1 Tawarika 18

Ponangino i Daudi

18:1-13

(2Sam. 8:1-14)

1Ba'opia tempo lembuino, i Daudi numangi ira to Pelisiti ka ipabawai ira. Ka i'amba mongko'alao Gati ka luwuno kota kodeino inso a ngkaedo to Pelisiti.

2I Daudi numangi ira koa mbo'u to Moabi, ranta to Moabi mpetenunu ndi onae ka asalakono pompesombaako peki'ue.

3Ka i'amba i Daudi numangio i Hadadeseri, mokoledo to Soba umpeda i Hamati, tempono ilako mokorosoo pabawano a ngkoro Eparata. 4I Daudi mongko'alao inso ndi onae asa nsowu kareta, pitu nsowu mia sorodadu mpengara ka rua pulu nsowu mia sorodadu mpelempa ngkaru. Ka i'amba i Daudi tumena ira mentotopio ia wenggo-wenggono luwuno ngara pompae kareta, sine pinetorea asa etu. 5To Arami inso i Damasi me'aiwa ira mentulungio i Hadadeseri, mokoledo to Soba, sine ipepate ira i Daudi rua pulu ka orua nsowu to Arami atuudo. 6Ka i'amba i Daudi numaa ira luwuno sorodadu mpodagai a witado to Arami i Damasi. To Arami mpetenunu ira ndi Daudi ka asalakono pompesombaako peki'ue. Ondae i Ue moweeakono poponangia ndi Daudi isuamo koa ilako. 7Umarino atuu i Daudi umala ira kanta wulaa anu pinakedo atano i Hadadeseri, ka i'amba wawao i Yerusale. 8#1Mok. 7:40-47; 2Taw. 4:11-18Inso i Tibahati ka i Kuni, luwuno kotano i Hadadeseri, i Daudi mowawa hadio ntu'u mala anu pinakeno i Salomo moweweu ”tahi” mala, karuno raha-Do i Ue ka parewa mala.

9Mansano i Tou, mokoledo to Hamati, rumongeo nine i Daudi inangiomo luwuno sorodaduno i Hadadeseri, mokoledo to Soba, 10itenao i Hadorami, anano anu tama, lumako ndi mokole Daudi mompohawe tabea ka pau pompelangkai ndi onae, hangano ipeteaakonomo i Hadadeseri ka inangio. Hangano i Hadadeseri andio mararu ipeteaakono i Tou. I Hadorami mowawa mperupa-rupa sangka wulaa, salaka ka mala. 11Parewa andiodo ipakosiomo mokole Daudi tia-Do i Ue, saru salaka ka wulaa anu winawano inso a luwuno tongku, inso a nto Edomi, to Moabi, inuleno i Amoni, to Pelisiti ka to Amale.

12 # Pud. 60:2 I Abisai anano i Seruya, ipepate ira hopulu ka oalu nsowu to Edomi i Lembono Me'ohia. 13Ka i'amba numaa ira luwuno sorodadu mpodagai i wita Edomi, ranta luwuno wita Edomi mpetenunu ndi Daudi. Ondae i Ue moweeakono ponangia ndi Daudi isuamo koa ilako.

Mia anu hinao potorono a poparentaano i Daudi

18:14-17

(2Sam. 8:15-18; 20:23-26)

14Kanandiomo i Daudi moparenta a luwudo to Isaraeli. Iteahakono moleoa ka menteea a luwuno tongkuno. 15I Yoabi anano i Seruya, gagi tadulako; i Yosapa anano i Ahiludi gagi puu pompekaria arataa; 16i Sadoki anano i Ahitubi ka i Ahimele anano i Abiata gagi sando mpesomba a pomparentaa; i Sausa gagi puu mpoburi a pomparentaa; 17i Benaya anano i Yoyada gagi tadulakodo to Kereti ka to Peleti. Luwuno ana ntamano i Daudi, ondaemo mia anu tedoa pinerorohi i horido mokole.

Currently Selected:

1 Tawarika 18: XMZ

Highlight

Copy

Compare