တမန်တော် 19
19
ပေါလုဟှာ ဧဖက်ဗြို့ဟှို ရော့‑က်လာကြောန်း
1ကောရိန့်ဗြို့မာ အာပေါလု ရှိနေဟှူ ခီမာ ပေါလုဟှာ ထတ်မာ ဖော်ပြဟှားဟှူ နေရာလေဟှို ရှော့‑က်သွားဘီးန ဧဖက်ဗြို့ဟှို ရော့‑က်လာဟှယ်။ အယ်ဗြို့မာ တဗဲ့တော် တချို့ဟှို တွိဘီး၊ 2သူးနို့ဟှို “နန်းနို့လေဟှာ ယောင်ကြည်သူလေ ဖြစ်လာဂေ့ဟှူ ခီမာ သန့်ရှင်းဟှူဝိညာဉ်တော်ဟှို လတ်ခံဂေ့ဘီးလော” ဆိုဘီး မေးဟှယ်။
အယ်လူလေဟှ “သန့်ရှင်းဟှူဝိညာဉ်တော်ရှိဟှယ် ဆိုဇာဟှို ကျွန်တော့်လေ ကြားဖူးဟှ” ဆိုဘီး ပြောဂေ့ဟှယ်။
3ပေါလုဟှ “အယ်မျိုးဆိုဟှာ နန်းနို့ဟှာ ဖြားမျိုးစား ဗတ္တိဇံဟှို ခံဟှားနူး” ဆိုဘီး မေးဟှယ်။
အယ်လူလေဟှ “ယောဟန်ရဲ့ ဗတ္တိဇံဟှို ခံဟှားဟှယ်” ဆိုဘီး ပ္လန်ဖြေဂေ့ဟှယ်။
4 #
မ ၃.၁၁; မာ ၁.၄,၇,၈; လု ၃.၄,၁၆; ယော ၁.၂၆,၂၇ ပေါလုဟှ “ယောဟန်ရဲ့ ဗတ္တိဇံဟှာ နောန်ဒနဆိုင်ဟှူ ဗတ္တိဇံဖြစ်ဟှယ်။ ယောဟန်ဟှာ သူ့နော့‑က်မာ ကြွလာဟှူ သခင်ဟှို ယောင်ကြည်ရမယ် ဆိုဘီး ဣသရေလလူမျိုးလေဟှို ပြောရစ်ဟှယ်။ အယ်သခင်ဟှာ ယေရှုဘဲ့ ဖြစ်ဟှယ်” ဆိုဘီး ပြောဟှယ်။
5အယ်စကားဟှို ကြားရဟှူ ခီမာ သူးနို့ဟှာ သခင်ယေရှုနာမနှိုက် ဗတ္တိဇံခံဂေ့ဟှယ်။ 6ပေါလုဟှာ သူးနို့ခေါန်းထတ်ဟှို လတ်တန်လိုက်ဟှူ ခီမာ သန့်ရှင်းဟှူဝိညာဉ်တော်ဟှာ သူးနို့ထတ်ဟှို ရော့‑က်လာဟှယ်။ အယ်ဘီးန သူးနို့ဟှာ ထူးဆန်းဟှူ ဘာသာစကားလေဟှို ပြောဂေ့ဘီး ဘုရားသခင်ရဲ့ တရားတော်ဟှိုလည်း ပရောဖက်ပြုဘီး ဟောပြောဂေ့ဟှယ်။ 7သူးနို့ဟှာ အားလောင်းပေါန်း လူဆယ့်နှေ့ယော့‑က်လော့‑က် ရှိဟှယ်။
8ပေါလုဟှာ ဝါလယ်ဇရပ်ထဲဟှို ဝမ်ဟှားဘီး သောင်းလလောင်းလောင်း ရဲရဲရင့်ရင့်ဟှား ဟောပြောဘီး ဘုရားသခင်ရဲ့ နိုင်ငံတော်ကြောန်းဟှို ဆွေးနွီးဘီး လူလေဟှို သွီးဆောန်လေဟှယ်။ 9အယ်ဘေမဲ့ လူတချို့ဟှာ ခေါန်းမာဘီး ယောင်ကြည်ဘဲန လူလေရှေ့မာ သခင်ဘုရားရဲ့ လမ်းစဉ်လေဟှို ကဲ့ရဲ့ဂေ့ဟှယ်။ အယ်ကြောန့် ပေါလုဟှာ တဗဲ့တော်လေဟှို ခေါ်ဘီး အယ်လူလေနားဟှနေ ထွပ်ဟှားဘီးဟှာ တုရန္နုရဲ့ စာသန်ခန်းမမာ နေ့တိုင်း#၁၉.၉ တချို့ မူရင်းလတ်ရေးမူလေမာ မိုးလန်း ၁၁ နာရီ ဟှနေဘီး နေဒန် ၄ နာရီထိ၊ ဆိုဘီး ပေါန်းထဲ့ဟှားဟှယ်။ ဆွေးနွီးဗွဲလေ လောက်ဟှယ်။ 10နှေ့နှစ်လောင်းလောင်း အယ်မျိုးလောက်ဟှူကြောန့် အာရှိပြည်မာနေဟှူ ယုဒလူမျိုးလေန ဟေလသလူမျိုးလေဟှာ သခင်ဘုရားရဲ့ စကားတော်ဟှို ကြားရဂေ့ဟှယ်။
သကေဝရဲ့ သားလေကြောန်း
11ဘုရားသခင်ဟှာ ပေါလုအားဖြင့် ရရာတိုင်း ထူးခြားဟှူ နိမိတ်လတ်ခဏာလေဟှို ပြတော်မူဟှယ်။ 12ပေါလုသောင်းဟှားဟှူ လတ်ကိုင်ပဝါန ခါးဗတ်လေဟှို လူနာလေနားဟှို ယူဆောန်ဟှားဟှူ ခီမာ သူးနို့ဟှာ ရောဂါပျော့‑က်ဟှားဘီး နတ်ဆိုးလေလတ်ဟှနေလည်း လွှတ်ဟှားဂေ့ဟှယ်။ 13နယ်တကာလှည့်ဘီး နတ်ဆိုးလေဟှို နှန်ထုနေဟှူ ယုဒလူတချို့ဟှာ သခင်ယေရှုရဲ့ နာမဟှို သောင်းပြုဘီး နတ်ဆိုးဟှို နှန်ထုဟှို့ ကြိုးစာဂေ့ဟှယ်။ သူးနို့ဟှာ “ပေါလုဟောနေဟှူ ယေရှုရဲ့ နာမန နန့်ဟှို ငါနှန်ထုဟှယ်” ဆိုဘီး နတ်ဆိုးဟှို မိန့်ပေးဂေ့ဟှယ်။ 14အယ်မျိုးလောက်နေဟှူ သူလေဟှာ သာကေဝ နာမယ်ရှိဟှူ ယုဒယဇ်ပုရောဟိတ်ဂီးရဲ့ သားခွန်နစ်ယော့‑က် ဖြစ်ဂေ့ဟှယ်။
15အယ်ဘေမဲ့ နတ်ဆိုးဟှ “ယေရှုဟှို ငါသိဟှယ်။ ပေါလုဟှိုလည်း ငါသိဟှယ်။ အယ်ဘေမဲ့ နန်းနို့ဟှ ဖယ်သူလေနူး” ဆိုဘီး သူးနို့ဟှို မေးလိုက်ဟှယ်။
16အယ်ဘီးန နတ်ဆိုးဝမ်နေဟှူ လူဟှာ သူးနို့ဟှို ပြင်းပြင်းထန်းထန်ဟှား တိုက်ခိုက်ဂေ့ဟှယ်။ သူးနို့ဟှာ ခ္လေးဗ္လန်းဗ္လန်းန၊ ဒန်ရာလေန အီထဲဟှနေ ထွပ်ပ္လေးဂေ့ဟှယ်။ 17အယ်ကြောန်းဟှို ဧဖက်ဗြို့မာနေဟှူ ယုဒလူမျိုးလေန ဟေလသလူမျိုးလေဟှာ ကြားရဂေ့ဟှယ်။ သူးနို့ဟှာ ရရာတိုင်း ကြော့‑က်ဂေ့ဘီးဟှာ သခင်ယေရှုရဲ့ နာမဟှို ချီးမွမ်းဂေ့ဟှယ်။ 18ယောင်ကြည်သူလေဟှာ ရော့‑က်လာဂေ့ဘီး သူးနို့လောက်မိဟှူ ဇာလေဟှို ပွမ့်ပွမ့်လန်းလန်းဟှား ဖော်ပြဘီးဟှာ ဝန်ခံဂေ့ဟှယ်။ 19နတ်ဝိဇ္ဇာတတ်ဟှို သောင်းဟှူလူလေဟှာ သူးနို့ စာစောန်လေဟှို စုစည်းယူလာဘီး လူအားလောင်းရှေ့မာ မီးရှို့ဂေ့ဟှယ်။ အယ်စာစောန်လေရဲ့ တန်ဖိုးဟှို တွပ်ကေ့ဟှူ ခီမာ ငွေဒန်းဂါး#၁၉.၁၉ ငွေဒန်းဂါး၊ လောက်သမား တယော့‑က်ရဲ့ တရစ်လောက်အားခဟှာ ငွေဒန်းဂါးတပ္လား ဖြစ်ဟှယ် (ရှု မ ၂၀.၂)။ ၅၀,၀၀၀ ဖိုးလော့‑က် ရှိဟှယ်။ 20အယ်နည်းလမ်းအားဖြင့် သခင်ဘုရားရဲ့ စကားတော်ဟှာ တဂိုးတော်န#၁၉.၂၀ သခင်ဘုရားရဲ့ စကားတော်ဟှာ တဂိုးတော်န၊ အယ်မျိုးမှုဘဲနေဟှာ သခင်ဘုရားရဲ့ စကားတော်ဟှာ တဂိုးတော်အားဖြင့်။ တိုးပွားဘီး အောန်မြင်လေဟှယ်။
ဧဖက်ဗြို့မာ ပဒိပခ ဖြစ်ဟှူကြောန်း
21အယ်ဇာလေ ဖြစ်ဟှားဘီးန မာကေဒေါနိပြည်န အခါယပြည်ဟှနေဘီး ယေရုရှလင်ဗြို့ဟှို သွားဟှို့တွပ် ဝိညာဉ်တော်အားဖြင့် ပေါလုဟှာ စိဆောင်းဖြတ်လိုက်ဟှယ်။#၁၉.၂၁ ပေါလုဟှာ စိဆောင်းဖြတ်လိုက်ဟှယ်၊ အယ်မျိုးမှုဘဲ့နေဟှာ ဝိညာဉ်တော်ရဲ့ ဦးဆောန်မှုအားဖြင့် ပေါလုဟှာ ဆောင်းဖြတ်လိုက်ဟှယ်။ သူဟှ “အယ်ဗြို့ဟှို ငါသွားဘီးန ရောမဗြို့ဟှိုလည်း သွားမယ်” ဆိုဘီး ပြောဟှယ်။ 22ပေါလုဟှာ သူ့ဟှို စေခံနေဟှူ တိမောသေန ဧရတ္တုလေဟှို မာကေဒေါနိပြည်ဟှို လွှတ်လိုက်ဟှယ်။ သူဟှ အာရှိပြည်မာ ရှစ်ဟှားနေရစ်ဟှယ်။
23အယ်ခီမာ သခင်ဘုရားရဲ့ လမ်းစဉ်ကြောန့် ဧဖက်ဗြို့မာ ဆူပူမှုဂီးတခု ဖြစ်လာဟှယ်။ 24ဒေမေတရိ နာမယ်ရှိဟှူ ငွေပဒေခတ်မားဟှာ အာတေမိနတ်မီးရဲ့ ငွေနတ်ကွန်းငယ်လေ လောက်ရှင်းအားဖြင့် လတ်မှုပညာရှင်လေဟှို ရရာတိုင်း ကပ်ရစေလေဟှယ်။ 25အယ်ကြောန့် သူဟှာ အယ်လောက်ငန်း လောက်နေဟှူ လောက်မားလေနတူးဒူ တခြားလောက်မား လေဟှိုလည်း စုဘီးဟှာ “ငါ့လူလေ၊ အယ်လောက်ငန်းန နို့လေဟှာ ဝမ်ငွေကောန်းနေဟှယ် ဆိုဇာဟှို နန်းနို့လေ သိဂေ့ဟှယ်။ 26ခု နန်းနို့ကိုယ်တိုင် ဗြင်ရ၊ ကြားဟှားဟှူတိုင်း အယ်ပေါလုဟှာ ‘လူလတ်န လောက်ဟှားဟှူ ဘုရားလေဟှာ ဘုရားမှုဟှ’ ဆိုဘီး ဧဖက်ဗြို့န အာရှိပြည် တပြည်လောင်းဟှ လူလေဘောင်ဂီးဟှို သွီးဆောန်ဘီး လမ်းမှားစေဟှယ်။ 27အယ်မှုဟှာ နို့လေရဲ့ လောက်ငန်းဟှို နာမယ်ပျစ်စေမယ် ဆိုဘီး စိုးရိမ်ဇာရှိမျှ မကဘဲန ကီးမြတ်ဟှူ အာတေမိ နတ်ဖုရားမရဲ့ ဗိမာန်ဟှာ ပမာဏပြုဇာ မှေ့ဘဲန အာရှိပြည်န ကမ္ဘာတဝန်းလောင်းမာ ကိုးကွယ်ဟှူ နတ်ဖုရားမရဲ့ ဂေါင်သရေလည်း ပျော့‑က်ကွယ်ဟှားလေ့မယ်” ဆိုဘီး ပြောလေဟှယ်။
28အယ်စကားဟှို ကြားဟှူ လတ်မှုပညာရှင်လေဟှာ ဒေါသထွပ်ဘီးဟှာ “ဧဖက်ဗြို့ရဲ့ အာတေမိ နတ်ဖုရားမဟှာ ကီးမြတ်ဟှယ်” ဆိုဘီး အော်ဂေ့ဟှယ်။ 29တဗြို့လောင်းဟှာ ရရာတိုင်း ရှောက်ရှစ်ခတ်ဟှားဟှယ်။ လူလေဟှာ ပေါလုနတူးဒူ ခရီးသွားဟှူ မာကေဒေါနိပြည်သား ဂါယုန အာရိတ္တာခုလေဟှို ဖမ်းဘီးဟှာ ပွဲခံဟှူ ခန်းမဂီးဟှို ဗြန်းဗြန်ဟှား ဆွဲခေါ်ဟှားဂေ့ဟှယ်။ 30ပေါလုဟှာ သူကိုယ်တိုင်ဘဲ့ လူအောက်ဂီးရှေ့ဟှို သွားရှင်ဘေမဲ့လည်း တဗဲ့တော်လေဟှာ ခွမ့်ပြုဂေ့ဟှ။ 31ပေါလုရဲ့ မိဆွေဖြစ်ဟှူ နယ်အာဏာပိုင် တချို့ဟှလည်း ပွဲခံဟှူ ခန်းမဂီးထဲဟှို ဝမ်ဘဲဟှို့တွပ် သူ့နားဟှို လူလွှတ်ဘီး တောန်းဗန်ဂေ့ဟှယ်။ 32အယ်ခီမာ လူလေဟှာ တယော့‑က်တဘော့‑က် အော်ဘီးဟှာ ရောက်ရောက်သဲသဲ ဖြစ်နေဂေ့ဟှယ်။ လူလေဟှ သူးနို့လေ ဖြားဖြစ်ကြောန့် စုနေဂေ့ဟှယ် ဆိုဇာဟှို သိဂေ့ဟှ။ 33ယုဒလူမျိုးလေဟှာ အာလေဇန္ဒြုဟှို ရှေ့ဟှို ထွပ်ခိုင်းစေဟှယ်။ လူလေတချို့ဟှလည်း အယ်လူဟှာ ခုဖြစ်နေဟှူ ကိစနဆိုင်ဟှယ် ဆိုဘီး ယူဆဂေ့ဟှယ်။ အာလေဇန္ဒြုဟှာ လူအောက်ဂီးဟှို တိတိဟှားနေဟှို့တွပ် လတ်န ချစ်ပြလိုက်ဟှယ်။ အယ်ဘီးဟှာ ဖြေရှင်းဟှူ စကားဟှို ပြောဟှို့တွပ် ကြိုးစားဟှယ်။ 34သူဟှာ ယုဒလူမျိုးဖြစ်ဟှယ် ဆိုဇာဟှို သူးနို့လေ သိဂေ့ဟှူ ခီမာ “ဧဖက်ဗြို့သားလေရဲ့ အာတေမိ နတ်ဖုရားမဟှာ ကီးမြတ်ဟှယ်” ဆိုဘီး နှေ့နာရီလော့‑က်ထိ လူလေဟှာ တသံဒဲ အော်နေဂေ့ဟှယ်။
35နော့‑က်ဆောင်းမာ ဗြို့စာရေးဟှာ လူအောက်ဂီးဟှို တိတိဟှားနေခိုင်းဘီး “ဧဖက်ဗြို့သားလေ၊ ဧဖက်ဗြို့တော်ဟှာ ကီးမြတ်ဟှူ အာတေမိနတ်ဖုရားမရဲ့ ဗိမာန်တော်န ကောန်းဂန်ဘောင်ဟှနေ က္လလာဟှူ ရောက်ထုလေဟှို ထီးသီးစော့‑က်ရှော့‑က်ဟှားဟှူ ဗြို့ဖြစ်ဟှယ် ဆိုဇာဟှို လူတိုင်းသိဂေ့ဟှယ်။ 36အယ်မူဇာဟှို ဖယ်လူလည်း ဂြင်းနိုင်ဟှ။ အယ်ကြောန့် နန်းနို့ဟှာ တိတိဆိဆိနေဂေ့။ စဉ်းစားဘဲန ဖြားဇာလည်း လောက်ဂေ့န။ 37နန်းနို့ဟှာ သူးနို့ဟှို အယ်နေရာဟှို ခေါန်းဆောန်လာဂေ့ဟှယ်။ သူးနို့ဟှာ နို့လေရဲ့ ဗိမာန်တော်ဟှို ဖျစ်ဆီးရှင်းလည်း မှုဟှ။ နို့လေရဲ့ နတ်ဖုရားမဟှိုလည်း ကဲ့ရဲ့ဟှူ စကားလေလည်း ပြောဟှ။ 38ဒေမေတရိန သူ့ပေါန်းပါလေထဲဟှ ယော့‑က်ယော့‑က်ဟှ တရားစွဲမယ် ဆိုဟှာ တရားရောင်းဖွမ့်ဟှူ ရစ်မာဘဲ့ အာဏာပိုင်လေရှိဟှူကြောန့် တရားစွဲနိုင်ဟှယ်။ 39အယ်ဘေမဲ့ နန်းနို့မာ တခြားကိစရှိဟှယ် ဆိုဟှာ တရားဝမ်စည်းဝေးမာ ဆောင်းဖြတ်ရမယ်။ 40အယ်နေ့ဖြစ်ဟှားဟှူ ကိစန ပတ်သတ်ဘီး ခိုင်လောင်ဟှူ ကြောန်းပြချစ် ပေးနိုင်ဘဲဟှူကြောန့် နို့လေဟှာ အယ်ပဒိပခတွပ် တရားစွဲခံရမယ် ဆိုဇာဟှိုဘဲ့ စိုးရိမ်ရဟှယ်။ နို့လေဟှာ အယ်ပဒိပခတွပ် ဖြေရှင်းချစ်ပေးနိုင်ဟှို့ မှုဟှ” ဆိုဘီး ပြောဟှယ်။ 41အယ်မျိုးပြောဘီးန ဗြို့စာရေးဟှာ လူအောက်ဂီးဟှို ပ္လန်ခိုင်းလိုက်ဟှယ်။
Currently Selected:
တမန်တော် 19: NTDWB24
Highlight
Share
Compare
Copy
Want to have your highlights saved across all your devices? Sign up or sign in
© The Word for the World International, 2024.
