1 PETURU 2
2
Ondae i Yesu Kerisituu watu siuno
2:1-10
1Onaemo pu'uno imentadiomo luwuno mosa'oa, luwuno pompopo'oo ka luwuno rupano po'onde-onde, kohilia ka pomposebe. 2Ka imegagimo kana nana'ote kodei anu da iaopo ihina, anu wela mosisiriakono uwoi uo ntu'u ka anu rohani, ka inte'iliako onae ka ntekadudui, 3#Pud. 34:9 tewala mentee ntu'u impenamiomo moiko-Do i Ue. 4Ka ime'aiwamo ndi Ondae, watu anu tuwu atuu, anu lano domentadio mia, sine anu bininiki ka pinelangkai i aro-Do Ue Ala. 5Ka po'ineeomo omiu mbo'u mempinake kana watu tuwu powangu aasa raha rohani, tiano aasa imama mempori, ka ipinesombaako pesomba rohani anu hangano Ondae i Yesu Kerisituu Dopemoiko Ira Ue Ala. 6#Yes. 28:16 Hangano hinao teburi,
”Menteeano, Kunaao i Sioni aasa watu anu tebiniki,
aasa watu siuno anu masuli olino,
ka isema anu me'ala-ala Ira, nahi ta pinokoko'ii.”
7 #
Pud. 118:22
Onaemo pu'uno ndi omiu, anu mpompe'ala-ala, onae masuli olino, sine ndi ondae anu nahi dompompe'ala-ala,
”Watu anu domentadiomo mia mperaha,
gagiomo watu siuno,
gagiomo mbo'u watu tedanggia ka aasa watu tetidua.”
8 #
Yes. 8:14-15
Dontetiduario, hangano nahi domperorongeakono pau-Do Ue Ala; ka hangano atuu ondae mbo'u mempinatindaako iramo.
9 #
Pel. 19:5-6; Win. 4:20; 7:6; 14:2; Yes. 9:1; 43:20-21; Tit. 2:14 Sine omiumo tongku anu tebiniki, imama anu moleo, tongku anu mempori, bawaa-Do Ue Ala, ka imempaleleo luwuno wineweu anu langkai inso ndi Ondae, anu moboi komiumo mpeluarako inso a wongi-wongia a mewine-Do anu kinohali-haliako:
10 #
Hos. 2:22
Omiu, anu i ndi'upua komba bawaa-Do Ue Ala,
sine anu kanandio-andio megagi komiumo bawaa-Do,
anu i ndi'upua nahi mempinehohawa
sine kanandio-andio mpohawe komiumo pe'aroa.
Pompoto'ori ka tomentuwu kana tetenaa-Do Ue Ala
2:11-17
11Pepaekompoku luwu-luwu anu pinehohawaku, kupatudu komiu, kana mia mehawe ka anu mpo'ungke tuwua, ka ime'olaiakono luwuno po'eheno koroi anu meteahako umewaio sumanga. 12Temoikomo gaumiu imentuwu i tonga-tongado tongku komba Yahudi, tewala domposebe komiu kana mia melambaha, ka dompokokitao inso a luwuno wineweumiu anu moiko ka melangkai Ira Ue Ala a oleo Dotepohaweako ira.
13Impe'urumakomo, hangano Ondae Ue Ala, a luwuno posongkano mia, moiko a mokole anu uminio pabawa anu lalu i wawono, 14maupo luwuno petewawa i wita anu tinenano ka domehuku ira mia anu mpoweweu mosa'o ka melangkai ira mia anu mpoweweu moiko. 15Hangano onaemo andio po'ehe-Do Ue Ala, onaemo saru poweweu moiko ka imempokongkomino ira mia anu mebenge-benge anu nahi malua pinewowolodo. 16Imentuwumo kana mia maradeka ka komba kana ondae anu mensala pakeo maradekaa atuu ka itetutuwi luwuno wineweudo anu mosa'o, sine imentuwumo kana tetenaa-Do Ue Ala. 17Impelangkai iramo luwuno mia, impehohawa iramo pepaekompomiu, imedoitoako Iramo Ue Ala, impelangkai iramo mokole!
Tebobarasai-Do i Kerisituu gagi pandiri
2:18-25
18Hei omiu, luwuno ata, impetuundumo saru buke doito a uemiu, komba butu a anu moiko ka mauru, sine a anu mbo'u lambaha. 19Hangano onaemo pe'aroa, tewala asa mia hangano ipokonto'orio po'ehe-Do Ue Ala sumusuruo tebobarasaia anu komba asalakono susuruano. 20Hangano polioke ipinau po'unde-unde, tewala memarasaiako komiu pontunduhi hangano mpoweweu komiu hala? Sine tewala mpoweweu komiu moiko ka onaemo pu'uno omiu asalakono ntebobarasai, ka onaemo atuu pe'aroa ndi Ondae Ue Ala. 21Hangano onaemo atuu ka imempinoboi, hangano maupo Ondae i Kerisituu Dotebobarasaiakomiumo ka Dopobintaakomiumo pandiri, ka imentondao wineweu-Do.
22 #
Yes. 53:5-9
Nahi Dotehala,
ka pompopo'oo nahina a laro nganga-Do.
23Tempono Dopinepauikiako, nahi Dopombaloako pompepauki; tempono Dotebobarasai, nahi Dopompokodoito, sine Dopeweengakono ndi Ondae, anu moleo Dopobitara. 24Ondae-Do isa'a tumembiomo halato a laro ngkoroi-Do a ngkeu pinotamba, ka tomentuwu tiano menteea. Hangano pelia-liamba-Do memadoo komiumo. 25Hangano i ndi'upua ntesaa komiu kana bimba, sine kanandio-andio mpepokule komiumo a puu pompakambi ka mpekariao sumangamiu.
Currently Selected:
1 PETURU 2: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
