Oroma 14
14
Henaswei enavok yugu dogobuk yugeragagi wene
1Ap ambi avyarat ombasiga ovara, endawi ao hoda agetek henanggelekma nunggu wagya halok, hinim dambuli warup segat ovara, at endawi imbita dugwit yagaliga ako vaga wene alelo warubuk, hekbas. 2Ap ambien endawi avyarat imbita dugwit, “Yi menda ndi menda ugun naup segat,” imbita lagarik, naliga ovara, at ambien endawi avyarat ombasiga ako ao hoda agetek atma, “Un erom erom-angga adigat nayogon,” imbita lagarik, naliga. 3At yi menda ndi menda ugun naliga akoen, at un erom erom-angga adigat naliga ako, weyak-weyak yugurubuk. Eke, at erom erom-angga adigat naliga akoen, at ugun naliga ako Ala en, “Ap yi ogo, An nabut-at,” imbita dugwit, yagaliga atma, avok yugu dogobuk. 4Hata sa, ap adik ambi ayeloman hegek, “Hat weyak,” yiluk, yugurup sek ombasiga? Ayeloman sek ogagya halok hekbagya, eke, weyak ogagya halok wibagya, ogasiga ako andi, at asin en adigat ogasiga. Eke, At Nenasin Inis Ombok en yonggat-hitya halok andi, sek ogarisogon atma, ogagya dogosogon-at ombasiga.
5It ninen, “Ndugwis yi vaga ogarup sek, ndugwis andi vaga ogarup moga,” yiluk, yugwi, eke, it ninen, “O ndugurek-ndagarek ugun ogagu dogop sek,” yiluk, yugwi, ogasagwi atma, hit henadik henendawi en, “An yiat ogagya dogosogon,” yiluk, des erogo wenggebaluk, ogagu dogones. 6It ninen, “Ndugwis yi vaga yi ogagek ndi ogagek ogarup moga,” yiluk, yagalagwi ako andi, Nenasin inis ombok arupwak yiluk, yagalagwi atma, andi segat yagalagwi. It ninen, “Yi menda ndi menda ugun nunggu dogop,” ombasagwi ako andi, “Ala wa,” yiluk, nelagwi atma, Nenasin inis siyabagu dugwit, nelagwi. Eke, it erom erom-angga adigat nelagwi ako andi, it ogo, “Ala wa,” yiluk, nelagwi atma, Nenasin inis siyabagu dugwit nelagwi.
7Nit niniluk agurik andi nit nenadik nenake dek, eke, hambisagwi, andi ogo, nit nenadik nenake dek o. 8Ata, niniluk dogop halok andi, Nenasin ake-at agurik, eke, hambup halok ogo, At ake adigat hambisagwi atma, niniluk agurik halok, hambisagwi halok, andi Nenasin angge adigat agurik o. 9It hombagagwa inim, niniluk agurik inim, Nenasin Inis Ombok Arat dogogiluk, At Keretus hambigya lagagirik, iluk akluk mondok yagagi atma, niniluk dogop inim, hambup inim, andi, At ake adigat agurik.
10Nit ovok ndatak nenowak dilisigama akoma en Ala ivaga mendek yusogom atma, hit nggarogo yiluk navok-havok yugwi, nggarogo yiluk henaswei wiyiknom-weyaknom erogo bugwis, ogasagwi? 11#Yesaya 45:23 yokhanes. Ala en iri dugwit:
“It avakwa ovok erogo navema enerambo vaga hora yi wagwi,
it ovok erogo enelagapma en ‘Nenasin Ala Hararo,’ yiluk, vagalogo yuknugwis,
ogagu dogosogom, yiluk,
An niluk agirik Ala en mondok avyarat yukhisiga,”
yiluk, yagagi dirup warek agarik atma, 12nit ovok nenadik-nenadik ogasagwi ako, Ala en, “Vagalogo yukneres o,” yiluk, yuknirigya halok, vagalogo yugurusogom.
Henaswei enarup monggalogo bugu dogop moga wene
13Anderogo atma, nitnirat navok-havok yugu dogop andi moga. Ata, nit ambi ogarusogom vaga nenaswei helep inisok himbit nggwes erogo nggedek wombabugwis, enarup monggalogo bugwis, ogagu saoen yiluk, dibagu dogosogom. 14Yi menda ndi menda andi eragenen moga asigadek, yiluk, an Nenowa Inis Ombok Yesus ninim hunik dugwit, nilup. Ovara, at ambi endawima en, “Andi menda moga. Naup dek o,” yiluk ombasiga halok andi, at adigat andi, nabuk. 15Henaswei en, “Naup dek,” umbutusigik, hit nelagwi vaga enendawi idup erogo bugu hiniselok, henaswe enabwa embetetek dugwit nunggu hiniselagwi. Anderogo atma, henaswei ako andi, Keretus it ogo enake hombagagi atma, hit nelagwi vaga weyak erogo bisaup andi moga.
16-17Nit un yi menda ndi menda nelagwi vaga Ala en dibininiluk avema biniligadek. Ata, Averiniki ninim hunik dugwit, Ala endawi ombasiga menda ogarit nagwis, Ala ninim dambubininggigirikmu, nenendawi ugun seyalek dugwit, ogarit nagwis, eke, nenendawi adenggen dugwit ogarit nagwis, ogagu dogosogom yiluk, avema bininaliga. Anderogo atma, hiren, “Yi sek ogarup,” umbutu dugwit ogarit nagu hinigik, avakwa en, “Andi weyak ogasagwi o,” yiluk, yugu saoen, sek adigat ogarit nagu dogones. 18Keretus ake ogarit nagu dugwit, wene andi, des erogo ogagu hiniselok, Ala en sek hinimbita, eke, it avakwa en ogo, “Segat ogasagwi,” hinumbutwi, ogagu dogosogom.
19Andi halok, avakwa enendawi ambiat dambulik dogopwak yiluk, dambubigik nagwis, eke, avakwa enendawi aik war-wat yugu dogopwak yiluk, okbisilin lagwi, ogarup wene andi menda halok adigat des erogo ogarit lagu dogosogom. 20At Ala en avakwa oginivit landiga ako, yi menda ndi menda nelagwi vaga nadok-hadok ogarubuk, moga. Yi menda ndi menda naup andi, weyak dek naup sek ovara, nelagwi menda vaga henaswei helep inisok himbit nggwes erogo nggedek wombabugu hiniselok, andi weyak atma, naup moga. 21Henaswei helep inisok himbit nggwes erogo nggedek wombabisaguven yiluk, hit wam nunggwi, anggur agas nunggwi, yi menda ndi menda ogasagwi ovogat ogagwi, ogagetek mbauk dogop segaro.
22Wene yukheraliga yi, hit ogagu dogop henendawima sek ombasagwi halok, mbauk erogo Ala ivaga adigat ogagu dogones. Eke, saen “Anderogo ogarup segat,” imbita dugwit ogagya halok, “Weyak ogagi higi,” embetetekma, endawi adenggenat dogosogon o. 23Anderogo ovara, hit saen “Nit avyarat imbito vaga naup segat,” embetetek henendawi mberen dugwit, nunggu hiniselok andi, Ala en, “Hit weyagat ogagep,” henombarisogon. Yi ogagek ndi ogagek ogarit lendagwi ako ovok erogo Ala ovaga vanggabaluk avyarat embetetek dugwit, ogarit nagu hiniselok andi, weyagat ogasagwi.
Currently Selected:
Oroma 14: nbq2013
Highlight
Share
Compare
Copy
Want to have your highlights saved across all your devices? Sign up or sign in
