2 Tawarika 18
18
I Ahabi meteaakono Ramoti-Gileadi
Nabi-Do i Ue tepo'aro saru luwuno nabi nahi mentee
18:1-34
(1Mok. 22:1-40)
1Tempono i Yosapa mompoli ka tedoa pinelangkai. Onae gagi ponino anano i Ahabi. 2Ba'opia nta'u lembuino, onae lumako ndi Ahabi i Samaria. I Ahabi monsumbeleakono ka binawaano hadio inso a bawaa bembe bimba ka sapi ka umuluakono sumapoio Ramoti-Gileadi. 3Mepauomo i Ahabi, mokole i Isaraeli ndi Yosapa, mokole i Yehuda, ”Beheko ke lumako i Ramoti-Gileadi meronga saru ongkue?” Sangkino ndi onae, ”Mengkena kita, ongkue ka omue, palilimu ka paliliku, aku koa meronga saru omue a laro mpeteaa.”
4Sine i Yosapa motae ndi mokole i Isaraeli, ”Moiko pinesikenoako se'elu pontiso a mpau-Do i Ue.” 5Umarino atuu mokole i Isaraeli pumpu ira luwuno nabi, pato etu mia hadiono, ka i'amba mesikenoomo ndi ondae, ”Nde moiko koa ke kami lumako metea umewaio Ramoti-Gileadi ke osi'i?” Mesangki ira, ”Ilakomo! Ira koa meweengakono Ue Ala a ngkaemiu mokole.” 6Sine i Yosapa mesikeno, ”Nahina mbo'u ke i ndi'ai te'asa nabi-Do i Ue, ka molalo onae kita mokompo'ema pontiso?” 7Sumangki mokole i Isaraeli ndi Yosapa, ”Da hinao asa mia mbo'u anu molalo onae kita mokompo'ema pontiso-Do i Ue. Sine ku'o'aliaakono, hangano onae nahi hori mompau pe'oliwi-Do i Ue anu moiko mongkona ongkue, tendeano masolaa mpiha. Mia atuu onaemo i Mika anano i Yimila.” Motae i Yosapa, ”Nahi moiko mokole ipepau kanandio.” 8Ka i'amba mokole i Isaraeli moboio asa mia anu langkai potorono, ipotae, ”Lakomo potuturako poboio i Mika anano i Yimila!” 9Kontongaano mokole i Isaraeli ka i Yosapa, mokole i Yehuda singge mentoro a wawo ngkadera poparentaano saru mesangka mokole, i asa po'ianga ponsesaa i arono pewowa langkai Samaria, sekono luwuno nabi atuu mompau anu ta gagi i arodo, 10onaemo i Sedekia anano i Kenaana moweweu tandu-tandu labu, ka ipotae, ”Kanandiomo pau-Do i Ue: Saru andio kotumanduo Arami ranta ka upingko ira.” 11Luwuno nabi mbo'u atuu mompau anu ta gagi kanandio, dompotae, ”Ilakomo i Rama-Gileadi, ka komiu me'ura; Ira meweengakono i Ue a ngkaemiu mokole.”
12Tinena anu lumako moboio i Mika atuu motae ndi onae, ”To'oriomo, luwuno nabi atuu ntepo'asa iramo mpopau anu ta gagi, anu moiko ndi ondae mokole. Moikoano omiu mbo'u mepau kana aasa inso ndi ondae ka mompau anu ta gagi, anu moiko.” 13Sine sumangki i Mika, ”Ndi Ondae i Ue anu tuwu, menteeano hapa anu Ira pauo Ue Alaku, onaemo anu aku pauo.” 14Mansano hawe ndi mokole, mesikenoomo mokole ndi onae, ”Mika, nde moiko koa ke kami melako mpetea umewaio Ramoti-Gileadi ke siimo?” Sangkino, ”Ilakomo ka komiu me'ura, hangano ondae ira mempineweengako a ngkaemiu!” 15Sine mokole motaeakono, ”Hawe tepempia kutenako mesumpa, ka upompau ndi ongkue nahi susua inso a menteea a nee-Do i Ue?” 16#Pod. 27:17; Yeh. 34:5; Mat. 9:36; Mrk. 6:34Ka i'amba sumangki, ”Kukitaomo luwuno Isaraeli ntesiarawo i luwuno torukuno kana asa bawaa bembe bimba anu nahi pakambi ira, onaemo pu'uno mepau Ira i Ue: Ondae andio nahina ueno; moikoomo dosingge mpekule i rahado da mentuwu.” 17Ka i'amba mokole i Isaraeli motaeakono i Yosapa, ”Kombake umariomo kupauakomu: Nahi hori mompau anu ta gagi anu moiko mongkona ongkue, tendeano butu masolaa?” 18Motae i Mika, ”Onaemo pu'uno rongeomo pau-Do i Ue. Kukita Iramo i Ue kontongaa-Do mentoro a wawo ngkadera poparentaa-Do ka luwuno sorodadu suruga mpentade i koana-Do ka i manggali-Do. 19Ka mepau Ira i Ue: Isemake anu ta popandeio i Ahabi, mokole i Isaraeli ka ilako metea, kai mate i Ramoti-Gileadi? Motae asa mia kanandio, anu susua kanatuu. 20Ka i'amba haweomo asa penaa, ka mentade i aro-Do i Ue. Ipotae: Ongkue andio ta popandeio. Mesikeno Ira i Ue ndi onae: Kana'umpe? 21Sangkino: Aku meluarako ka gagi penaa megaupi a laro ngangado luwuno nabino. Mepau Ira: Po'ineeomo ka upopandeio, ka ta koa gagi. Peluarakomo ka weweuomo kanatuu! 22Hangano kanatuu, menteeano Donaaomo i Ue penaa megaupi a laro ngangado luwuno nabimiu andio, Dopakosiomo i Ue Ira moweeakomiu masolaa.”
23Umarino atuu aiwaomo i Sedekia anano i Kenaana; itampeleomo kombisino i Mika ka ipotae, ”Kana'umpe ka i gagi Penaa-Do i Ue melimba inso ndi ongkue ka ipepau ndi omue?” 24Sine sumangki i Mika, ”Menteeano kokumitao ia oleo upolai inso i asa bolongko a bolongko anu susua komewuni.” 25Motaeomo mokole i Isaraeli, ”Rakoomo i Mika, wawao mekule ndi Amoni, anu pabawa i kota, ka ndi Yoasi ana mokole, 26ka pauo: Kanandiomo petenado mokole: Winsoo mia andio a laro torungku ka poweeakono mongkaa roti ka mo'inu uwoi tedei ranta ka kupekule da tuwu inso a peteaa.” 27Sine sumangki i Mika, ”Tewala mentee ntu'u mekule komiu da tuwu, manasa Ondae i Ue nahi Ira mepau molalo ongkue!” Ka i'amba sumombuo, ”Rongeomo, oo luwumiu tongku!”
28Umarino atuu lumakoomo mokole i Isaraeli saru i Yosapa, mokole i Yehuda i Ramoti-Gileadi. 29Mokole i Isaraeli motaeakono i Yosapa, ”Aku mesangka sorodadu ka mewinso a mpeteaa, sine omue pakeomo sangka mokolemu.” Ka i'amba mesangka sorodaduomo mokole i Isaraeli, ka i'amba mewinso a mpeteaa. 30Kanatuumo mokole i wita Arami umariomo moweeako ira parenta a luwuno tadulako puu mpetea karetano kanandio, ”Sii mpetea mo'ewai mondeeno mia, tendeano umewaio butu mokole i Isaraeli.” 31Nahi tehine umarido luwuno tadulako puu mpetea kareta atuu mengkitao i Yosapa, dompotae, ”Onaemo atuu mokole i Isaraeli!” Ka do'amba mengkaduo, ira mensapoio, sine i Yosapa mebooli ka Dotulungio i Ue. Ondae Ue Ala weweu ira ka domelako inso ndi onae. 32Nahi tehine umarino luwuno tadulako puu mpetea kareta atuu mengkitao, nine onae komba mokole i Isaraeli, onaemo ka domposuka inso ndi onae. 33Sine asa mia modii panano ka mepana mondeenomo koa, ka kumonao mokole i Isaraeli i olono sombuno lemba labuno. Ka i'amba motaeakono anu molempao karetano, ”Pewolili! Wawa aku meluarako, hangano mobela akumo.” 34Sine peteaa atuu tepahe langkai i oleo atuu, ka mokole i Isaraeli kongko mentade i laro kareta tepo'aro saru to Arami atuu hawe ngkiniwia. Onae mate tempono sumoo oleo.
Currently Selected:
2 Tawarika 18: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
