रोमापा 11
11
ईस्राएल्पा मी ल्हाक्माक्याई कोर
1धा ॱहाना ङा ढीलाहीन, “को़न्क्षोकगी राङगी मीक्याला पाङा जेपालाक से?” चावाने माजेदुक। घीझ्येरी ॱनाना ङाः आब्राहामगी भुग्यु धाङ बेन्यामीनगी री़वागी ईस्राएल्पा च्यीक हीन। 2को़न्क्षोकगी एम्माने खेन्दा जेजा, राङगी मीक्याला पाङा माजे हो़तालाक। सुङरापला एलीयागी कोरला देरे सुङगीनगो, खेक्याला स्येये मेताले? खोङगी ईस्राएलगी कोरला, को़न्क्षोकमुला दुकेक ग्याप्ती देरे श्यी़वालाक, 3“चोवो ला, खुङक्याई खेराङगी ॱङो़नस्येखेनक्या सेजुङ धेनी खेराङगी क्षो़ठीक्या खुङक्याई स्यीक्जुङ। धा ङा च्यीका ल्हाक्हो़क धेनी खुङक्या ङालाः सेये थापस्यी चाली।”#१ ग्यावु १९:१०,१४ 4हीना को़न्क्षोकगी खोला लेन घी सुवाले? खोङबागी देरे सुवालाक, “ङी ङारी दो़न्दु ल्हा बाआलला क्षाक ॱमाक्षागीन, मी तोङ धी़न श्याक्हो़क।”#१ ग्यावु १९:१८ 5देरेराङ झ्येरी धान्दागी धी़ देला थुक्जेगी थोक्ने, दाम्दा ईस्राएल्पा रीङगा ल्हाक हो़तालाक। 6धा दे थुक्जेगी थोक्ने हीन्ना, मीगी लेगाला राली़दी झ्युवामालाक। देरे हीन्ना थुक्जेगो नी, थुक्जे ॱङोन्ने मालाक।
7धा ॱहाना घी? ईस्राएल्पाक्याई घी चागीनगो ॱमाङेबालाक। हीना खुङक्याने दाम्दाक्याला होदे ॱङेपालाक धेनी श्येम्माक्याई सेम ग्योङा जेपालाक। 8सुङरापला देरे ढीक हो़तालाक,
“को़न्क्षोकगी खुङक्याला ॱहाराङ घो ॱमीथुप्कीन सेम धाङ
थोङ ॱमीथुप्कीन ॱमीक धाङ,
ङेन ॱमीथुप्कीन आमच्योक ॱनाङा जेपालाक।
धेनी धान्दागी ङीमा थुक्पे देरेराङ ॱने हो़तालाक।”#काठीम २९:४; यस्याया २९:१९
9धेनी ग्यावु दावीदगी देरे सुङालाक,
“खुङक्याई डो़नगो ॱली़टे धाङ ॱङीपला ग्युरास्योक,
खुङक्याई क्षीदु काक्दो धाङ ङेन्पागी लेन झ्युङास्योक।
10खुङक्याई ॱमेथोङये क्षीदु खुङक्याई ॱमीक डीप्पास्योक,
धेनी खुङक्याई केपा च्योई घु-घुला ग्युरास्योक।”#सुङगुर ६९:२२,२३
याहुदापा मेन्गीनक्याला थारपा
11होझ्येरी ङा ढीलाहीन, ईस्राएल्पाक्या नामा लाङये मेगीन झ्येरी गेवालाक से? देरे चावाने मालाक। ॱयोल्ले ईस्राएल्पाक्याई धीक्पागी झ्येरी, याहुदापा मेन्गीनक्याला थारपा थोप हो़तालाक। दे नी ईस्राएल्पाक्याला ठादोक लाङदु च्युक्येगी क्षीला लाक। 12धा ईस्राएल्पाक्याई धीक्पागो, जीक्तेनगी क्षीदु झ्यीलाप क्षे धाङ खुङक्या फाम्गीनगो याहुदापा मेन्गीनक्याई क्षीदु झ्यीलाप क्षे झ्युङहो़ना, खुङक्याई ढाङगा छाङगोराङ को़न्क्षोकगी थारपाला छी़नाः, ॱयोल्ले घाजो़ क्षे झ्यीलाप झ्युङी हो़टु।
13धा ङा खे याहुदापा मेन्गीनक्याला देक्या ॱनाहीन। याहुदापा मेन्गीनक्याई क्षीदु ङा कुछाप च्यीक झ्येरी, ङा ङारी श्याप्चीला थोङक्षे चीलीहो़क। 14देरे झ्यीगीनगी ङी रेवा नी, ङाराङगी याहुदापा मीरीकक्याला ठादोक लाङदु च्युक्ये धाङ खुङक्याने रीङगाला क्योप थुक्ये लाक। 15घीझ्येरी ॱनाना खुङक्याई पाङपागो, जीक्तेनगी मी घीरी को़न्क्षोकमुला दुम्ये झ्युङहो़ना, खुङक्याला खेलेन झ्यीना ॱयोल्ले ॱहाङसागीन झ्युङगीलाक। दे नी, स्यीम्बुक्या सो़न्पो झ्युङगीन च्योक्रे झ्युङगीलाक।
16भाक्पे री़राने पुपा फी़गो धाम्पा हो़ना, भाक्पे री़रा घीरी धाम्पा हुङालाक।#ढाङगा १५:१७-२१ धेनी चावागो धाम्पा हो़ना, याक्काक्या धाम्पा हुङालाक। 17धा क्युरुस्यीङ शाङागी याक्का रीङगा चेदी, रीगागी क्युरुस्यीङ दोङबोगी याक्काक्या होदे दोङबो शाङागोला थी़दी श्याक्ना, होदेक्याला होदे दोङबो शाङागी चावाने ची़ शाङागो थोबालाक। 18होझ्येरी होदे चेदी श्याक्सा याक्का हीन्गीन ईस्राएल्पाक्याई दोङदु, खे रीगागी दोङबो च्योक्रे हीन्गीन याहुदापा मेन्गीनक्या राङतो़ माझ्यी। राङतो़ झ्यीना, ख्यी़ चावागोला ॱमीखुरा, हीना चावागी ख्यो़ला खुरालाक ॱनेरी ढेन्सो झ्यी।
19धेनी ख्यी़ देरे ॱनागीलाक, “ङा होदे दोङबोमुला थी़येगी क्षीला याक्काक्या च्येपालाक।” 20दे धेन्पा लाक। खुङक्याई धेपा माझ्येवा खुङक्या च्येपालाक। हीना खेक्याई धेपा झ्येरी खेक्या ॱने हो़तालाक। होझ्येरी राङतो़ माझ्यी हीना जीक्नाङ झ्यी। 21घीझ्येरी ॱनाना को़न्क्षोकगी याक्का ॱङोमाक्याला ॱलो़ ताङा माजे हो़ना, खेक्यालाः ॱलो़ ताङा जेगीमालाक। 22होझ्येरी को़न्क्षोकगी ॱङीङजे धाङ चुवाला दो़नाङ झ्यी। काला मेङेन्गीनक्याला खोङ चुवा जेदालाक हीना खोङगी ॱङीङजेला मी़थुने ॱलो काना, खोङगी खेक्याला ॱङीङजे जेदालाक। देरे मेन्ना खेक्यालाः चेदा जेगीलाक। 23धेनी ईस्राएल्पाक्याः राङगी धेपा मेगीनला ॱनेती मेधेना, को़न्क्षोकगी खुङक्याला थी़ जेगीलाक घीझ्येरी ॱनाना खुङक्याला धाब्ले दोङबोला थी़येगी वाङ खोङला हो़तालाक। 24खेक्या राङश्यीगी रीगी क्युरुस्यीङ दोङबो झ्येरीयाः, चेदी राङ झ्युजा क्युरुस्यीङ दोङबो शाङाला थी़ हो़ना, ॱङोमा हीन्गीन याक्कागो राङगी क्युरुस्यीङगी दोङबोला देले ल्हाक थी़गीलाक।
ईस्राएल्पा घीरीगी थारपा
25पी़नक्याओ, खेक्या राङला खेवा ॱमीचीयेगी क्षीला, खेक्याई साङवा दे स्येलास्योक ॱनेरी, ङा दो़दीहो़क। याहुदापा मेन्गीनक्या छाङबो को़न्क्षोकगी डुङदु माहुङगीन थुक्पे, ईस्राएल्पा रीङगाक्याई सेम ग्योङा झ्युङ हो़तालाक। 26धेनी देरे झ्येरी ईस्राएल्पा घीरीला थारपा थोप्कीलाक। सुङरापला देरे ढीक हो़तालाक,
“क्याम्गो़न नी सीयोनने फेप्कीलाक,
खोङगी याकोबने लेङेन घीरी मेताला जेगीलाक।
27धेनी खुङक्याई धीक्पा सेल्दाराङ,
खुङक्याईमुला ङी धाम्चागो दे लाक।”#यस्याया ५९:२०,२१;२७:९; येरेमीया ३१:३३,३४
28ताम्शाङगी छा श्याक्ती ॱनाना, ईस्राएल्पा रीङगा खेक्याई क्षीदु को़न्क्षोकगी डा लाक हीना खुङक्याई धाङबी फामाक्याई झ्येरी, को़न्क्षोकगी दामा जेजागोला छा श्याक्ना, खुङक्या को़न्क्षोकगी चेवेक्या लाक। 29घीझ्येरी ॱनाना को़न्क्षोकगी ॱनाङज्यीन धाङ भो़ जेगीनला ग्युरये मेतालाक। 30एम्मा थेङ च्यीक खेक्याः को़न्क्षोकगी काला मेङेन्गीन हो़तालाक हीना ईस्राएल्पाक्याई को़न्क्षोकगी काला माङेन्गीन केनगी, धान्दा खेक्याला ॱङीङजे थोप्था च्योक्रे, 31खेक्याला थोप्था थुक्जेगो खुङक्याला धान्दा थोप्टु ॱनेरी, धान्दा खुङक्याः काला मेङेन्गीन झ्युङदुक। 32घीझ्येरी ॱनाना मी घीरीला थुक्जे ॱनाङयेगी क्षीला, को़न्क्षोकगी घीरीला काला मेङेन्गीन चो़न्पा च्योक्रेराङ श्याक जेपालाक।
तो़लु
33आहा! को़न्क्षोकगी नोर धाङ स्येराप धाङ स्येयो़न घीन्गी तीङ रीङा।
खोङगी ठीम्चो़ ढेस्ये ग्याप ॱमीथुप्कीन,
धाङ खोङगी लाम ॱहाघो ॱमीथुप्कीन दुक।
34“चोवोगी थुकोङ सी़ स्ये हो़तालाक से?
खोङला सी़ ढो़ तो़न थुप हो़तालाक से?”#यस्याया ४०:१३
35“खोङगी मीला छाप ॱनाङ घोगीन,
खोङला सी़ पु हो़तालाक से?”#आयोब ४१:११
36घीझ्येरी ॱनाना घीरी खोङगी को़वालाक। धेनी घीरी खोङगी थोक्ने खोङगी क्षीला झ्युवालाक।
खोङला शीजे ग्युने ग्युन्दु हुङवास्योक।
आमेन।
Currently Selected:
रोमापा 11: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
