1 Mokole 4
4
Luwuno petewawano i Salomo
4:1-20
1I Salomo gagi mokole a luwuno Isaraeli. 2Ndiomo luwuno anu langkai potorodo: i Asaria anano i Sadoki gagi sando mpesomba, 3i Elihore ka i Ahia, ondae anano i Sisia gagi puu mpoburi a poparentaa. I Yosapa anano i Ahiludi gagi puu mpopekaria arataa. 4I Benaya anano i Yoyada gagi tadulako sorodadu. I Sadoki ka i Abiata gagi sando mpesomba. 5I Asaria anano i Nata kumitao inanggado luwuno petewawa, i Sabudi anano i Nata, asa mia sando mpesomba sambe'edo mokole. 6I Ahisari, petewawa a langkanae; i Adonira anano i Abida, petewawado mia mpo'angga dinadai. 7Hinao hopulu ka orua bupatino i Salomo a luwuno wita Isaraeli. Ondae asalakono mpopatinda kaanga tiado mokole ka luwuno ihino langkanae, singge mia mompatinda kaanga tiano asa wula i larono asa nta'u. 8Ndiomo luwu needo: I Beni-Huru, i menturukuno Eparai; 9i Beni-Dekeri, i Makasi, i Saalibi, i Beti-Semesi ka i Eloni-Beti-Hanani; 10i Beni-Hesedi, i Aruboti, witano Soko ka luwuno wita Heperi; 11i Beni-Aminada, i luwuno wita pongku Dore; kombiano onaemo i Tapati ana beineno i Salomo. 12I Ba'ana anano i Ahiludi, i Ta'anaka, i Megido ka luwuno Beti-Seani anu i asambalino Saratani i selatano Yesire'eli, inso i Beti-Seani hawe i Abeli-Mehola hawe i asa towano Yokemeami. 13Ka i'amba i Beni-Geberi, i Ramoti-Gileadi; wita pinabawaino Hawoti-Yaeri i Gileadi. I Yeari, onaemo anano i Manase. Wita pinabawaino mbo'u tewinso Arigo anu i Basani, nomo pulu kota langkai, mewalaako watu ka pewowano melansoako mala; 14I Ahinada anano i Ido, i Mahanai; 15I Ahima'asi, i Napatali; onae mbo'u umalao i Basima anano i Salomo gagi kombiano. 16Ka i'amba i Ba'ana anano i Husai, i Asieri ka i Aloti; 17I Yosapa anano i Paruahi, i Sakari; 18I Simei anano i Ela, i Benami; 19ka i Geberi anano i Uri, i wita Gileadi, witano i Sihoni, mokoledo to Amori, ka witano i Ogo, mokoledo to Basani. Hinao mbo'u asa petewawado a luwuno wita. 20To Yehuda ka to Isaraeli mehadio ira ntu'u kana one i wiwi ntahi. Ondae mpongkaa ka mempo'inu memawongko.
Langkaino pabawano i Salomo
4:21-34
21 #
Teg. 15:18; 2Taw. 9:26 I Salomo pabawaio luwuno poparentaa mompu'u inso i Koro Eparata hawe a witado to Pelisiti ka hawe a ntida wita i Masiri. Ondae mpowawa peki'ue ka mpetenunu ndi Salomo asa ntinuwudo. 22Kaanga anu kinereno i Salomo i larono asa oleo, onaemo: tolu pulu kor tarigu anu moiko ntu'u, ka nomo pulu kor tarigu biasa, 23hopulu sapi mewalo, ka ruapulu sapi pinakambi ka asa etu bimba, napi tewinso rusa, lagiwa, rusa dandi ka manu-manu pinekaria. 24Hangano onae pabawaio luwu wita i sumooano oleo koro Eparata, mompu'u inso i Tipisa hawe i Gasa, saru mbo'u a luwuno mokole i sumooano oleo koro Eparata atuu. Rodoa kongko a luwuno siuno witano. 25To Yehuda ka to Isaraeli sanaa domentuwu asa ntinuwuno i Salomo, singge mia a ntoto ngkeu anggorono ka keu arano, inso i Dani hawe i Bereseba. 26#1Mok. 10:26; 2Taw. 1:14; 9:25I Salomo mbo'u hinao pato pulu nsowu walaka ngarano tiano luwuno karetano ka hopulu ka orua nsowu sorodadu mpengara. 27Luwuno petewawa atuu mpopatinda kaanga tiado mokole Salomo ka luwuno mia anu mpetonda mpongkaa a medado mokole Salomo. Dosingge mewawao a wula tiado, ranta nahina anu makurano. 28Jelai ka seami tiado ngara biasa ka ngarano kareta, domewawao a mpo'ianga anu pinatinda, singge mia montonda tanggumiano. 29Ondae Ue Ala moweeakono i Salomo pande mompewowolo ka ponto'ori anu tedoa mantii saru pinewowolo anu malua kana one i wiwi ntahi. 30Pandeno mompewowolo i Salomo, ilaloi pandedo mpopewowolo luwuno mia i Sabaano Oleo ka lumaloio luwuno pandedo mpopewowolo to Masiri. 31#Pud. 89:1Onae pandeopo mosongka sekonopo luwuno mia, maupo sekono i Etani, to Eserahi ka i Hemani, i Kalikoli saru i Darida, luwuno anano i Maholi. Onaemo pu'uno neeno telele i olodo luwuno tongku petengi-tengino. 32#Pow. 1:1; 10:1; 25:1; Pen. 1:1Onae moburi tolu nsowu powadi ka penanino asa nsowu ka olima hadiono. 33Onae mowadi mongkona keu, inso a ngkeu arasi i torukuno Libano hawe a ewo hisopi anu tuwu a rere watu. Onae mbo'u mowadi mongkona pinotuwu, manu-manu, kondehora anu mpelele ka luwuno bou. 34Onaemo ka domehawe hadio mia inso a luwuno tongku ira merongeo pandeno mepau i Salomo. Ondae tinenado luwuno mokole i tolino anu merongeomo mongkona ponto'orino mompewowolo.
Currently Selected:
1 Mokole 4: XMZ
Highlight
Copy
Compare
Share
Want to have your highlights saved across all your devices? Sign up or sign in
LAI 2021
