प्रेरितन के काम 23

1पौलुस ने यहुदी महा सभा कै माऊं टक टकी लगायकै देखौ और कही, “हे मेरे भईयाओ, मैने आज तक परमेस्‍वर के सामने पूरी तरैह ते, सच्‍चे बिबेक ते जीबन बितायौ है।” 2पर हनन्याह महा पुरोहित ने बिन लोग जो वाके जौरे ठाड़े हते उनते कही कै, बे वाके मौंह पै थप्पड़ मारै। 3#मत्‍ती 23:27,28तबई पौलुस ने कही, “अरे सफेदी ते पुती भई भीत, तोपै परमेस्‍वर की मार परैगी। तुम व्‍यबस्था के अनुसार मेरौ न्याय करबे बैठेऔ पर तू मोय व्‍यबस्था के बिरोध में थप्पड़ मारबे काजै आग्‍या देतौ।”

4पर पौलुस के जौरे ठाड़े लोगन नें बाते कही, “परमेस्‍वर के महा पुरोहित कौ अपमान करबे की हिम्मत कैसे है गई?”

5पौलुस ने जबाब दयौ के, “हे मेरे भईयाओ, मोय पतौई नांय के जि महा पुरोहितै। चौंकि सास्त्र में जि लिखी भईए कै, ‘तू अपनी पिरजा के नेता के काजै बुरे बोल मत बोल।’”

6 #प्रेरि 26:5; फिलि 3:5जब पौलुस कूं जि मालूम परि गयी कै, ज्हांपै फरीसी और सदूकी दो गुट हैं तौ बानें महा सभा में पुकार के कही कै, “हे भईयाओ, मैं फरीसी और फरीसियन के बन्स कोऊं। मेरे ऊपर जामारै मुकद्‍दमा चल रयौ है कै मैं जि भरोसौ करतूं कै व्‍यक्‍ति मरबे के बाद जीबित होतै।”

7जब बानें जि बात कही तौ फरीसी और सदूकीन में आपस में झगड़ौ हैबे लगौ और महा सभा में फूट पर गयी। 8#मत्‍ती 22:23; मर 12:18; लूका 20:27चौंकि सदूकी तौ जौं कहते कै, मरे भयेन में ते जीबित हैबौ, सुरग दूत और आतमा हति अई नांय। पर फरीसी इन सब बातन कूं मानते हते। 9तब बड़ौ हल्‍ला मचौ और भौत ते सास्त्रन कूं सिखाबे बारे फरीसी ठाड़े भये और जि कैहकै लड़बे लगे कै, “हमे जा आदमी में कोई बुराई नांय मिली, अगर कोई सुरग दूत या आतमा बाते बोलिऐ तौ जाते काऐ?”

10उनके बढ़त भये बिबाद कूं देखके सेनापती डरप गयौ के, कऊं बे पौलुस के टुकड़ा टुकड़ा नांय करदें। जामारै बानें अपने सैनिकन कूं जि आग्‍या दयी कै, बे बाय छाबनी में लै जाय।

11बाई रात कूं पिरभू ने पौलुस ते कही, “धीरज रख, जैसी तेने येरूसलेम में मेरी गबाही दयी है, बैसी गबाही रोम मेंऊं देनीं है।”

पौलुस कूं मारबे की योजना

12जब अगलौ दिना भयौ, तब मापै कछु यहुदी इकठ्‌ठे भये और उन्‍नें जि सौगन्ध खायी कै, “जब तक पौलुस मार दयौ नांय जाबैगौ तब तक हम न तौ कछू खामिंगे और न कछू पीमिंगे।” 13जा साजिस में चालीस ते जादा लोग सामिल हते। 14बे यहुदी पिरधान पुरोहित और नेतान के जौरे जायके बोलकै, “हमनें जि सौगन्ध खाई है कै, जब तक हम पौलुस कूं मार नांय दिंगे, तब तक अन्‍न पानी गिरहन नांय करिंगे। 15तुम लोग महा सभा की सलाह ते सेनापती कूं जि खबर दें कै, बू पौलुस कूं जा बहाने ते लोगन के जौरे भेजै कै, ‘हम जाके मामले की सही सही जांच करबौ चांहते।’ वाके म्हां पौहचबे ते पैहले, हम बाय मारबे काजै पैहले ते मापै तैयार हैं।”

16पर पौलुस के भान्जे कूं जा साजिस की मालुम पर गयी और बानें छाबनी जाके पौलुस कूं जा बात की खबर पौहचाय दयी।

17तब पौलुस ने सूबेदार कूं अपने जौरे बुलायकै कही कै, “जा लड़का कूं सेनापती के जौरे लै जाबे। जाय सेनापती कूं एक नयी खबर देनीं है।”

18बानें बा लड़का कूं सेनापती के जौरे पौहचाय दयौ और कही कै, “पौलुस ने जा लड़का कूं तुमारे जौरे निबेदन करबे काजै भेजौऐ, जि तुमते कछू कैहबौ चाहतुऐ।”

19तब सेनापती ने वाकौ हात पकरौ और अकेले में लै जायके पूछबे लगौ कै, “बता तोय मोते कौन सी बात कैहनीयें?”

20बानें सेनापती ते कही कै, “यहुदिन की जि साजिसे कै बे पौलुस कूं तुमते जा बहाने तै कै हम सभा में जाके मामले की सही सही जांच करिंगे। 21तुम उनकी बात मत मानियों चौंकि मापै पौलुस कूं मारबे काजै चालीस आदमी जा मौके की थांग में बैठे हैं। बिन्‍नें जि सौगन्ध खाई है कै, ‘जब तक हम पौलुस कूं मार नांय दिंगे तब तक अन्‍न पानी गिरहन नांय करिंगे।’ बस अब तेरे फैसला कौ इन्‍तजार है।”

22तब सेनापती ने बा लड़का ते कही कै, “जा बाते तू काऊ ते मत कहियौ कै मैने सेनापती कूं जि बात बताईये।”

पौलुस की सुरछा

23तब सेनापती ने दो सूबेदार बुलाये और कही कै, “रात के नौ बजे तक केसरिया जायबे काजै दो सौ सैनिक, सत्‍तर घुड़ सबार और दो सौ भालेदार तैयार रहें। 24पौलुस के काजैऊ घोड़े कौ इन्‍तजाम करौ जाबे, जाते बू बाय सही सलामत राजपाल फेलिक्स के जौरे पौहचाय सके।” 25बानें जि लिखकें एक चिठ्‌ठीअऊ दयी।

26“महामहिम राज्‍यपाल फेलिक्स कूं

क्‍लौदियुस लुसियस की ओर ते नमस्‍कार।

27यहुदिन ने जा आदमी कूं पकर लयौ हतो और जे जाय मार डारबौ चांहते, पर मैने अपने सैनिक भेजकें वाकूं छुड़ाय लयौए चौंकि मोय जि मालूम परी के जि एक रोम कौ रैहबे बारौऐ। 28मैं जि जानबौ चाहतौ के जि लोग जापै का दोस लगाय रये हैं जा बजैह ते महा सभा में लै गयौ हतो। 29पर में समझ गयौ कै बे जापै अपनी व्‍यबस्था की बजैह ते दोस लगाय रये हते। बे ऐसे सबाल कर रये हते जिनकौ जापै जौ दोस लगाये जाय रये हते बाते कोई मतलब नांय हतो कै जि बन्दी बनांयबे या मारबे लायक होय। 30मोय जाके मारबे की साजिस की खबर मिल गयी, जामारै अब मैं जाय तुमारे जौरे भेज रयौऊं। मुद्‍दइयों को भी आग्‍या दी, कि तेरे साम्हने बा पर साबित करें।”

31जैसे सिपाइयन कूं आग्‍या दी गई हती, बैसेई पौलुस कूं लैकें रातों रात अन्तिपत्रिस नगर में ले आए। 32दूसरे दिन बे घुड़ सबारन कूं पौलुस के संग जायबे के काजै छोड़कै वाकी के सिपाई छाबनी में लौट आये। 33घुड़ सबारन नें केसरिया में पौहचकै राजपाल कूं चिठ्‌ठी दयी और पौलुस कूं वाके सामने ठाड़ौ करौ।

34बानें चिठ्‌ठी पढ़कै पूछी कै, “जि कौन ते देस कौ रैहबे बारौ है?” 35और जब बू जि जान गयौ कै, जि किलकिया कौऐ, तौ बानें बाते कही, “जब तेरे बिरोधी आमिंगे, तौ मैं तेरौ मुकद्‍दमा करूंगो।” बानें पौलुस कूं हेरोदेस के किला में पहरे में रैहबे की आग्‍या दई।

Currently Selected:

प्रेरितन के काम 23: BRAJ

Highlight

Copy

Compare