2 Tawarika 26
26
Mokole Usia
26:1-23
(2Mok. 15:1-7)
1Luwuno tongku Yehuda umalao i Usia, anu tinuwuno hopulu ka onoo nta'u ka ipinotoro gagi mokole umeuo amano, i Amasia. 2Onae mokorosoo kota Eloti ka mokuleo ndi Yehuda, umarino mokole mohawe penaa-naaano meronga uempu'uno. 3Tinuwuno i Usia hopulu ka onoo nta'u tempono igagi mokole ka lima pulu ka orua nta'u tehineno ipoparenta i Yerusale. Neeno ineno, onaemo i Yekolia inso i Yerusale. 4Onae moweweu hapa anu mentee a pongkita-Do i Ue, mengkena kana anu wineweuno i Amasia, amano. 5Onae umungke Ira Ue Ala tempono i Sakaria da tuuwu anu paguruo ka idoitoako Ira Ue Ala. Tempono i'ungke Ira i Ue, Ondae Ue Ala weweuo mehasili.
6Onae lumako meteaako ira to Pelisiti ka rumongkao rere watu Gati, Yabine ka Asidodi, ka i'amba wanguo luwuno kota a mpetengi-tengino Asidodi ka ba'opia mpo'ianga a witado to Pelisiti. 7Ondae Ue Ala tumulungio umewai ira to Pelisiti, to Ara anu mpo'ia i Guri-Baala, ka to Me'unimi. 8To Amoni mpo'owahi peki'ue ndi Usia. Neeno telele hawe olai i Masiri, hangano rosono anu kolangka-langkaino. 9I Usia wangu ira menara i Yerusale i wawono Pewowa Langkai Siuno, i wawono Pewowa Langkai Lembono, ka i wawono Sompo Siuno, saru mokorosoo. 10Iwangu ira mbo'u menara i pada one ka mongkeke hadio sumuru, hangano hadio pinotuwuno, moiko a Lembono maupo a wita Mantandeano. Onae hinao puu mpelereno ka puu mpodagaino lere anggoro, a luwuno torukuno ka wita anu mewalo, hangano i'ineheno mepinopaho. 11Hinao mbo'u sorodaduno i Usia anu polio metea, anu lumako metea a laro luwuno tepo'asaa montonda hadiono anu binurino i Yeieli, puu mpoburi ka i Ma'aseya puu mpodagai anu pinarentano i Hanania, asa mia tadulakono mokole. 12Luwuno petewawado anu mpepe'etu, luwuno sorodadu anu moroso atuu, luwuno rua nsowu ka nomo etu mia. 13Ondae megagi petewawa a asa bawaa sorodadu hadiono tolu etu ka pitu nsowu ka lima etu mia anu moroso ntu'u a laro mpeteaa, ka dompokowalio mokole mo'aropi iwali. 14I Usia pakaleako ira sorodadu atuu kanta, kansai, songko petea, lemba labu, pana ka watu pokembi. 15I Yerusale iweweuo mbo'u luwuno parewa mpetea wineweuno asa mia mpande, anu mokompepanaako ana mpana ka watu langkai, anu ta ninaa i wawono luwuno menara ka luwuno sompo siuno. Neeno telele hawe a luwuno wita olai, hangano onae mohawe pontulungi kinohali-haliako ranta ka ikomoro-morosono.
16Mansano morosoomo, onae gagi mompelangka-langkai ranta ka ipoweweu hala anu dumontaio. Onae moweweu nahi petenunu ndi Ondae i Ue, Ue Alano, ka mewinsokio raha-Do i Ue ta montunu pesomba dupa a wawo meda pontunua pesomba dupa. 17Sine sando mpesomba Asaria tumondao inso i bungkuno meronga halu pulu sando mpesomba-Do i Ue, luwuno mia mosia; 18#Pel. 30:7-8; Pod. 3:10ondae mpentade i arono mokole Usia ka dompotae ndi onae, ”Hei, Usia, komba anggaamu montunu pesomba dupa ndi Ondae i Ue. Luwuno sando mpesomba inuleno i Haruni koa anu umari iramo mpinokomempori anu tiado mpotunu pesomba mana mo'ahi! Peluarakomo inso a mpo'ianga mempori andio, hangano melelukomo nahi petenunu! Nami ta hina mbo'u pontudu ndi omue inso ndi Ondae Ue Ala.” 19I Usia anu kontongaano mo'ini takea ta mompesombaako pesomba dupa, gagi tekuda. Kontongaano tekuda a nsando mpesomba, mansa me'umbaako haki ngkuli a ra'ino i arodo sando mpesomba i raha-Do i Ue, umpeda meda pontunua pesomba dupa. 20Tempono i Asaria, petewawado sando mpesomba, meronga luwuno sando mpesomba susua mpekokoongakono, ka tengkitaomo haki ngkuli a ra'ino. Mpopari-pari ira mensaario inso i ra'ai, ka onaeno mompari-pari meluarako, hangano Ondae i Ue moweeakonomo tula. 21Mokole Usia marasaiako haki ngkuli hawe a oleo mateano, ka gagi mia anu mahaki ngkuli, onae mo'ia a laro asa raha peliahakoa, hangano pinonsia inso a raha-Do i Ue. I Yotami ana ntamano, gagi petewawa a langkanaeno mokole ka molempao poparentaa a mpalili i wita atuu.
22Anu susuano inso a nteweweuno i Usia, inso a pompu'uano hawe pokotompaano, iburio i nabi Yesaya anano i Amosi. 23#Yes. 6:1; 7:1I Usia mate. Onae kinaburu i horino uempu'uno a lere umpeda pekaburuado mokole, hangano dompotae mia, onae mohawe haki ngkuli. Ka i'amba i Yotami, ana ntamano gagi mokole umeuo.
Currently Selected:
2 Tawarika 26: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
