रोमापा 13
13
श्युङगी पो़न्पोक्याई वाङ होकदु
1मी हो़ले श्युङगी पो़न्पोक्याई वाङ होकदु धेघो़। घीझ्येरी ॱनाना, को़न्क्षोकने को़का माना श्येम्मा वाङ च्यीया मेतालाक। धेनी पो़न्पो हो़गीनक्या को़न्क्षोकने को़का लाक। 2होझ्येरी श्युङगी पो़न्पोक्याला ङोलोक झ्यीगीनक्याई, को़न्क्षोकने को़काक्याला ङोलोक झ्यीदालाक धेनी ङोलोक झ्यीगीनक्याई, राङगी खालाराङ छेपा फोक्तु च्युक्वालाक। 3घीझ्येरी ॱनाना श्युङगी पो़न्पोक्याई शाङपो झ्यीगीनक्याला मेन्दा, हीना ङेन्पा झ्यीगीनक्याला जीक्टा कुलालाक। धा ख्यो़ पो़न्पोक्याई जीक्टा होकला धेदो़ मेते? हुरे हीन्ना शाङा हीन्गीनगो झ्यी धेनी ख्यो़ला खुङक्याने तो़टा थोप्कीलाक। 4घीझ्येरी ॱनाना ख्यो़ला फेन्येगी क्षीला, पो़न्पोक्या नी को़न्क्षोकगी श्याप्चीपा लाक। हीना ख्यी़ ङेन्पा झ्यीना जीक्टा झ्यी घीझ्येरी ॱनाना, खी़ राल्डी दो़न्मेदु मेरेलालाक। धेनी ङेन्पा झ्यीगीनक्याई खाला को़न्क्षोकगी ङेपा खेरती हुङगीन खुङक्या नी, को़न्क्षोकगी थुक्ठो़गी श्याप्चीपाक्या लाक। 5होझ्येरी को़न्क्षोकगी ङेपाने थारये च्यीगा मेन्दा, हीना स्येशाङगी क्षीदुवाः ख्यो़ खुङक्याई होकदु धेघो़।
6होझ्येरीयाः ख्यो़ ठा जाङालाक। घीझ्येरी ॱनाना लेगा देक्याई क्षीदुराङ, च्योई ग्युक्कीन श्युङगी पो़न्पोक्या को़न्क्षोकगी श्याप्चीपाक्या लाक। 7धेनी ज्याङ घोये हो़लेगोला ज्योङ। धा ठा ज्याङ घोये हो़ना ठा ज्योङ धेनी छोङठा ज्याङ घोये हो़ना छोङठा ज्योङ धेनी घुस्याप झ्यी घो़गीनला घुस्याप झ्यी धेनी ची घो़गीनला ची।
झाम्पा नाङ धो़क
8च्यीकगी च्यीकला झाम्पा झ्यीये माना, श्येम्मा दो़न घीन्गीयाः भुलीङ होकला छी़दी माधे। घीझ्येरी ॱनाना राङगी खीम्चेला, झाम्पा झ्यीगीनगी़ क्षो़ठीमगो डुपालाक। 9“ख्यो़ लोक्येम माझ्यी धेनी ख्यो़ ॱरोक ॱमाचे धेनी ख्यो़ कुमा ॱमाकु धेनी ख्यो़ ॱहाम्बा माझ्यी।”#लेकस्ये २०:१३-१५,१७; काठीम ५:१७-१९,२१ दे काक्या माना श्येम्मा का हो़गीन घीरी, “ख्यी़ राङगी खीम्चेला राङला च्योक्रे झाम्पा झ्यी।”#लेवी १९:१८ ॱनागीन का दी नाङला छी़दालाक। 10झाम्पागी खीम्चेला ॱनो़ ॱमेक्यालालाक। होझ्येरी झाम्पा झ्यीये नी, क्षो़ठीम डुप्ये लाक।
11देक्या माना धान्दागी धी़ दे घारे हो़गीनगो, खेक्याला स्येये हो़तालाक। धा ॱङी छेयेगी धी़चो़गो ॱलेप्सादुक घीझ्येरी ॱनाना होरी गोमा धेपा झ्येजानेः, धान्दा होरी थारपागो धोराङा ङ्येरु ॱलेप्दुक। 12धा छेन जोक्टो दुक धेनी ङीनगो ॱलेप्सादुक। होझ्येरी मी़नाक्पागी लेगा भोरती, होराङ हो़गी गोठापक्या घो़न्घो। 13ङीङमो च्योक्रे होराङ चो़पा शाङपो झ्यीघो़। चो़पा मेगीन श्युक्टाक्या धाङ शीये धाङ लोक्येम धाङ दो़छाक धाङ ठुक्पा धाङ ठादोक झ्यीये मालाक। 14हीना खेक्या चोवो येशु मास्यीकागी गोठापक्या घो़न, धेनी धीक्पे राङश्यीगी दो़छाकक्या डुप्येगी साम्लो ॱमाताङ।
Currently Selected:
रोमापा 13: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
