Oroma 6
6
Keretus ninim hambugu lagagumu, niniluk okbininggigi wene
1Anderogo halok, wene adem nggarogo yumwi? Ala nenabwa en eve iya erogo sek okbininggu hasogom yiluk, weyak adigat ogarit lagu dogosogom ombasagwi? 2Mondok dek aro. Nit weyak ogagu lagagup ako avakwa hambisagwi hak anye dek erogo bagagi hegek, nggarogo yiluk nit ambi inim weyak adigat ogarit lagu dogop ombasagwi? 3Keretus Yesus hinim hunik dugwit, ima wombagagup andi hak, At hombagagi ako, “Ninim hunik atma, ninimat hombagagup higi,” yiluk, embetetek dugwit yagalagwi? 4Keretus hambigya lagagimu, wimu belagagwa ako andi, At ninim hunik atma, ima wombagagup ako vaga ninim hambugu lagagumu, wimu binina lagagwa. Eke, niniluk swi menda akluk lagu dogosogom yiluk, At Asin Ala anye wisane agarik ako vaga hambisagwima en At iluk erogo mondok okbagya dugwit, At ninim hunik atma, ninimat mondok okbininggigi.
5At ninim neneyave ambiat hunik dugwit hombagagup atma, At iluk erogo mondok okbagagi ako wane-wane, neneyave At ninim hunik atma, nit anderogoat niniluk erogo mondok okbininayogon. 6Nit weyak avema dugwit, nenendawi endak menda en weyak adigat ogarup okninivisiga ako, ambi inim ogarit laup okninipu haoen, anyedek erogo bapwak yiluk, Keretus ninim yo winik vaga ninitugwa ninilup atma, yukherelagwi. 7Ap iniluk dugwit, weyak avema agarwik ovara, hambugu dugwit andi, weyak avema agarwikbuk visilek agarwik.
8Nit Keretus ninim avyarat hombagagup halok, At ninim niniluk dogosogom avyarat ombasagwi. 9At Keretus hambisagwima en iluk agagirikmu, hivis ambi inim hambisogonbuk. At hambigya dugwit, hambisagwi adem ako anyedek erogo bagagi ako vaga, hivis hambisogonbuk ninilup aro. 10At Keretus hombagagi ako andi, ndugwis ambiat hambigya dugwit, nit weyak ogarup okninivisiga ako, anyedek erogo bagagi atma, At hivis hambisogonbuk. Eke, iluk agagi ako, Ala inim hunik dugwit, iluk agarik.
11Anderogo wane-wane nit ogo, weyak ogarup okninivisiga ako, anyedek erogo bagagi atma, Keretus Yesus ninim hunik dugwit, nit Ala ake-at niniluk agurik, yiluk, umbutu dogosogom. 12Anderogo atma, heneyave hambisagwi menda hegek henendawi en ninggya ako musek lagu dugwit, weyak ogarup adigat okhinivisiga ako, sovalogo bagek ogagu dogones. 13Eke, “Weyak ogarup okninivisiga ako, nininggis ninisok vaga ogarup segaro,” yiluk, ugunat hekbisabuk. Ata, avakwa hambisagwi iniluk erogo mondok okbiselagwi hak, hit anderogoat oklagagupikmu, sek adigat ogarit lagu dogovovok yiluk, heneyave hininggis hinisok inim ovok erogo Ala adigat wogukluk dogones. 14Musa wene ako hit ambi inim ogagu dogop Ala en henombarisigadek. Ata henabwa en onggodek unat sek okbugugu hegek ogasagwi atma, hit yogak weyak avema agipikbuk.
Ala ayeloman dugwit, sek adigat ogagu dogop wene
15Anderogo atma, nggarogo ogaruk? Musa wene ako, nit avema agurikbuk. Ata, Ala nenabwa en unat sek okbininggu hegek ogasagwi atma, nit weyak ogagu dogop sek ombasagwi? Mondok dek. 16Hiren, ap ambi ayeloman aruguluk, at avema sovabetaluk, ane henaruk hunggu dugwit ogagu dogosogon halok, at ayeloman avema menda-at agipik andi hinunggut a? Anderogo wane-wane, weyak ogarup okhinipu halok, sovalogo bagetek ogarit lendagwi vaga, weyak avema dugwit, atok vaga heneyave hambit lendagwi. Ovara, Ala avema sovabetaluk, ane hunggu dugwit, “Ogarusogom,” yiluk ogarit lagu hiniselok andi, atok vaga Ala en “Hit sek o,” yiluk, wokhinipu hagup o. 17Hit endak weyak avema-at welagagup ovara, yogak andi, wene mamulheragagwa ako vaga mondok henendawi ambiat dugwit des erogo wokbaluk, ogarit lendagwi atma, an Paulus en Ala mondok, “Wa,” yiluk, heyaga wasiga. 18Hit weyak avema werekma, Ala en heda visilogo bigigirikmu, At ake sek adigat ogagu dogoguluk, At avema dugwit At ayeloman agipik.
19An wene yi yukheraliga andi, hit avakwa atma, ap en yagalagwi hak wakhegek asin-ayeloman avok yukheraliga. Hit weyak avema dugwit, henendawi ninggya halok, ogagwi, weyak ogarit lagu dogop okhinipu halok, ogagwi, ogagu dugwit, hininggis hinisok ovok erogo idi okhedegetek, “Segat ogarusogom,” embetek nagu lagagup. Embetek nagu lagagup ako wane-wane, yogak Ala ayeloman At ake denek dugwit, weyak ogagetek sek adigat ogarit lagu dogovovok yiluk, hininggis hinisok ovok erogo At Ala adigat wogukluk dogones. 20Hit weyak avema dugwit, sek ogarup andi, embetetek ugun hininggurat welagagup.
21Hit endak weyak ogagu lagagup ako vaga yogak “Nenanggadi ai,” ombasagwi. Eke andi menda weyak ogagu lagagup ako, ogarit lagu dugwit, atok vaga sek ambi ngga okhidugu lagagup? Dek aro. Andi ovok erogo ogarit lagu lagagup vaga hambugu lagagup. 22Eke, yogak andi, hit weyak avema welagagup ako, Ala en heda visilogo bigigu lagagirik, At ayeloman dogovovok yiluk, okbigigi. Andi okbigigi ako vaga At ake denek sek adigat ogarit lagu dugwit, atok vaga hiniluk mondok dogop menda andok arugup. 23Weyak ogasagwi onggo andi, hambisagwi-at ovara, At Ala en onggodek un wokneragagi andi, Nenasin inis ombok Keretus Yesus ninim hunik dugwit, niniluk mondok-mondok dogop andi aro.
Currently Selected:
Oroma 6: nbq2013
Highlight
Share
Compare
Copy
Want to have your highlights saved across all your devices? Sign up or sign in
