रोमापा 6
6
धीक्पागी नाङ छीवा धाङ मास्यीकागी नाङ छे
1धा ॱहाना होराङ घी ॱनाये? थुक्जे फेयेगी क्षीदु होराङक्या धीक्पा साक्ती डोगुले? 2देरे फुक्की मालाक। होराङ नी, धीक्पागी नाङ स्यीछारसा झ्येरी, धा धोराङा होदे नाङदु घाङगी झ्येरी छोवा क्याथुक्कीले? 3याङना होराङ मास्यीका येशुगी थोक्ने, ठी़सो़ लेन्गीन घीरीयाः, खोङगी छीवागी नाङ मुला थी़न्बालाक ॱनेरी खेक्याई ॱमेस्येलाले? 4होझ्येरी होरी ठी़सो़गी थोक्ने, होराङक्या खोङबामुला छीवागी नाङ धी़ठोदु बेवालाक। दे नी यापगी शीजेचेनगी नी़थुगी थोक्ने, मास्यीका छीवाने कुसो़न्पो श्याङगीन च्योक्रे, होराङक्याः छे साबागी नाङ छोवा क्यालास्योक ॱनेरी लाक।
5घीझ्येरी ॱनाना खोङगी छीवाला, होराङक्या खोङमुला च्यीक झ्युङहो़ना, खोङ कुसो़न्पो श्याङगीनगोलाः होराङ खोङमुला ॱङोन्ने च्यीक झ्युङगीलाक। 6धेनी धीक्पागी वाङ होकदु हो़गीन होरी ली़ दे, मेताला ताङये धाङ होराङ धीक्पागी ढेन्योक मीझ्युङयेगी क्षीदु, होरी धीक्पे स्यीकागो खोङमुला ग्याङस्यीङला क्याङबालाक ॱनेरी, होराङ स्येलालाक। 7घीझ्येरी ॱनाना स्यी छासागीनगोला, धीक्पागी वाङने थारपा थोप हो़तालाक। 8धा होराङ मास्यीकामुला स्यीवा हीन्ना, होराङ खोङमुला छोवाः क्यागीलाक ॱनेरी, होराङ यीच्चे झ्यीदालाक। 9घीझ्येरी ॱनाना मास्यीका छीवाने कुसो़न्पो श्याङस्या झ्येरी, खोङ धाब्ले नामा ढोङा मेजेगीलाक धेनी देने ॱहाला छीवागी वाङ खोङ खाला मेतालाक ॱनेरी, होराङ स्येलालाक। 10खोङ ढोङगीनगो नी, धीक्पागी वाङ तोरस्यीक जेयेगी क्षीदु, थेङ च्यीकला ढोङपालाक हीना खोङ छोवा क्यागीनगो नी, को़न्क्षोकगी शीजेगी क्षीदु क्यालालाक। 11देरेराङ झ्येरी खेक्याः धीक्पे वाङ होकदु ॱमेनेला स्यीछारसा, हीना मास्यीका येशु थोक्ने को़न्क्षोकगी शीजेगी क्षीदु सो़न्पो चीघो़।
12होझ्येरी दो़क्षाकगी वाङ होकदु मेडोयेगी क्षीला, धीक्पाला खेक्याई स्यीरी डोये हीन्गीन ली़ला वाङ झ्यीदु ॱमाच्युक। 13राङगी ली़गी येन्लाक च्यीया ङेन्पे लाक्चा च्योक्रे, धीक्पा झ्यीयेला ॱमातेर हीना छीवाने सो़न्पोला ठीक्ती होवा मीक्या च्योक्रे राङला को़न्क्षोकगी डुङदु फी़। धेनी राङगी येन्लाकक्या घीरी, ढाङतेनगी लेगा झ्यीगीन लाक्चा च्योक्रे को़न्क्षोकला फी़। 14धा धीक्पागी खेक्याला वाङ झ्यीगीमालाक घीझ्येरी ॱनाना खेक्या क्षो़ठीमगी वाङ होकदु मेन्दा, थुक्जेगी वाङ होकदु हो़तालाक।
को़न्क्षोकला थुक्ङेवे लेगा झ्यीगीन ढेन्योक
15धा ॱहाना घी? होराङ क्षो़ठीमगी वाङ होकदु मेन्दा हीना थुक्जेगी वाङ होकदु हो़क ॱनेरी, होराङ धीक्पा झ्यीगुलाक से? देरे फुक्की मालाक। 16धा काला चीगीन ढेन्योक च्योक्रे खेक्याई राङला सु चारु पुली, खेक्या होदेगीराङ काला ङेन्गीन ढेन्योक झ्युङालाक ॱनेरी खेक्या ॱमेस्येलाले? खेक्या याङना छीवाला ठीक्कीन धीक्पागी ढेन्योक याङना ढाङतेनला ठीक्कीन, को़न्क्षोकगी काला ङेन्गीन ढेन्योक झ्युङालाक। 17हीना ङा को़न्क्षोकला काटीन्क्षे श्युवाहीन घीझ्येरी ॱनाना खेक्या एम्मा थेङ च्यीक धीक्पागी ढेन्योक झ्युङहो़ना, धान्दा खेक्याला ॱलाप्ला क्षो़ला, खेक्या ॱङीङ तीङने खाला ङेन्गीन झ्युदुक। 18धेनी खेक्याला को़न्क्षोकगी धीक्पाने थारपा जेदी, धा खेक्या ढाङतेनगी ढेन्योक झ्युदुक। 19खेक्याई ॱहाघोयेगी नी़पा क्योवा झ्येरी, ङा खेक्याला मीछेगी ङीन्रेगी पे तो़न्दी ॱनाहीन। खेक्याई थेङमा च्यीक राङला ॱमेचाङा धाङ ॱयोल्ले माङदु-माङदु डोगीन ङेन्पागी ढेन्योक झ्यीयेला तेरकीन च्योक्रे, धा धान्दा राङला धाम्पाला ग्युरयेगी क्षीदु ढाङतेनगी ढेन्योक झ्यीयेला फी़। 20घीझ्येरी ॱनाना खेक्या धीक्पागी वाङ होकदु हो़ताराङ, ढाङतेनगी वाङने थार हो़तालाक। 21धा होदे घाङला झ्येजा धान्दा खेक्या ङोछागीन लेगाक्याने, खेक्याला घी ढेबु राक्सो? होदे लेगाक्याई ढेबु नी छीवा लाक। 22हीना धान्दा खेक्या धीक्पागी वाङने थारपा थोप्ती, को़न्क्षोकगी ढेन्योक झ्युङ हो़तालाक। होझ्येरी दी फेन्थोक नी, खेक्या धाम्पाला ग्युरी हो़तालाक धेनी ढेबुगो थामेपे छेसोक लाक। 23घीझ्येरी ॱनाना धीक्पा झ्यीगीनक्याला थोप्कीन ॱलाज्या नी, छीवा लाक हीना को़न्क्षोकगी रीन्थाङ मेगीन ॱनाङज्यीन नी, होरी चोवो येशु मास्यीकागी नाङ हो़गीन थामेपे छेसोक लाक।
Currently Selected:
रोमापा 6: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
