1 Samueli 26

Kompenduano i Daudi nahi behe mepateo i Saulu

26:1-25

1 # Pud. 54:2 Mehawe ira to Sipi ndi Semueli ka dompotae, ”I Daudi kontongaano mewuni i pongkuno wita Hakila anu tepo'aro saru Yesimoni.” 2Ka i'amba metii i Saulu i Pada One Sipi ta lumako umungkeo i Daudi i ra'ai, mowawa tolu nsowu to Isaraeli tebiniki. 3I Saulu mekema a wiwinsala i Pongku Hakila anu tepo'aro saru Yesimoni, ka i Daudi mo'ia i pada one. Mansano tumo'orio i Daudi nine i Saulu hawe lumuluo i pada one, 4montenaomo puu pompadaso. Ka domehaweo nine i Saulu haweomo ntu'u. 5Lumakoomo i Daudi hawe a mpekemaano i Saulu. Ikitao i Daudi pepomboleano i Saulu saru i Abinere anano i Nere, tadulako sorodaduno. I Saulu mepombole i tonga-tongano pekemaa, ka sorodadu mpekema melimbuo. 6Ka i'amba i Daudi motaeakono i Ahimele to Heti atuu ka i Abisai anano i Seruya, pepaekompono i Yoabi, ipotae, ”Isema anu ta tumonda aku lumako a mpekemaano i Saulu atuu?” Sumangki i Abisai, ”Ongkue, aku tumondakomiu.”

7Wongi atuu lumako iramo i Daudi ka i Abisai a mpo'iangaado sorodadu. Dokitaomo i Saulu mepombole i tonga-tongano pekemaa, kansaino ipetandapakono a wita umpeda i uluno, ka i Abinere saru sorodadu mpepombole melimbuo. 8Ipotae i Abisai ndi Daudi, ”Oleo andio Ondae i Ue Ala Dopeweengakono iwalimiu a ngkaemiu. Kanandio-andio po'ineeomo aku tumandapakono kansaiku ndi onae pohona koa nahi ta pendua.” 9Sine ipotae i Daudi ndi Abisai, ”Si pepateo, hangano isema anu mompepate mia inurapi-Do i Ue asalakono mohawe pohuku.” 10Ipotae mbo'u i Daudi, ”A nee-Do i Ue anu tuwu, asalakono Ira mepateo i Ue, ke lano haweakoomo tempono, ke mate a mpeteaa. 11A nee-Do i Ue, nahi aku motiio kaeku a mia inurapi-Do i Ue. Kanandio-andio alaomo kansai umpeda i uluno atuu ka ponaapa uwoi, ka aiwamo tomelako.” 12I alao i Daudi kansai ka ponaapa uwoi umpeda i uluno i Saulu, ka do'amba lumako. Nahina anu kumita ira ka nahina anu tumo'orio, mpoturi ira luwu nahina mewangu, hangano Ondae i Ue weweu ira ka dompoturi rodo. 13Ka i'amba i Daudi lumako ihorino susua ka ipentade olai inso a punsuno pongku wita, ranta ka dotepo'olai. 14Mebooliomo i Daudi a nsorodadu ka ndi Abinere, anano i Nere, ipotae, ”Oo Abinere, uronge aku koake?” Sumangki i Abinere, ”Isemake omue andio anu meboo-booliako ira mokole?” 15Motae i Daudi ndi Abinere, ”Nde nahi tamake omue andio? Isema kana omue i Isaraeli? Tembio kanahi udagaio uemu mokole, hangano asa mia inso a mpalili aiwaomo ta mepate ira uemu mokole? 16Nahi moiko wineweumu atuu. A nee-Do i Ue anu tuwu, asalakono komate, hangano nahi udagaio uemu mia anu inurapi-Do i Ue. Kanandio-andio kitaomo, isua kansaido mokole ka ponaapado uwoi anu ninaa umpeda i uludo?”

17Pepauno i Daudi, ito'orio i Saulu, onaemo ka ipotae, ”Omueke Daudi, anaku anu mepau atuu?” Sumangki i Daudi, ”Humbee, ongkue anu mepau, ueku mokole.” 18Motae mbo'u i Daudi, ”Tembio ueku ka i luluo tetenaamiu andio? Hapamo anu wineweuku? Hapamo wineweuno kaeku anu mosa'o? 19Kanandio-andio ueku mokole, iperorongeakono wainto anu pinauno tetenaamiu andio. Tewala Ondae i Ue anu tumenakomiu umewai aku, po'ineeomo ka Dopemoikoo woono pesomba. Sine tewala inso a mia, tetotonaa iramo i aro-Do i Ue, hangano oleo andio domensaari akumo, ranta nahi kupohawe tia pusaka-Do i Ue. Mpotae iramo, ’Lakomo pesomba a anu pinesombai susua.’ 20Gagi, kasi mansa te'uwu reaku a wita, olai inso ndi Ondae i Ue. Hangano, mokoledo to Isaraeli meluarako ta molulu asa kutu, kana mia molulu torato ia pongku-pongku wita.” 21Motaeomo i Saulu, ”Tehala akumo. Pekulemo anaku Daudi. Nami aku moweweu mosa'o mbo'u ndi omue, hangano oleo andio penaaku mentudu ndi omue. Lano, moweweukomo anu nahi mentee ka sala pompewowolo akumo.” 22Sumangki i Daudi, ”Ndiomo kansaimiu mokole! Ipontenamo te'asa mia tetenaamiu aiwa umalao i ndi'ai. 23Ondae i Ue Ira sumuloo menteeano ka petenununo sompo mia, hangano oleo andio Ondae i Ue meweengakomiu a ngkaeku, sine nahi kubehe motiio kaeku ia mia anu inurapi-Do i Ue. 24Menteeano, kana'umpe mentuduno penaamiu ndi ongkue oleo andio, kanatuukoa mbo'u mentuduno penaaku ndi Ondae i Ue ka Dopotola aku inso a luwuakoano masusaa.” 25Ka i'amba i Saulu motaeakono i Daudi, ”Ondae i Ue rumonsoko anaku Daudi. Hapamokoa anu wineweumu asalakono ta mewua.” Umarino atuu, i Daudi motilaloakono pelempaano ka i Saulu mekule a mpo'iangaano.

Currently Selected:

1 Samueli 26: XMZ

Highlight

Copy

Compare