roti pesomba saru luwuno parewano. 19Luwuno parewa anu tinadino mokole Ahasi, tempono nahi petenunu a tempo poparentaano, kimempatindaomo ka mpokomemporio. Kanandio-andio luwuno atuu kongko i arono meda pontunua pesomba ndi Ondae i Ue!”
20Da mo'oru ntu'u mokole Hisikia pumpu ira luwuno petewawa kota, ka domelako a raha-Do i Ue. 21Domewawao opitu sapi lakino, opitu bimba lakino, opitu ana bimba ka opitu bembe lakino gagi pesomba po'onini hala a nsomborino mokole, po'ianga mempori ka Yehuda. Iparenta ira sando mpesomba, inuleno i Haruni ka dompesombaakono a wawo meda pontunua pesomba ndi Ondae i Ue. 22Luwuno sapi atuu sinumbele ka i'amba sando mpesomba tumarimao reano ka mesiwuiakono a meda pontunua pesomba. Ka do'amba mensumbeleo luwu bimba lakino ka mesiwuiakono reano a meda pontunua pesomba. Umarino atuu domensumbele ira ana bimba ka mesiwuiakono reano a meda pontunua pesomba. 23Ka do'amba mewawao luwuno bembe lakino pesomba po'onini hala i arodo mokole ka bawaa. Domenaao kaedo a wawo luwuno bembe atuu. 24Luwuno sando mpesomba sumumbeleo ka mesombaakono reano a wawo meda pontunua pesomba gagi pesomba po'onini hala ka iwineweu pesintuwua tiado luwuno to Isaraeli. Hangano ondae mokole meparenta iramo ka ipinesombaako pesomba tinunu ka pesomba po'onini hala tiado luwuno to Isaraeli. 25I Hisikia numaa ira to Lewi i raha-Do i Ue, singge mia saru simbali, gambusu, ka katapi menunu saru parentano i Daudi ka i Gadi, puu mpongkitado mokole, ka nabi Nata, hangano parenta atuu inso ndi Ondae i Ue molalo nabi-Do. 26Ka i'amba luwuno to Lewi mpepatinda saru parewa mpenanino i Daudi, kanatuu koa mbo'u luwuno sando mpesomba saru napiri. 27I Hisikia meparenta ka ipinesombaako pesomba tinunu a wawo meda pontunua pesomba. I tempono pesomba tinunu mompu'u pinesombaako, penani tia-Do i Ue pinu'u mbo'u meronga unino napiri ka tinondaako parewa mpenanino i Daudi, mokole i Isaraeli. 28Luwuno bawaa mpenggolontu mpesomba kontongaano penani pinenaniako ka napiri pino'uni. Luwuno atuu motilalo ranta pesomba tinunu umari pinesombaako. 29Mansano pesomba tinunu umari pinesombaako, mokole saru luwuno mia hawe meronga saru onae mpenggolontu ka mpetuundu mpesomba. 30Ka i'amba mokole Hisikia ka luwuno petewawa parenta ira to Lewi mpenaniako luwuno pauno i Daudi ka i Asapi, puu mpokita atuu, umunde-unde Ira i Ue. Ondae memawongko mpenaniako po'unde-unde, ka do'amba mpenggolontu ka mpesomba.
31Ka i'amba i Hisikia mepau, ”Kanandio-andio impesusuaomo koroimiu tia-Do i Ue. Ime'umpedamo ka wawaomo luwuno pesomba sinumbele ka pesomba po'unde a raha-Do i Ue!” Ka i'amba bawaa mewawao luwuno pesomba sinumbele ka luwuno pesomba po'unde-unde; sompo mia anu moleo aroano wawao luwuno pesomba tinunu. 32Porokono pesomba tinunu anu winawado bawaa, onaemo sapi pitu pulu, bimba lakino asa etu ka anano bimba rua etu. Luwuno gagi pesomba tinunu tia-Do i Ue. 33Pesomba mempori, onaemo sapi nomo etu ka bembe bimba tolu nsowu. 34Sine sando mpesomba tedei lahi, ranta nahi dompolio mengkulio luwu pesomba tinunu. Onaemo pu'uno luwuno pepaekompodo, to Lewi mpokowali ira ranta ka i'umari anggaa atuu ka ranta luwuno sando mpesomba mokomemporio koroino. Hangano luwuno to Lewi atuu mpompesu'ui irapo mpokomemporio koroido sekonopo luwuno sando mpesomba. 35Umarino atuu hadio ntu'u pesomba tinunu, saru luwuno taba pesomba tekaduduia ka pesomba tinawa a luwuno pesomba tinunu atuu. Kanandiomo pesombaa i raha-Do i Ue wali wineweu. 36I Hisikia ka luwuno palili mawongko a hapa anu Dopakosiomo Ue Ala tiano tongku atuu, hangano luwuno atuu mansa gagi.
Currently Selected:
2 Tawarika 29: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
