Oroma 9
9
At Ala en Iserali menda miginipigi wene
1-3An ninis unggul Iserali menda nowa-nasin ako, Keretus inim ogorek dugwit hambugu saoen, “Enavoloma Ala en anat vudilogo baniluk Keretus inim ogorogo banupwak ai,” yiluk, nendawi mondok burup iri dugwit, enabwa en yup yasiga. An Keretus nendawima agirik atma, huluk yukheraligadek. Averiniki en yuknugu hegek yukheraliga atma, avyarat yukheraliga. 4It Iserali menda ako Ala en miginipu lagagirik, At aburi dogopwak yiluk, wogonipu, At siyalek agarik ako vok yupwak yiluk inugirigya, hivis ogarup wene mondok nggatuk erogo yugirigya, wene, “Yerogo ogarup, nderogo ogarup,” Musa wene dirup warek ako wogirigya, Ala inis siyabagu dugwit, ogagu dogop wene ako mamulirigya, “Yerogo ogarisogon, nderogo ogarisogon,” yiluk, wene avok yugirigya, ogagagi. 5It enombawi andi, Averakam inim, Isak inim, Yakup inim, atma, it vaga enombao Keretus ako avakwa wane-wane-at endaklagagi. Yi menda ndi menda ovok erogo sovalek hegek At mondok siyalek agarik At eyave Ala atma, “Wa,” yiluk, mondok-mondok At inis siyabagek adigat ogagu dogosogom o. Amin!
6It avakwa Iserali menda endaklagagwa ako ovok erogo Iserali menda dek. “Iserali menda dek,” yukheraliga andi, “Ala en Averakam avok yugogogi ako, dek agagi o,” yiluk, an yukheraligadek. 7#Kejadian 21:12 yokhanes. Eke, ambi, At Ala en Averakam yugugu dugwit, “Hat Averakam hombawi andi, at Isak aburi endago vaga adigat, ‘Hombawi,’ yugu dogosogom,” yiluk, wene yugogogi vaga it Averakam ombawi nin andi, avyarat Ala aburi degat inigup. 8-9#Kejadian 18:10 yokhanes. Ala en at Averakam ako yugugu dugwit, “‘Tahun ambi okbaluk, hadema warisogon,’ yagas ako wane-wane ari wagya halok, warisogon atma, at Sara eyak ap-at endarisogon o,” yiluk, yugogogi. Wene avok yugogogi andi vaga Ala aburi ako andi, Averakam eve ombawi endago menda dek. Ata, Averakam avok yugogogi ako vaga endago halok adigat, “Averakam avyarat ombawi it aro,” yiluk, yugogogi helagwi.
10Ako adigat dek. Ata, at hwa Irivika inim yugogogi. Hwa Irivika eyagi embetlabwa endaginipigi ako andi, enasin ambiat nenombao Isak akoat. 11-12#Kejadian 25:23 yokhanes. Enasin ambiat ovara, “At Ala en it ogagagwa vaga dek. Ata, At adik endawi en wenggebaluk, ambi wigya, ambi hekbagya, ogasiga,” umbutu dogopwak yiluk, it avyak ako ao endaklagatek, eke, weyak ogarup sek ogarup ao inunggut inigik, Ala en hwa Irivika yugogogi. Yugugu dugwit, “Heyagi endaginivisogon ako owa en aot avema dugwit ayeloman-at dogosogon o,” yiluk, yugogogi. 13#Maleakhi 1:2-3 yokhanes. At yugogogi andi, Ala wene ambi iri dugwit, “At Yakup nendawi hunik ogagya, eke, Esau andi, nanggon imbita, ogagagis,” yiluk, dirup warek ako wane-wane-at ogagagi helagwi.
14Anderogo ogagagi halok, nit nggarogo yuk ombasagwi? “At Ala atma nggedok ogasigadek ugun adigat ogasiga,” yuk, ombasagwi? Anderogo mondok dek. 15#Keluaran 33:19 yokhanes. Ala en Musa yugugu dugwit:
“Anen avakwa naigwak aberen hekbisaup imbita neyalok, hekbugu,
eke, enabwa en okbisaup imbita neyalok, sek okbugu,
ogasiga o,”
yiluk, yugogogi halok, yukheraliga.
16Anderogo atma, At Ala en ambi nggarogo okbininami, nit avakwa en, “Okbininapwak,” umbutwi, eke, “Oknenavupwak yiluk, ambi okhedayogon o,” yiluk, yugwi, ogasagwi ako vaga okbininaligadek. Ata, At Ala endawi imbita dugwit, At aigwak aberen sek okbininggya helagwi.
17 #
Keluaran 9:16 yokhanes. At Ala en ap inis ombok Viraon ako yugugu dugwit, “Hat mondok okbagagigis ako vaga nanye wisane hugwi, eke, An ninis inilup akluk, yi awi ndi awi yugeregek lagwi, ogagu dogopwak yiluk, hat mondok okbagagigis o,” yiluk, yugogogi dirup warek ako agarik atma, 18At Ala en ap ambi aigwak aberen sek okbayogon imbita halok, sek okbagya, eke, ambi endawi anye erogo bayogon imbita halok, endawi anye erogo bagya, ogagya helagwi atma, yiluk, yukheraliga.
Ala aninis en initu, eke, sek okbugu, ogasiga wene
19Ala anderogo ogasiga atma, hit ambi en, “Andi halok, nit weyak ogasagwi adem Ala atma, Ala en ‘Hit weyak ogagep o,’ yiluk, nggarogonggan en nit yukneneraup ombasagwi? Eke, Ala endawi imbita dugwit ogasiga hegek, nit adik hunogo ambi ogarup mondok meyan,” yiluk, yuknugu hinigis atma, 20#Yesaya 29:16; 45:9 yokhanes. avyak! Hit andi sa umbutu dugwit yagalagwi? Wene onggo Ala yugurup sek yiluk yagalagwi? Yi menda ndi menda ogarek en At werek ogasiga menda ako yugugu dugwit, “Hat neyave nggarogonggan en baninggigin yiluk?” yugurup sek ombasagwi? 21Sogolowak mendarisiga menda akoen endawi imbita dugwit, wen nggabok ambi menda at wigya lagarik sogolowak ambi iya erogo ogagek yup yiluk mendagya, eke, ambi ugun ogagek yup yiluk, mendagya, ogasiga ako, aren adigat endawi wenggebaluk, ogagya dogop andi, meyan atma yiluk, yagalagwi?
22Ala anderogoat endawi imbita dugwit ogasiga atma, Aren iri dugwit, “Naninis okbugu, eke nanye vaga ogarit lagya, ogagya neyapwak,” yiluk, it avakwa nin At aninis okbugu dugwit, eneyave degerogo bisaup ombasiga. Avakwa nin anderogo degerogo bisaup ombasiga ovara, dugwit, Aren endawi mondok hora yiluk hekbugu dogop wenggelisiga halok andi, Arenat. 23Eke, nenabwa en hekbininggu dugwit, ninim siyalek dogop yiluk denogo bininggigi ako At mondok sek siyalek dugwit, wisane erogo sek okbininggik adigat ogasiga ninilup arugen yiluk, endawi mondok dibaluk okbininggu dogop wenggelisiga halok andi ogo, Arenenat. 24Ninim siyalek dogop yiluk denogo bininggigi ako andi, nit aro. Nit Yakuri menda adigat dek. Ata, it weram Yakuri dek menda ninimat neneyanggup yukneragagi. 25#Hosea 2:23 yokhanes. Anderogo wane-wane, At Ala en at navi Hosea yugugu hegek, aren avakwa yugirigya dugwit:
“It An naburi dek ovara, ‘Naburi-at,’ yugirigya,
eke, at An nendawi hunik dek menda-at ovara, ‘Hat An nendawi hunigat,’ yugugu,
ogagya dogogwis o.”
26 #
Hosea 1:10 yokhanes. Eke, ambi iri dugwit:
“‘Hit An naburi dek aro,’ yiluk, yugeragagirikmu akoma,
‘It An niluk agirik Ala naburi aro,’ yiluk, yugeragwis o,”
yiluk, dirup watigi ako wane-wane, it weram Yakuri dek menda ninimat denogo bininggigi atma yiluk, yagagi helagwi.
27At navi Yesaya en it avakwa Iserali menda enavok iri dugwit:
“It avakwa Iserali menda eneyave is yinggi leyalek agarik hak agarwik ovara,
eneyave ambukumat nin agako higirek enagap wendarisogon.
28 #
Yesaya 10:22-23 yokhanes. It avakwa wen vaga yoma agarwik degerogo bisaup ombasiga ako,
At Nenasin en mbikit supuk erogo mondok degerogo enasogon atma,”
yiluk, yagagi.
29 #
Yesaya 1:9 yokhanes. At Yesaya en endak ambi iri dugwit:
“At Anye Adigat Agarik Nasin Ala en nit vaga wigalek nin wibininaup ombaklipuk en,
o Sodom inim, o Nggomora inim, initigi hak, nit ogo anderogo okbininelap o,”
yiluk, yagagi ako andi, nirat yiluk, yagagi helagwi.
It Iserali menda avyarat embetetek halok woginipitek wene
30Andi halok, nit wene adem ngga yuk. It weram Yakuri dek menda ako At Ala en sek ninimbita dugwit wokninivupwak yiluk okhidugu lagetek. It avyarat umbutugwa vaga Ala en sek inimbita dugwit woginipigi ovara, 31it avakwa Iserali menda ako andi, “Nit wene hobalek sek ogarit lendagwi vaga Ala en sek ninimbita dugwit wokninivupwak,” umbutugwa ovara, woginipitek higi. 32Nggarogo yiluk woginipitek ombasagwi? Dek. Avyarat ombasagwi vaga sek ninimbita dugwit wokninivup hegek, “Nit okhedelagwi vaga wokninivisogon,” umbutu dugwit, ogagagwa ovara, woginipitek. It ako suvaga helep inisok himbit initu dugwit, yakhedelagwi hak, ogagagwa. 33#Yesaya 8:14; 28:16 yokhanes. Andi, Ala wene dirup warek ambi vaga, Ala en iri dugwit:
“It avakwa inisogavit denggwes erogo yakhidugu dogopwak yiluk,
Anen helep ambi o Sion vaga bagya neyasogom.
Bagya neyalok, ap ambien endawi helep andi vaga avyarat imbita halok,
anggadi arisogonbuk o,”
yiluk, yagagi dirup warek ako helagwi.
Currently Selected:
Oroma 9: nbq2013
Highlight
Share
Compare
Copy
Want to have your highlights saved across all your devices? Sign up or sign in
