2 Tawarika 24
24
Mokole Yoasi
24:1-27
(2Mok. 12:1-21)
1Tinuwuno i Yoasi opitu nta'u tempono igagi mokole, ka pato pulu nta'u tehineno ipoparenta i Yerusale. Neeno ineno onaemo i Sibia inso i Bereseba. 2I Yoasi moweweu hapa anu mentee a pongkita-Do i Ue asa ntinuwuno sando mpesomba Yoyada. 3I Yoyada mo'alaakono orua kombiano; inso ndi ondae mohawe ana ntama ka ana beine. 4Ka i'amba i Yoasi mosongka ta mokowo'ohuo raha-Do i Ue. 5Ipumpu ira luwuno sando mpesomba ka to Lewi ka ipotaeako ira, ”Imelakomo a luwuno kota i Yehuda ka pumpuomo doi inso a luwuno to Isaraeli pokomoikono raha-Do Ue Alamiu sompo ta'u. Pontuturakomo imeweweuo!” Sine to Lewi atuu nahi doronga meweweuo. 6#Pel. 30:11-16Ka i'amba mokole moboio sando mpesomba langkai Yoyada ka ipesikeno ndi onae, ”Tembio nahi utuntuo a nto Lewi ka dompowawa inso i Yehuda ka inso i Yerusale sima'uluku anu pinopotembino i Musa, tetenaa-Do Ue Ala atuu a bawaa Isaraeli, tiano mowangu Kema po'iangano songka-Do Ue Ala? 7Hangano luwuno anano i Atalia, beine mosa'o gaudo, umari rumongkao raha-Do Ue Ala, ka pakeo luwuno sangka memporino raha-Do i Ue pakea mesomba a Baala.”
8Umarino atuu mokole meparenta kai wineweu asa burua ka ininaa i arono pewowa langkaino raha-Do i Ue. 9Ka i'amba metena paleleo i Yehuda ka i Yerusale nine asalakono mia mpowawa tia-Do i Ue sima'ulu anu pinopotembino i Musa, tetenaa-Do Ue Ala atuu, a nto Isaraeli i pada one. 10Onaemo ka dompo'unde luwuno petewawa ka luwuno palili; ondae me'aiwa mpowawa sima'uludo ka mewinsoo a laro burua atuu ranta buke. 11Sompo iwinawa mewinso burua atuu ka domemparesao to Lewi a needo mokole, ka tewala domengkitao nine hadioomo doi i larono, ka aiwaomo puu mpoburido mokole ka anu pinokompabawa a usahano sando mpesomba langkai lumuarakono ihino burua atuu; ka do'amba mentandeo burua atuu, ka domenaao mbo'u a mpo'iangano. Kanandiomo domeweweuo sompo tempo, ka hadioomo doi anu pinumpu. 12Mokole ka i Yoyada meweengakono doi atuu ndi ondae anu memandoroio anggaa a raha-Do i Ue. Ondae andio tumambo ira luwuno puu mpompa'o ka puu mpo'angga keu ka dompokowo'ohuo raha-Do i Ue; ka luwuno puu mpo'angga labu ka mala ka dompokomoikoo raha-Do i Ue. 13Umarino atuu mpopu'u iramo puu mpo'angga atuu mpo'angga; anggaano pompokomoiko magasi dome'anggao. Ondae wali mewanguo raha-Do Ue Ala montonda weweuno amba-ambano ka mokorosoo. 14Mansano umari, domewawao doi anu torea ndi mokole ka ndi Yoyada. Doi atuu pinake moweweu parewano raha-Do i Ue; parewa a mpoweweua pesomba ka a mpesomba tinunu, ka luwuno sangkiri, saru parewa wulaa ka salaka. Tempono ituwu i Yoyada pesomba tinunu wela pinesombaako a laro raha-Do i Ue.
15I Yoyada mota'uomo ka tende ntumuwu, ka i'amba mate. Tinuwuno asa etu ka tolu pulu nta'u tempono imate. 16Onae kinaburu i kota Daudi i horido luwuno mokole, hangano luwuakoano anu moiko wineweuno i Isaraeli tia-Do Ue Ala ka raha-Do. 17Umarino mate i Yoyada, luwuno petewawado Yehuda aiwa mpesomba ndi mokole. Mompu'u i tu'ai mokole merorongeako ira. 18Domebintao raha-Do i Ue, Ue Alano uempu'udo, ka do'amba mpesomba a luwuno karuno lahumoa ka tinaha lahumoa. Hangano hala atuu Yehuda ka Yerusale i'aluo pontekudaako. 19Ondae i Ue tumena ira nabi ndi ondae, ka dompepokule ndi Ondae. Luwuno nabi atuu mentee ntu'u dompopoto'oriako ira, sine nahi domebehe mperorongeakono. 20#Mat. 23:35; Luk. 11:51Ka i'amba i Sakaria, anano sando mpesomba Yoyada, ipabawaio Penaa-Do Ue Ala. Onae mentade i arodo palili ka ipotaeako ira, ”Kanandiomo pau-Do Ue Ala: Tembio kai melimpaio luwuno parenta-Do i Ue, ranta nahi ime'ura? Hangano imebinta Ira i Ue, Ondae mbo'u binta komiu!” 21Sine, ntepo'asa ira umewaio, ka i'amba a mparentano mokole domewunoakono watu a kintalano raha-Do i Ue. 22Mokole Yoasi nahi pewowoloo petenunu anu itisoakono i Yoyada, amano i Sakaria a ngkoroino ka ipepateo anano i Yoyada atuu. Tamo haweako tempono mate, onae mebooli, ”Po'ineeomo Dokitao i Ue ka Dopombalo!”
23A mpe'euano ta'u, sorodadu Arami melako sumapoio i Yoasi ka mpewinso i Yehuda ka i Yerusale. Inso i olodo tongku atuu luwuno petewawa pingko pinepate ka luwuno pinomuru dome'oliwio ndi mokole i wita Damasi. 24Maupo dome'aiwa sorodadu Arami saru tedei sorodadu, sine Ondae i Ue meweengakono sorodadu tedoa hadio atuu a ngkaedo, hangano dobinta Iramo to Yehuda i Ue, Ue Alano uempu'udo. Kanandiomo domeweweuo pohuku ndi Yoasi. 25Tempono domelako mebintao kontongaano mobela ondalo, luwuno atano mpoweweu tepo'asa umewaio hangano reano anano sando mpesomba Yoyada atuu, ka do'amba mpepateo a wawo mpoturiano. Onae mate ka kinaburu i kota Daudi, sine komba a mpekaburuado luwuno mokole. 26Ondae anu mpoweweu tepo'asa umewaio, onaemo: i Sabadi, anano i Simeati beine to Amoni, ka i Yosabadi, anano i Simiriti beine to Moabi. 27Mongkona luwuno anano ka hadiono pinau anu nahi moiko ndi onae, saru mongkona pokomoikono raha-Do Ue Ala, luwuno atuu teburi a wunta teweweudo luwuno mokole. Ka i'amba i Amasia, anano, gagi mokole umeuo.
Currently Selected:
2 Tawarika 24: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
