Roma 12

Ka tmorip fen ngamone tlarat Ratu Ni mpempeang

12:1-8

1Wangur mir kateman, Ratu nfatutu Ni dalamy ngamone ber kit lo, mpa ktwak desar kof a kmi nema myal monuk mir momorip ber Ratu ma neluk snyompe ber I. Iane farlan mir snyompe ma nmorip ma mfyil a mkyese ber Ratu, la mifsenange dalamy. Farlan kmi myose farane iane feti mlyangun Ratu mlyarat Ni mpempeang. 2Ka kete myose mlyarat tomwatar ma rose kabain yatkar nir wewelmpampane. Nempa ka myinrang ma Ratu nal andaun beberi ber a kmi, nema bise ma nafbweberi mir momorip. Nof mir andaun beberi ne keta mifai Ratu Ni mpempeang, ma mifai nbal ma myose safe ma nangafel. Ma safe-safe ma myose ne namlonry ma nangafel desar na Ratu sounlury.

3Ratu nfatutu Ni dalamy ngamone ber yakw lo, ma nfil yakw ma kweluk Ni mangsiduk. Mpa kswurat mpane kmi: ka kete mdyaun a mlyengan nof fakoran ma Ratu nal ber a kmi. Nempa ka mdyaun mir momorip mlyarat fakoran ma Ratu nal ber a kmi fali milele Yesus ninr Ray Silai ne. 4Contoh farlan teninrar. Teninrar ye lan lese nempa limninrar, emninrar, matninrar, tlingninrar ramin monuk, ma nir karyae to feleles. 5Iane farlan kit ma talele Yesus ninr Ray Silai. Boloka yadin kit nempa kit farlan tene lese fali kit dalminrar lese tor Yesus ninr Ray Silai. Ma boloka kit mpane ninr karyae to feleles nempa ka sa ntulung sa fali tamin tene lese. 6Ratu Ni dalamy ngamone ber kit mpa nal fakoran ber kit mpane e, to feleles. Mpa ka tpaki fakoran ma Ratu nal ber kit a ne fen ngamone. Farlan Ratu nal fakoran ber kit la tafbotin Ni snyurat ber tomwatar, ka tafbotin snyurat a ne tlarat safe ma Ratu nafbotin ber kit ma ka talele botuan feti Ratu ma nal snyurat a ne ber kit. 7Farlan Ratu nal fakoran ber kit la tulung tomwatar e, ka tulung sir fen ngamone. Ma farlan Ratu nal fakoran la taftutu tomwatar e, ka taftutu sir fen ngamone. 8Ma farlan Ratu nal fakoran ber kit la tafkoran tomwat walyetar dalmir, ka tafkoran sir fen botuan. Farlan Ratu nal fakoran ber kit ma tal safe kabain ber tomwatar, ka tal ber sir tor dalminrar kateman. Ma farlan Ratu nal fakoran ber kit ma teluk mangnrure ber tomwat walyetar, ka tnrure sir fen botuan. Ma farlan Ratu nal fakoran ber kit ma tulung tomwat walyetar, ka tulung sir tor dalminrar senange.

Tomwatar ma ralele Yesus ka rmorip e rakamis sir

12:9-21

9Wangur, ka mkyamis tomwatar myor dalmir kateman. Ma ka myebas mir adat yatkar ma dedesar ma myose kabain ngamonar. 10Ka mkyamis tomwat walyetar farlan mkyamis urmir wamir. Ma ka myalang tomwat walyetar nlengan nof kmi a nbali. 11Ka kete msyisrat, nempa ka mngyabo ma mkyarya dedesar ber Ratu. 12Ka dalmir a rsenang fali mifai feti mtyikloi ma milele Ratu. Ma noak ma mtyungan suse ka msyabar ma mibare mir susar a ne, ma ka dedesar ma msyampayang. 13Ka mtyulung Ratu Ni tomwatar na nir perluar. Ma farlan tomwatar rti rakmat a kmi e, ka mlyangun sir na mir dasar myor dalmir senange. 14Ka mtyak Ratu ma nberkat tomwatar ma rtean a kmi ma rose suse kmi a ne. Ma ka mtyak Ratu ma nberkat sir ma kete mingoak sir. 15Farlan tomwatar rampumpuki sir e, ka mimpumpuki kmi myor sir a nbal. Ma farlan tomwatar rtasing e, ka mtyasing myor sir a nbal. 16Ka myorip e, dalmir lese ma andaun lese myor tomwat walyetar. Ka kete mifdas a kmi, ma ka mitbwarin myor tomwatar ma to nir sasaf. Ma kete mdyaun feti mifai safe-safe monuk. 17Ka kete mbyalas yatak ber tomwatar ma rose yatak a kmi. Ma ka dedesar ma myose ngamone nema tomwatar monuk rsalan feti safe ma myose ne nangamon. 18Ka mireke desar ma myorip e, mingamon myor tomwatar monuk. 19Wangur ma kwamis a kmi, ka kete mbyalas yatak ber tomwatar ma rose yatak a kmi, nempa ka msyalan lonri motak ma Ratu nukun sir. Fali na Kitap Lelerap dalam rarengi feti:

“Ratu nfalak farye:

‘Yakw Ningw kuase ma kbwalas tomwatar ma rose kabain yatkar, ma keta kukun sir.’”

20Farlan mir muswar ramlafar e, ka mfyane sir, nre ramwes e, ka myose ma renum. Fali farlan myose farane keta koko sir a rmeat na safe safe ma rose ber a kmi a ne.#12:20 Na teks asli nfalak feti iane farlan ma tomwatar rnau au bwaran na ulninrar. Iane feti sir rose ma tomwatar a ne rmeat sir. 21Ka kete mbyalas yatak ber tomwatar ma rose yatak a kmi, nempa ka myose kabain ngamonar nema bise ma mifufu kabain yatkar ma sir rose ne.

Currently Selected:

Roma 12: YMD

Highlight

Copy

Compare