जेपा 23
23
1पाउलुगी छोक्दी़गी स्योकला स्यारी तेरी ॱनेवालाक, “पी़नक्याओ, धान्दा थुक्पे को़न्क्षोकगी दोङदु, ङी स्येशाङ चाङमागी गोने मीजी पीहो़क।” 2दे ॱनागीनगो ॱहाघोरती चो क्षो़पो़न आनानीयागी, पाउलुगी भोलोक्तु हो़गीनक्याला खी़ खाला श्युरये का तेरपालाक।
3हीना पाउलुगी आनानीयाला ॱनेवालाक, “ये शोक्पोक्याओ, को़न्क्षोकगी खेक्याला दुङगीलाक। खेक्या मोशेगी क्षो़ठीमने, ङी ठीम चेयेला होदुरु धेदीयाः क्षो़ठीमला ॱमीथी़न्दा, ङाला दुङये का घीझ्येरी ॱनाङाले?”
4पाउलु भोलोक्तु हो़गीनक्याई ॱनेवालाक, “ख्यो़ को़न्क्षोकगी चो क्षो़पो़नलाः ॱमेटा पावाले?”
5धेनी पाउलुगी ॱनेवालाक, “पी़नक्याओ, खोङबाराङ चो क्षो़पो़न लाक ॱनेरी ङाला स्येयेमेक। ‘राङगी पो़न्पोक्याई कोरला लाब आ ॱमाताङ’ ॱनेरी सुङरापला ढीक हो़तालाक।”
6धा पाउलुगी होदुरु हो़गीन रीङगा, सादुकीपा धाङ रीङगा फारुसीपा हीन्गीनगो ॱहाघोरती केक क्षेला ॱनेवालाक, “पी़नक्याओ, ङा फारुसीपा हीन, फारुसीपागी भीजा हीन। ङी रेवागो छीवाने सो़न्पो लाङगीन लाबला झ्येरी, ङा दुरु ठीम पुयेला लाङाहीन।”
7पाउलुगी दे लाब ॱनालुङ मेताला, फारुसीपा धाङ सादुकीपाक्या खोक्दु धुगा स्योरपालाक धेनी मीक्या छोक ॱङीला खा ढावालाक। 8घीझ्येरी ॱनाना सादुकीपाक्या मी छीवाने सो़न्पो लाङगीन धाङ नाम्खे भाङछेनक्या धाङ सेम्ङीक्याला यीच्चे मीझ्यीदालाक। हीना फारुसीपाक्या देला धेपा झ्यीदालाक। 9होझ्येरी होदुरु ॱमीच्यीकी क्षे फेरा झ्युवालक। धेनी फारुसीपागी खोक्ने क्षो़ठीमगी ॱलोपो़न रीङगा लारी, सादुकीपाक्याला ॱमेटा पाप्ती ॱनेवालाक, “हेक्याई दे मी देगी नोन्डु घीन्दा ॱमेथोङा। दे मीला सेम्ङी याङमेना नाम्खे भाङछेनगी लाब ताङा मेन्डी़?”
10खुङक्याई धुगा ॱमीच्यीकी क्षेरु सोवालाक। धेनी होदुरु पाउलुला दुबु-दुबुला तारी सेगीलाक ॱनेरी, जीक्ती ॱमाक्पो़नगी खोला होदेने ठीक्ती, ॱमाक्खाङदु ठीक्ती डोयेला ॱमाक्मीक्याला का ॱनावालाक।
11होदे घोमुराङ चोवो पाउलुगी डामला फेप्ती सुवालाक, “सेम स्युक्क्षे शो़। दुरु येरुसालेमदु ङी कोरला पाङपो तेरकीन च्योक्रे, रोमदुवा ख्यी़ तेर घोगीलाक।”
पाउलुला सेये ढो़
12ॱङेटो ॱङारोक ॱङात्ती याहुदापाक्या जोम्दी, पाउलुला सेयेगी ढो़ झ्येवालाक धेनी पाउलुला ॱमासेगीन थुक्पे, खुङक्या घीन्दा मेशाये धाङ ॱमीथुङये ॱना क्यावालाक। 13देरे ॱना क्यागीनक्या मी श्यीपच्युने माङा हो़तालाक। 14धेनी खुङक्या श्येम्मा क्षो़पो़न क्षेक्या धाङ गोठीक्या चारु सोरी ॱनेवालाक, “हेक्याई पाउलुला ॱमासेगीन थुक्पे, घीन्दा मेशा ॱनेरी ॱना क्याहो़क। 15होझ्येरी खेराङक्या धाङ छोक्दी़ थी़न्दी, पाउलुगी कोरला धोराङा घामोमा श्यीप्ता झ्यी दोक-दोक झ्यीयेला, खोला होदेने ठीक्ती हुङयेला ॱमाक्पो़नला श्युरोनाङ। धेनी छोक्दी़ला हुङी घाङला, हेक्या खोला लाम्गाला राङ सेये डाढीक झ्येरी धेदुक।”
16हीना होदे याहुदापाक्याई पाउलुला सेये ढो़गो पाउलुगी ईजीगी भीजागी़ ॱहाघोरपालाक धेनी खो ॱमाक्खाङदु सोरी पाउलुला होदे लाब स्येपालाक। 17धेनी पाउलुगी ग्यापो़न च्यीकला केक तारी ॱनेवालाक, “दे ख्योक्तोङला ॱमाक्पो़नचारु ठीक्ती सोङ। खो ॱमाक्पो़नला लाब च्यीक स्येये हो़तालाक।”
18धेनी होदे ग्यापो़नगी खोला ॱमाक्पो़नचारु ठीक्ती ॱनेवालाक, “चो़न्पा पाउलुगी ङाला दे ख्योक्तोङला खेराङचारु ठीक्ती सोङ ॱनेजुङ घीझ्येरी ॱनाना दे ख्योक्तोङगी खेराङला लाब च्यीक श्युये हो़क ॱनी।”
19धेनी ॱमाक्पो़नगी होदे भीजागी लाक्पाने ॱहाला ठीक्ती ढीवालाक, “ङाला घी ॱनाये हेतो, ॱनो़?”
20ख्योक्तोङगी़ ॱनेवालाक, “ॱङेटो याहुदापाक्याई पाउलुगी कोरला धोराङा चाजो़ झ्यी दोक-दोक झ्यीयेला छोक्दी़दु खेराङगी खोला ठीक्ती हुङरोझ्यी ॱनेरी, श्योवा पुरु हुङये ढो़ झ्येदुक। 21हीना खेराङ खुङक्याई खाला माङेन्रोनाङ। घीझ्येरी ॱनाना होदुरु मी श्यीपच्युने माङा पाउलुला सेयेला धेदुक। खुङक्याई खोला ॱमासेगीन थुक्पे, घीन्दा मेशाये धाङ ॱमीथुङये ॱनेरी ॱना क्यादुक। धेनी खुङक्या डाढीक झ्येरी, खेराङगी लो़नला घुक्ती धेदुक।”
22दे घोरती ॱमाक्पो़नगी होदे ख्योक्तोङला, “ख्यी़ ङाला दे लाब ॱनेवी ॱनेरी सुलाः ॱमाना आ।” ॱनेरी होदेने झावालाक।
पाउलुला पो़न्पो फेलीकचारु झावा
23होदे स्याम्ने ॱमाक्पो़नगी ॱमाक्मी ॱङीला केक तारी का ॱनावालाक, “केसारयारु धीरीङ घोमु छुची घुवाला डोयेला ॱमाक्मी ङीग्या धाङ ताला श्यो़न्गीन ॱमाक्मी धी़न्चु धाङ दुङ खेरकीन ॱमाक्मी ङीग्या डाढीक झ्यी। 24धेनी पाउलुला श्यो़न्ये ताक्या डाढीक झ्यी धेनी खोला पो़न्पो फेलीकचारु घीन्दा क्यो़न माझ्यीदा ठीक्ती सोङ।” 25धेनी खी़ पो़न्पोला देरे यीक च्यीक ढीक्ती कुरपालाक,
26“पो़न्पो फेलीक ला, ङा कालोदेहु लुसीयाने क्षाक पुलो। 27पाउलु ॱनागीन मी देला, याहुदापाक्याई सेयेला शीम्दुक हीना दे रोमगी मी लाक ॱनेरी, ङी ॱहाघोरती ङी ॱमाक्मीक्या ठीक्ती खोला होदेक्याने ङी क्योप्पी। 28खी़ नोन्डु घी ले ॱनेरी घोरयेला, ङी खोला याहुदापाक्याई छोक्दी़दु ठीक्ती सोवी। 29हीना खोला से घोगीन याङमेना चो़न्खाङला धाक घोगीन लेगा ङेन्पा, खी़ माझ्येदुक ॱनेरी ङी ॱहाघोरजुङ। खी़ क्यो़न्जुकगो खुङक्याई क्षो़ठीमगी ढीवाक्याई कोरला दुक। 30धेनी याहुदापाक्याई खोला सेये ढो़ झ्यीगीनगो ङी ॱहाघोरलुङ मेताला, ङी खोला खेराङचारु झावाहीन। धेनी खोला क्यो़न चुक्कीन मीक्यालाः खेराङ चारुराङ श्योवा पु ॱनेरी ङी का तेरहो़क।”
31धेनी ॱमाक्पो़नगी का ॱनाङगीन च्योक्रे ॱमाक्मीक्याई पाउलुला, होदे घोमुराङ ठीक्ती आन्तीपातीरीस ग्याजारु ॱलेप्पालाक। 32ॱङेटोगो ॱमाक्मीक्यागो पाउलुला, ताला श्यो़न्गीन ॱमाक्मीक्याई लागाला ची ग्याप्ती, खोराङक्या येरुसालेमला लोक्पालाक। 33धेनी ताला श्यो़न्गीन ॱमाक्मीक्याई पाउलुला केसारयारु ठीक्ती, पो़न्पोला यीक तेरती खो ची ग्याप्पालाक। 34होदे यीक ढोक सारती पो़न्पोगी पाउलुला ढीवालाक, “ख्यो़ लुङबा घाने ले?”
धेनी पाउलुगी ॱनेवालाक, “ङा कीलीकीयाने हीन।”
35धेनी पो़न्पोगी ॱनेवालाक, “ख्यो़ला क्यो़न चुक्कीनक्या दुरु ॱलेप्ना धेनी ङा ख्यी़ खाम्जु तायेहीन।” होदे स्याम्ने पो़न्पोगी पाउलुला हेरोदेगी फोडाङदु, खोला ॱरुङगीन श्याक्ती श्योक ॱनेरी का ॱनावालाक।
Currently Selected:
जेपा 23: LOY
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. and Nepal Bible Society
