SIRAK Bindu 3
Bindu 3
Na maningon ihorjahon hubani namatoras
1Anak-anakku, tangihon ma sipasingat ni bapamu,
janah horjahon ma sonai ase maluah hanima.
2Ipagijang Tuhan do bapa i atas anak-anakni,
anjaha ipatoguh do kuasa ni inang iatas ni sidea. (2 Mus. 20:12; 5 Mus. 5:16)
3Barang ise na pasangapkon bapani iampuni do dousa-dousani,
4anjaha ise na patimbulhon inangni dos ma ai pakon halak na patumpuhon arta.
5Barang ise na pasangapkon bapani sai martuah do ibahen anak-anakni,
janah sanggah martonggo, ibogei do ia.
6Barang ise na pamuliahon bapani ganjang ma umurni
anjaha halak na mambalosi Tuhan pasonangkon inangni.
[7Barang ise na marhabiaran bani Tuhan pasangapkon bapani.]
Iidangi do namatorasni songon tuan.
8Pasangap ma bapamu, marhitei hata atap pe pambahenan,
ase pasu-pasuni susur bamu,
9halani pasu-pasu ni bapa patoguhkon rumah tangga ni anak,
tapi bura-bura ni inang mangumpat onjolanni. (1 Mus. 27:27-29)
10Ulang marmegah ni uhur bani tikas ni bapamu,
halani tikas ni bapa seng gabe hasangapon ai bam!
11Hamuliaon ni sahalak roh humbani hasangapon ni bapani,
tapi inang na seng sangap mangkorhon hasamboron hubani niombahni.
12Anakku, urupi ma bapamu bani panorang hatuaonni,
anjaha ulang borit bahen uhurni sadokah goluhni.
13Anggo moru paruhuranni, mangarusi ma namin ho;
gogoh do tongon ho, tapi ulang ma namin iapasi ho ia.
14Idop ni uhur hubani bapa lang tarlupahon,
tapi ietong songon panasapan bani dousa-dousamu.
15Idingat Tuhan do ai sanggah hasunsahanmu
janah imasabkon do dousa-dousamu songon salju na hona milas.
16Ise na seng mansarihon bapani dos ma ai songon sahalak pangapas;
janah jolma na mambahen inangni manggila hona papa ni Tuhan. (Pod. 19:26, 30:17)
Toruh ni uhur
17Anakku, saloseihon ma horjamu marhitei halamlamon,
ase ihaholongi ho lobih songon sahalak paridop ni uhur.
18Lambin gijang hundulanmu, maningon lambin toruh ma namin uhurmu,
ase dapotmu holong i lobei ni Tuhan.
[19Buei do jolma na sangap ampa tarmurmur,
tapi hubani halak na lamlam do Tuhan pabotohkon rusia-rusia-Ni].
20Banggal do hakuasaon ni Tuhan,
janah ipasangap halak na toruh maruhur do Ia.
21Aha na maholtu bamu ulang ipindahi
janah aha na lobih humbani gogohmu ulang pala kahapi.
22Paruhurhon ma aha na dob iparentahkon hu bam,
halani aha na ponop seng urusanmu ai.
23Ulang isampuri sual na lobih humbani horjamu,
halani sagala na lobih humbani pingkiran ni jolma domma ipatalar hu bam.
24Buei do jolma kahou ibahen angan-anganni,
anjaha pandapot na lepak mambahen pelet paretongan ni sidea.
[25Anggo seng adong mata magou ma sinalsal;
anggo seng adong pambotohmu, ulang pamalo-malohon].
26Uhur na hengkeng mangahapkon hasunsahan do bani ujungni
anjaha ise na marosuh bani parmaraan gabe ripas binahenni.
27Uhur na hengkeng mamorsan buei hasunsahan,
halak pardousa manjunjun dousa i atas dousa.
28Hasosakan ni halak na mangenjeng seng boi ipamalum halani suan-suanan
na masambor marurat ibagas dirini.
29Uhur na pentar mamparimbagaskon podah
janah pinggol na mambogei iharosuhkon jolma na pentar.
Idop ni uhur bani na masombuh
30Songon bah mangintopi apuy na gajak,
sonai homa do sibere-bere parohkon panasapan ni dousa-dousa. (Sir. 7:32-36, 29:8-13; 5 Mus. 15:7-11; Tob. 12:9)
31Halak na mambalos habujuron ni uhur mamingkirhon ari na laho roh
anjaha sanggah madabuh dapotsi ma pangunsandean.
Currently Selected:
SIRAK Bindu 3: BTS
Highlight
Copy
Compare
Share
Want to have your highlights saved across all your devices? Sign up or sign in
@ LAI 2007 Indonesian Bible Society (Lembaga Alkitab Indonesia)
@ LAI 2022 Indonesian Bible Society (Lembaga Alkitab Indonesia) DC