2 Tawarika 21
21
1I Yosapa mohawe penaa-naaano saru uempu'uno ka kinaburu i horino uempu'uno i kota Daudi. Ka i'amba i Yorami, anano, gagi mokole umeuo.
Mokole Yorami
21:2-20
(2Mok. 8:16-24)
2Luwuno pepaekompono i Yorami, anano i Yosapa, onaemo: i Asaria, i Yehieli, i Sakaria, i Asariahu, i Mikaeli ka i Sepatia. Ondae luwu anano i Yosapa, mokole i Isaraeli. 3Amado moweeako ira hadio pompowee, onaemo wulaa ka salaka ka luwuno sangka masuli, ka luwuno kota mebente i Yehuda. Sine pentoroa gagi mokole iweeakono i Yorami, hangano onaemo ana akano. 4Umarino i Yorami moparenta a poparentaano amano ka moroso pentoroano, ipepateako ira luwu ponai pepaekompono ka ba'opia mbo'u anu langkai potorono i Isaraeli. 5Tinuwuno i Yorami tolu pulu ka orua nta'u tempono igagi mokole ka oalu nta'u tehineno ipoparenta i Yerusale. 6Itondao sala tumuwudo mokole i Isaraeli kana anu wineweuno somborino i Ahabi, hangano onae mongkombia anano i Ahabi. Onae moweweu hapa anu mosa'o a pongkita-Do i Ue. 7#1Mok. 11:36Maupo kanandio, nahi Dobehe i Ue rumopuo somborino i Daudi, hangano pedandia anu winutu-Do saru i Daudi, menunu saru dandi-Do, nine Ira tumeahakono langano pelita ndi onae ka ana'ueno ranta nahina tampulaano.
8 #
Teg. 27:40
I tempo poparentaano i Yorami, to Edomi umewaio pabawano i Yehuda ka ipompotoro asa mokole gagi mokoledo. 9I Yorami lumako meronga luwuno tadulakono saru luwuno karetano. Tempono wongi ipewangu, ka i'amba meronga saru luwuno tadulako sorodadu mpekareta, ipewinsokio baresido to Edomi anu mengkaduo. 10Kanandiomo dome'ewa to Edomi ka ntepotola inso a mpabawano Yehuda hawe kanandio-andio. I Libina mbo'u umewaio pabawano i tempo atuu, hangano one binta Ira i Ue, Ue Alado uempu'uno. 11Ka iweweuo mbo'u luwuno pompesombaia a luwuno torukuno i Yehuda. Onae weweu ira palili i Yerusale mponsosabo ka onae mokopansia ira to Yehuda. 12Ka i'amba haweomo ndi onae asa wunta inso ndi nabi Elia anu ihino, ”Kanandiomo pau-Do i Ue, Ue Alano i Daudi, ama mpu'umu: Omue tuwu nahi utondao sala ntumuwuno i Yosapa, amamu, ka i Asa mokole i Yehuda, 13tendeano tumondao sala ntumuwudo mokole i Isaraeli ka weweuo Yehuda ka palilino Yerusale mponsosabo, kana anu wineweudo somborino i Ahabi. Tendeano upepate iramo pepaekompomu, luwuno somborido amamu anu moiko irapo sekono omue. 14Onaemo pu'uno Ondae i Ue Ira moweakono tula langkai a mpalilimu, luwuno anamu, beinemu, ka a luwuno arataamu. 15Omue isa'a komarasaiako haki mobea, haki haro kompo, ranta bate'opia tempo haro kompomu ta meluarako hangano haki atuu.” 16Umarino atuu Ondae i Ue lumeluo aroado to Pelisiti ka to Ara anu mpo'ia tepo'umpeda saru to Etiopia ka dome'ewaio i Yorami. 17Melako ira me'ewaio Yehuda, mpewinsokio ka mewawao luwuno arataado anu hinawe i laro langkanaeno mokole gagi pinomuru, ka luwuno anano ka beineno. Nahina maupo te'asa mia anano anu tebinta ndi onae sangkadio i Yoahasi, anano anu tompasusu. 18Umarino luwuno andio, Ondae i Ue mokomahakio i Yorami, mokomahakiakono haki haro kompo anu nahi pinokotompa. 19Ba'opia tempo lembuino, bara'ura umarino orua nta'u, meluarakoomo haro kompono hangano haki atuu, ka i'amba mate tedoa marasai. Palilino nahi dompolangaakono api kana anu domeweweuo a uempu'uno. 20Tinuwuno i Yorami tolu pulu ka orua nta'u tempono igagi mokole ka oalu nta'u tehineno ipoparenta i Yerusale. Onae mate nahina mia anu me'o'oleakono. Onae kinaburu i kota Daudi, sine komba i laro ngkaburudo mokole.
Currently Selected:
2 Tawarika 21: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
