1 Mokole 19

I Elia lumako i torukuno Hore

19:1-8

1I Ahabi pauakono i Isebeli luwuno anu wineweuno i Elia ka poweweuno mbo'u i Elia mepateako ira ponai luwu nabi. 2I Isebeli tumenao asa mia lumako ndi Elia saru pe'oliwi, ”Po'ineeomo luwuno pinesombai humuku aku mobea maupo torea mbo'u, tewala tisomo tempo kanandio nahi kupepateko mengkena kana asa mia i olodo atuu.” 3Onae mbo'u doitoomo, ka i'amba lumako mewuni. Mansano hawe i Bereseba i witado to Yehuda, ibintao atano i ra'ai. 4Sine onae lumako i pada one asa oleo pelempaa olaino. Hawe ka ipentoro i totono keu arari. Onae mo'ema kai mate, ipotae, ”Sompoomo! Kanandio-andio, oo Ue, I'alaomo penaaku, hangano ongkue andio komba laluaopo moiko sekono uempu'uku.” 5Ka i'amba mepombole ka ipoturi i totono keu arari atuu. Mansa hawe asa mala'eka dumanggio ka ipotaeakono, ”Pewangumo, pongkaamo.” 6Mansano mengkita, ikitaomo umpeda i uluno hinao roti tinunu ka takea me'ihi uwoi. Mongkaaomo ka ipo'inu, ka i'amba mepombole mbo'u. 7Sine mala'eka-Do i Ue aiwa anu kompenduano ka idanggio, ipotae, ”Pewangumo, pongkaamo! Hangano pelempaa atuu te'ingka kotedoa me'olaio.” 8Mewanguomo kai pongkaa ka mo'inu. Hangano kaanga atuu onaemo kai moroso melempa pato pulu oleo ka pato pulu wongi hawe i torukuno Hore, torukuno-Do Ue Ala.

Ondae Ue Ala mopokitao koroi-Do i torukuno Hore

19:9-18

9I ra'ai ipewinso a laro aasa kunepo ka iperato i tu'ai. Ka i'amba haweomo pau-Do i Ue, ndi onae, kanandio, ”Hapa inanggamu i ndi'ai Elia?”

10 # Rom. 11:3 Sangkino, ”Tedoa aku me'o'osu mo'angga ndi Omiu Ue, Ue Alano luwuakoano, hangano to Isaraeli mebintao pedandia-Miu, mpobangkuo luwuno meda pontunua pesomba ndi Omiu ka mpepateako ira ponai luwuno nabi-Miu. Butu ongkue asa-asaku anu da tuwu ka ondae mpo'ungke sala ira mpepate aku.” 11Ka i'amba pau-Do, ”Peluarakomo ka pentade i wawono torukuno atuu i aro-Do i Ue!”

Ka i'amba telalo Iramo i Ue. Angi langkai ka mokora bansio luwuno torukuno ka pehao luwuno pongku watu mese'elungi Ira i Ue. Sine Ondae i Ue nahi Dokongko a laro angi atuu. Umarino angi haweomo lelu. Sine Ondae i Ue nahi Dokongko a laro lelu atuu. 12Umarino lelu, haweomo api. Sine Ondae i Ue nahi Dokongko a laro api atuu. Umarino api atuu haweomo uni mepuuri anu me'ara-arai. 13Mansano rumongeo i Elia, itutuwiakono lemba meloe rupano, ka i'amba meluarako ka mentade a mpewowano kunepo atuu. Haweomo suara ndi onae, kanandio, ”Hapa ke inanggamu i ndi'ai, hei Elia?” 14Sangkino, ”Tedoa aku me'o'osu mo'angga ndi Omiu Ue, Ue Alano luwuakoano, hangano to Isaraeli mebintao pedandia-Miu, mpobangkuo luwuno meda pontunua pesomba ndi Omiu ka mpepateako ira ponai luwuno nabi-Miu. Butu ongkue asa-asaku anu da tuwu ka ondae mpo'ungke sala ira mpepate aku.”

15 # 2Mok. 8:7-13 Mepau Ira i Ue ndi onae, ”Lakomo, pekulemo a nsalamu lumako i pada one Damasi. Sahawemu i ra'ai asalakono kau urapio i Hasaeli gagi mokoledo to Arami. 16#2Mok. 9:1-6Omue asalakono umurapio mbo'u i Yehu ana ueno i Nimisi gagi mokoledo to Isaraeli, ka i Elisa, anano i Sapati inso i Abeli-Mehola, gagi nabi umeuko. 17Isema anu tola inso a mponaino i Hasaeli, i Yesu anu ta mepateo. Isema anu tola inso a mponaino i Yehu, i Elisa anu ta mepateo. 18#Rom. 11:4Sine Aku mobinta pitu nsowu mia i Isaraeli, luwuno mia anu nahi penggolontuu mesombaio ka nahi wowooo i Ba'ala.”

I Elisa tumondao i Elia

19:19-21

19I Elia lumako inso i ra'ai ka itepohaweakono i Elisa anano i Sapati anu kontongaano mompadekoako hopulu ka orua pasa sapi. I Elisa i bungkuno pasano sapi anu kohopulu ka orua. Mansano telalo umpeda ndi onae, i Elia metendeakono lemba meloeno ndi onae. 20Ka i'amba i Elisa bintao sapino atuu ka ipelulu tumondao i Elia, ipotae, ”I'eheakunemo ari woo-woo ira amaku ka ineku, ka ku'amba tumonda komiu.” Sumangki i Elia, ”Lakomo, ka u'amba mekule hangano hapa anu kuweweuomo ndi omue.” 21Mepokuleomo i Elisa bintao i Elia. I'alao sapi asa pasa atuu, isumbeleo, ka bauno inahuo, ka padekono sapi atuu gagi keu ponahu. Bauno atuu iweeako ira luwuno miano ka do'amba pongkaa. Umarino atuu lumakoomo tumondao i Elia ka mekakaakono.

Currently Selected:

1 Mokole 19: XMZ

Highlight

Copy

Compare