रोमियों 4

अब्राहम कौ उदाहरन

1तौ अब हम का कहें कै हमारे सारीरिक पुरखा अब्राहम कूं का मिलौ? 2चौंकि अगर अब्राहम कूं वाके कामन की बजैह ते धरमी ठहरायौ जातै तौ वाके घमन्‍ड करबे की बात हती। पर परमेस्‍वर के सामने बू हकीकत में घमन्‍ड नांय कर सकत। 3#गला 3:6पबित्र सास्त्र का कैहते? “अब्राहम नें परमेस्‍वर पै भरोसा करौ और बू भरोसा वाके काजै धारमिकता गिनौ गयौ।”

4काम करबे बारे कूं मजदूरी देना कोई दान नांय है, बू तौ वाकौ हक है। 5पर अगर कोई आदमी काम करबे की बजाय बा परमेस्‍वर पै भरोसा करतै, जो पापी कूंअऊं धरमी ठहरातै, तौ वाकौ भरोसा ही वाकी धारमिकता कौ कारन बन जातै। 6ऐसेई दाऊद भी बाय धन्य मानतै जाय कामन के आधार के बिना ही परमेस्‍वर धरमी मानतै। दाऊद जब कहतै,

7“धन्य हैं बे जिनके अधर्म मांफ करे गये

और जिनके पापों कूं ढक दयौ गयौ!

8धन्य है बू पुरुस जाके पापन कूं पिरभू ने गिनों नांय हैं!”

9तब का जि धन्यपन केवल बिनई के काजै है जिनकौ खतना भयौ है, या बिनके काजैऊ है जिनकौ खतना नांय भयौ। हाँ, जि बिन पैऊ लागू होतै जिनकौ खतना नांय भयौ चौंकि हमनें कही है अब्राहम कौ भरोसौई वाके काजै धारमिकता गिनौ गयौ। 10तौ जि कब गिनौ गयौ? जब वाकौ खतना है चुकौ हतो या जब बू बिना खतने के हतो। खतना हैबे के बाद नांय पर खतना हैबे ते पहले। 11और फिर एक निसान के रूप में बानें खतना करबायौ। जो बा भरोसा के परिनाम स्‍वरूप धारमिकता की एक छाप हती, जि तब भयौ, जब वाकौ खतना नांय भयौ हतो। ताकि अब्राहम बिन सबकौ पिता बने, जिन्ने बिना खतने के भरोसौ करौ हतो। ताकि बेऊ धरमी गिने जाबें। 12बू बिनकौऊ पिता है जिनकौ खतना भयौ है, जो हमारे पुरखा अब्राहम के बा भरोसे के रस्ता पै चलतै, जापै बू खतना हैबे ते पैहले चलौ हतो।

भरोसा और परमेस्‍वर का वचन

13 # गला 3:29 परमेस्‍वर नें अब्राहम और वाके वंस ते जि बादा करौ हतो कै बे संसार के बारिस होंगे। जि बादा व्‍यबस्था ते नांय मिली पर बा धारमिकता ते मिली हती जो भरोसे के द्वारा पैदा होतै। 14#गला 3:18अगर व्‍यबस्था कूं मानबे बारौ बारिस बन जातै तौ भरोसे कौ कोई अर्थ नांय रैहत और बादा बेकार ठहरतै। 15लोगन द्वारा व्‍यबस्था कौ पालन नांय करबे की बजैह ते परमेस्‍वर कौ क्रोध आते पर जहाँ व्‍यबस्थाई नांय वहाँ व्‍यबस्था कौ तोड़बोई का?

16 # गला 3:7 जामारै परमेस्‍वर कौ बादा भरोसे कौ फल है और ताकि बादा किरपा के आधार पै होय और वाकौ बादा अब्राहम के सबरे वंस के काजै पक्‍कौ होय, न केवल बिनकेई काजै जो व्‍यबस्था कूं मानतै पर बिन सबके काजैऊ जो अब्राहम के समान भरोसौ रखतै। बू हम सबकौ पिता है। 17जैसौ के पबित्र सास्त्र में लिखौ भयौ है, “मैंनें तोय भौत देसन के लोगन कौ पिता बनांयौ।” परमेस्‍वर की नजर में अब्राहम हमारौ पिता है, जा परमेस्‍वर पै बानें भरोसौ करौ है। परमेस्‍वर जो मरे भयेन कूं जीबन देतै और जो बातें हैई नांय, बिनें पुकारकै मौजूदगी में लातै। 18कोई आसा ना हैबे पैऊ अब्राहम नें मन में आसा रखकै भरोसौ करौ। जामारै बू भौत देसन के लोगन कौ पिता बनों, जैसा कै पबित्र सास्त्र में लिखौ भयौ है, “तेरे अनगिनत वंसज होंगे।” 19जि जानते भयेऊ कै वाकी देह सौ साल की बूढ़ी मरियल सी है चुकी है और सारा बांझ है फिरऊ वाकौ भरोसौ कमजोर नांय भयौ। 20और ना अबिसबासी हैके परमेस्‍वर की प्रतिग्‍या पै सन्देह नांय करौ पर भरोसे में मजबूत हैके परमेस्‍वर कूं महिमा करी। 21अब्राहम कूं पूरौ भरोसा हतो कै, परमेस्‍वर ने बाते जो बादा करौ है, बाय पूरौ करबे में बू पूरी तरैह समर्थ है। 22जामारै, “जि भरोसौ वाके काजै धारमिकता गिनौ गयौ।” 23पबित्र सास्त्र कौ जि वचन है कै, “भरोसा वाके काजै धारमिकता गिनौ गयौ,” न केवल अब्राहम काजै है, 24पर हमारे काजैऊ है। परमेस्‍वर हमअऊंऐं जो बामें भरोसे रखतै, धरमी ठहराबेगौ। बानें हमारे पिरभू ईसू कूं मरे भयेन में ते जीबित करौ। 25ईसू हमारे पापन के काजै मारे जाबे कूं पकरबायौ गयौ और हमें धरमी बनाबे के काजै मरे भयेन में ते जीबित करौ गयौ।

Currently Selected:

रोमियों 4: BRAJ

Highlight

Copy

Compare