२ थेसालोनीकेपा 2
2
ठीमने डागीन मीगी कोर
1पी़न्दाक्याओ, होरी चोवो येशु मास्यीका धाब्ले फेप्ये धाङ होराङ खोङबामुला ज्यायेगी कोरला हेक्या श्युवाहीन। 2चोवोगी ङीमा ॱलेप्दुक ॱनेरी ॱनागीन ॱङो़नस्ये धाङ ताम धाङ हीकी स्योकने हीन्ढु ॱनेरी, यीक रे हुङना, लेल्हामोमाला खेक्याई सेम ठुक्ती माजीक। 3सी़ च्यीया खेक्याला घी थोक्ने, गो कोरतु ॱमाच्युक घीझ्येरी ॱनाना धाङपो ङोलोक झ्यीगीन धाङ ठीमने डागीन तोरक्यो़नगी, मी ॱमातो़न्गीन थुक्पे, होदे ङीमा दे हुङगीमालाक। 4मी दी ल्हा ॱनागीन धाङ क्षाक्क्षो़पा पुगीन घीरीला ङोलोक झ्येरी, खोराङ होदे घीरीगी थोकला धेगीलाक। धेनी को़न्क्षोकगी क्षो़खाङ नाङला धेती, राङ-राङला को़न्क्षोक हीन ॱनागीलाक। 5ङा खेक्यामुला हो़ती घाङला, खेक्याला दे ताम घीरीगी कोरला स्येगीनगो, खेक्याला ढेम्पा मीदुई? 6धेनी खोरी धी़चो़ ताक-ताकगोला तो़न्येगी क्षीला, धान्दा घीन्गी काक्ती श्याक हो़तालाक होदे खेक्या स्येलालाक। 7ठीमने डागीनगी साङवा वाङ दे, लेगाला गो चुक्सादुक। धेनी काक्ती श्याक्कीनगोला ॱमाताङगीन थुक्पे, धान्दा खी़ होदेला काक्तीराङ धेगीलाक। 8धेनी ठीमने डागीन मी दे तो़न्गीलाक धेनी चोवो येशुगी राङगी, श्यालगी उपगी खोला सेगीलाक धेनी खोङबा फेप्कीनगी वाङगी खोला मेताला ताङगीलाक।
9ठीमने डागीन मी दे धी़कगी वाङने होरी, शोक्पो ताकक्या धाङ ॱहाङसागीन लेगाक्या 10धाङ थारपा ॱनाङगीन धेन्पाला खेमेलेन्गीन मेताला डुगीनक्याला, लेगा ङेन्पा ॱनाछोकगी गो कोरकीन ॱयो़क्यु झ्यीगीलाक। 11-12चो़लाम ङेन्पाला थेदा झ्येरी, धेन्पाला यीच्चे मीझ्यीगीन घीरीला ठीम थाक चेयेला, को़न्क्षोकगी खुङक्याई शोक्पोगोला यी छेयेला, ठुल्वा क्षे च्यीक ताङ जेगीलाक।
थारपागी क्षीला दाम्बा
13चोवोगी चेवे पी़न्दाक्याओ, खीकी दो़नला हेक्या च्योई को़न्क्षोकला काटीन्क्षे श्यु घोली घीझ्येरी ॱनाना थारपा थोप्येगी क्षीला, को़न्क्षोकगी खेक्याला एम्माने दाम जेपालाक। थारपा दे नी, खेक्याला राप्ने जेगीन धाम्पे थुक्ङी धाङ धेन्पाला यीच्चे झ्यीगीनगी थोक्ने झ्युवालाक। 14होरी चोवो येशु मास्यीकागी शीजे थोप्येला हीकी ताम्शाङगी थोक्ने, को़न्क्षोकगी खेक्याला दो़न देगी क्षीला भो़ जेपालाक। 15होझ्येरी पी़न्दाक्याओ, तेन्पो झ्येरी धो़क धेनी हीकी खाने ॱनेना तामक्या याङमेना ढीक्टा यीक्याने, खेक्याला तेरता ॱलापच्याक्या तेन्पो झ्येरी ॱरुङ। 16धा होराङला चेवा ॱनारी थुक्जेगी थोक्ने, थामेगीन सेमगी धेवा धाङ रेवा शाङपो ॱनाङगीन, चोवो येशु मास्यीका खोङबा धाङ होरी याप को़न्क्षोकगी, 17खेक्याला सेम्सो ॱनाङास्योक धेनी च्योई ले शाङपो झ्यीये धाङ ढाङपो स्येयेला, स्युक ॱनाङास्योक।
© 2023, Wycliffe Bible Translators, Inc. and Nepal Bible Society