1 Tawarika 23

Pontiaa anggaa a nto Lewi

23:1-32

1 # 1Mok. 1:1-40 Mansano mota'uomo i Daudi ka tende ntumuwu, ipotoroo i Salomo, ana ntamano gagi mokole a nto Isaraeli. 2Ipumpu ira luwu anu langkai potorodo i Isaraeli, luwuno mbo'u sando mpesomba ka to Lewi. 3Ka i'amba dumoa ira to Lewi anu metinuwu tolu pulu nta'u ka torea. Ondae medinoa nte'o'asa, porokono tolu pulu ka oalu nsowu tama. 4”Inso i olodo, rua pulu ka opaa nsowu mia asalakono medagaio anggaa a raha-Do i Ue; nomo nsowu mia asalakono gagi puu mpo'atora ka puu mpobitara; 5pato nsowu mia gagi puu mpodagai pewowa langkai; ka pato nsowu mia anggaado umunde-unde Ira i Ue mompake parewa pontonda penani anu kuweweuomo.” Ipotae i Daudi. 6I Daudi mbo'u tumia-tia ira a bawaa montonda luwuno anano i Lewi: i Geresoni, i Kehati ka i Merari.

7Tewinso inuleno i Geresoni, onaemo i Ladani ka i Simei. 8Luwuno anano i Ladani, onaemo i Yehieli, petewawano, saru i Setami ka i Yo'eli; porokono otolu mia. 9Luwuno anano i Simei, onaemo i Selomiti, i Hasieli ka i Harani; porokono otolu mia. Luwuno mia andio anu gagi petewawa a mpepe'etuano i Ladani. 10Luwuno anano i Simei, onaemo i Yahati, i Sisa, i Yeu ka i Beria. Onaemo atuu luwuno anano i Simei; porokono opaa mia. 11I Yahati, onaemo petewawa ka i Sisa, mia ko'orua, sine i Yeu ka i beria nahi dope'ana hadio, onaemo ka dogagi asa mpepe'etua saru asa po'anggaa.

12Luwuno anano i Kehati, onaemo i Amarami, i Yisihari, i Heberoni ka i Usieli; porokono opaa mia. 13#Pel. 28:1Luwuno anano i Amarami, onaemo i Haruni ka i Musa. I Haruni pinakosi saru inuleno hawe nahina tampulaano ka dompopokomempori parewa anu tedoa mempori, ka dompotunu pesomba i aro-Do i Ue, ka dompekakaako Ira ka mompowee ronso a nee-Do hawe nahina tampulaano. 14Luwuno anano i Musa, tetenaa-Do Ue Ala atuu, wininso a laro nsuku Lewi. 15Luwuno anano i Musa, onaemo i Geresomi ka i Elieseri. 16Anano i Geresomi, onaemo i Sebueli, asa mia petewawa. 17Anano i Elieseri, onaemo i Rehabia, asa mia petewawa. I Elieseri nahina anano anu susua, sine luwuno anano i Rehabia mehadio ira ntu'u. 18Anano i Yisihari, onaemo i Selomiti, asa mia petewawa. 19Luwuno anano i Heberoni, onaemo i Yeria, asa mia petewawa, i Amaria, ana ko'orua, i Yahasieli, ana ko'otolu ka i Yekameami, ana ko'opaa. 20Luwuno anano i Usieli, onaemo i Mika, asa mia petewawa ka i Yisia, ana ko'orua.

21Luwuno anano i Merari, onaemo i Mahali ka i Musi. Luwuno anano i Mahali, onaemo i Eleasari ka i Kisi. 22I Eleasari mate nahi pe'ana ntama. Onae butu me'ana beine luwu. Luwuno anano i Kisi, potehado, umala ira gagi kombiado. 23Luwuno anano i Musi, onaemo i Mahali, i Ederi ka i Yeremoti; porokono otolu mia.

24Onaemo atuu inuleno i Lewi montonda pepe'etuado, luwuno petewawa a mpepe'etuado, i tempono domebinuri nte'o'asa menunu saru porokono needo anu tinuwu rua pulu nta'u ka torea. Ondae anu me'anggao weweuano pesomba i raha-Do i Ue. 25Hangano mepauomo i Daudi, ”Ondae i Ue, Ue Alano i Isaraeli, moweeako iramo rodoa a bawaa-Do ka Ondae mo'ia i Yerusale ranta nahina tampulaano. 26#Win. 10:8Bakanandio, to Lewi nami ira mentandeo mbo'u Kema Mempori ka luwuno parewa anu pinake a mpesomba i tu'ai.” 27Menunu saru petenano i Daudi anu pokotompa, luwuno anano i Lewi anu mebinuri, onaemo anu tinuwuno rua pulu nta'u ka torea. 28#Pod. 3:5-9”Anggaado, onaemo mokowali ira anano i Haruni a mpoweweua pesomba i raha-Do i Ue, me'orusuo kintala ka luwuno bolongko ka pompokomorinaa luwuno sangka mempori ka me'anggao anggaa anu hinao penggoeno saru pesomba i raha-Do Ue Ala: 29Ondae asalakono mpo'orusu roti pesomba ka tarigu moiko ntu'u weweua pesomba kaanga, roti monipi anu nahi peragi, kaanga pesomba anu rinarami i wawono poraramia ka anu sinaloako lana, saru luwuno ponsa'u ka posongka. 30Ondae mbo'u anu mpopohawe pontarimakasi ka po'unde-unde tia-Do i Ue sompo mo'oru, kanatuu koa mbo'u sompo ngkiniwia, 31ka sompo mpopesombaako luwuno pesomba tinunu ndi Ondae i Ue ia oleo Saba, wula wo'ohu ka oleo langkai, menunu saru porokono anu lano pinakosiomo i aro-Do i Ue. 32Ondae asalakono mpekakaakono anggaado a Ngkema Tepotowoa ka po'ianga mempori, saru anggaado mpokowali ira anano i haruni, luwuno pepaekompodo a mpoweweua pesomba i raha-Do i Ue.”

Currently Selected:

1 Tawarika 23: XMZ

Highlight

Copy

Compare