1 Samueli 6
6
Burua Pedandia-Do i Ue pinokule a nto Isaraeli
6:1–7:1
1Mansano ninaa opitu wula Burua Pedandia-Do i Ue i wita Pelisiti, 2domempoboi ira to Pelisiti luwuno sando mpelahumoado ka mia mponto'ori, ka dompesikeno, ”Hapa anu ta wineweumami mongkona Burua Pedandia-Do i Ue? Imempaua kami kana'umpe kimewawao ba kimpokuleo a mpo'iangano.” 3Ka do'amba mpotaeako ira, ”Tewala komiu mewawao Burua Pedandia-Do Ue Alado to Isaraeli, simelako moa ngkae, asalakono ime'owahio pesomba pontolosi sala ndi Ondae, gagi komiu mempinokotompa ka komiu mento'orio tembio kae-Do nahi telimba inso ndi omiu.” 4Mpesikeno ira mbo'u mia atuudo, ”Hapa anu kimpo'owaiako pontolosi sala ndi Ondae?” Mesangki ira, ”Montonda hadiono mokoledo to Pelisiti, olima wulaa kana kamba ka olima tehu wulaa, hangano mengkena pohuku anu umalukomiu luwu ka luwuno mokolemiu. 5Asalakono ka impoweweu pandirino kamba ka tehu anu sumolangio witamu. Asalakono ka ime'akuio maramba-Do Ue Alado to Isaraeli. Bara'ura nami Ira humuku komiu, pelahumoaamiu ka witamiu. 6Tembio ka ipokomoteao aroamiu kana to Masiri ka i Pirao i ndi'upua anu motea aroado? Umari Dopemae-maeako ira, komba ke dopo'inee ira to Isaraeli melako? 7Onaemo pu'uno ime'alaomo ka imempatindao asa roda wo'ohu, saru orua sapi anu da mompo'uo anano, anu napi hori pinasanga. Imempasangaomo sapi orua atuu a roda, sine orua anano sapi atuu imempokuleo a laro walano ka si dopetonda mbo'u. 8Ka i'amba me'alao Burua Pedandia-Do i Ue ka ime'ulao a roda. Luwuno wulaa pesomba pontolosi sala anu asalakono ime'owahio ndi Ondae, imenaao a larono burua, ka ime'ulao i'asambalino Burua Pedandia. Ka i'amba mempo'ineeo burua pedandia atuu ka ilako. 9Impekokoongakono: tewala Burua Pedandia atuu mo'ala sala lumako i Beti-Semesi, lano witano, pengkonaano, Ondaemo pu'uno masukara langkai andio ndi ontae. Tewala naahi, kita koa mento'orio, nine komba pohuku inso ndi Ondae i Ue anu pinembasaito, ndikoa mansa gagi ndi ontae.”
10Luwudo mia atuu mpoweweu kana ndio. Dome'alao orua sapi anu da mompo'uo anano ka domempasangao a roda, sine orua anano domewinsoo a laro walano. 11Dome'ulao Burua Pedandia-Do i Ue i larono roda, saru burua anu me'ihi tehu-tehu wulaa ka wulaa anu wineweu kana kambado. 12Sapi orua atuu melempa moleo montonda sala langkai te'aro i Beti-Semesi, maupo dope'ongeli moboi ira anado, nahi dopansia i koana ke i manggali, luwuno mokoledo to Pelisiti mpelempa i bungkuno hawe a ntida wita Beti-Semesi. 13Palili i Beti-Semesi kontongaado mensowi gandu i lembono. Mansado mpengkita, domengkitaomo burua pedandia atuu, memawongko iramo. 14Roda atuu hawe i lereno i Yosua, to Beti-Semesi, ka menaa-naa i ra'ai, umpeda watu langkai. Domebansio keuno roda atuu ka dompesombaakono sapi orua atuu gagi pesomba tinunu ndi Ondae i Ue. 15To Lewi mempotiio Burua Pedandia-Do i Ue ka burua i asambalino, anu me'ihi wulaa, ka domenaao i wawono watu langkai atuu. I oleo atuu to Beti-Semesi mpopesombaako pesomba tinunu ka pesomba sinumbele ndi Ondae i Ue. 16Mansado mengkitao anu gagi atuu, olima ira mokoledo to Pelisiti mpekule i Ekeroni oleo koa atuu.
17Ndiomo wulaa pandirino kamba anu inowahido to Pelisiti ndi Ondae i Ue gagi pesomba pontolosi salado: asa tiano kota Asidodi, asa tiano kota Gasa, asa tiano kota Asikeloni, asa tiano kota Gati, ka asa tiano kota Ekeroni. 18Tehu-tehu wulaa atuudo mengkena kana hadiono luwuno kota Pelisiti anudo olima mokole kota, luwuno kota anu hinao benteno maupo luwuno inia petengi-tengino. Watu langkai, anu i wawono domenaao Burua Pedandia-Do i Ue, da kongko i lereno i Yosua to Beti-Semesi, hawe oleo andio.
19Asa ntia to Beti-Semesi Dopepate ira, hangano mpekita ira i larono Burua Pedandia-Do i Ue, pitu pulu mia, i olodo anu mate. Mpo'inombo ira palili, hangano Ondae i Ue mepate ira tedoa mongkokongiri. 20Luwudo to Beti-semesi mpotae, ”Isema anu polio umaropi Ira i Ue, Ue Ala anu mempori? Ndi sema ba Dolako, ka Dobinta kita olai?” 21Mpontena ira mia melako a mpalilino Kiriati-Yeari, saru pe'oliwi, ”Me'aiwa iramo to Pelisiti mempokuleo Burua Pedandia-Do i Ue. Ime'aiwamo ka imewawao ndi omiu.”
Currently Selected:
1 Samueli 6: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
