Roma 10
10
(10:1-4)
1Wangur, yakw kmpweang desar ma weni Ratu nfair waingw Yahudyar. Iane nwayat ma kswampayang dedesar ber sir. 2Ma koko yakw bise ma kfwalak feti sir rareke desar ma rafsenange Ratu dalamy. Nempa sir to rafai feti ni botuan e, ka sir rose farpe nema bise ma rafsenange Ratu dalamy. 3Ma sir to rafai feti felan farpe ma Ratu nafdiat sir a na sounlury. Ma koko sir rareke ma Ratu nafdiat sir nof kabain ngamonar ma sir rose. Iane nwayat ma sir to rmpeang desar ma rlarat safe ma Ratu ntetak nema bise ma nafdiat sir. 4Ma nof safe ma Yesus ninr Ray Silai nose ne tomwatar to rperlu ma rose tetetkar ma luryain e, Ratu nal ber Musa ne nema Ratu nafdiat sir a na sounlury. Fali Ratu nafdiat tomwatar nof lan ma ralele Yesus ninr Ray Silai.
Ratu Ni kuase ma nfair tomwatar monuk ma ralele I
10:5-15
5Luryain e, Musa narengi lo feti tomwatar ma Ratu nafdiat sir a na sounlury a ne, sir a ne ma rose rlarat tetetkar ma Ratu nal ber i a ne. Musa narengi farye, “Tomwate ma nose nlarat tetetkar ma Ratu nal a ne keta nonri momorip dedesar.”#Im. 18:5 6-7Nempa Musa narengi nbal na Kitap Lelerap dalam na tomwatar ma Ratu nafdiat sir a na sounlury fali ralele I. Musa narengi farye: “Ka kete mdyaun feti keta ise ma nfangat far surga? Nre ise ma keta ntompur far mangmwat anir?” (Iane isiny feti to ubany ber kit ma tfangat far surga nema tonri momorip dedesar, fali Yesus ninr Ray Silai ntompur a nma saryamprene ma nfair kit lo. Ma to ubany ber kit a nbal ma tompur far mangmwat anir nema tonri momorip dedesar, fali Yesus ninr Ray Silai nmorip nof Ni mamate ma nal momorip dedesar ber kit lo.) 8Ka kete mdyaun farane fali rarengi na Kitap Lelerap dalam farye: “Ratu Ni ngribatnir a ne nor a kmi lo. Ma kmi myoding ma mfyalak desar Ratu Ni ngribatnir a ne, ma mlyangun a na dalmir. Ratu Ni ngribatnir a ne ma kam mafwibar ber tomwatar nema ralele Yesus.”#Ul. 30:12-14
9Fali farlan kmi myoding ma mfyalak desar na tomwatar sonirlury feti Yesus ye mir Mangnrure, ma milele feti Ratu nafmorip a nbali I nof mangmwatar mpe keta Ratu nfair a kmi. 10Fali farlan tyoding feti Yesus ye ninr Mangnrur Silai keta Ratu nfair kit. Ma farlan kit talele safe ma tyoding a ne tor dalminrar kateman keta Ratu nafdiat kit a na sounlury. 11Fali rarengi na Kitap Lelerap dalam, “Tomwatar ma ralele I keta to rafmweat sir.”#Yes. 28:16 12Safe ma rarengi na Kitap Lelerap dalam iane ber tomwatar monuk fali boloka tomwat Yahudyar ma tomwatar ma to Yahudi sir e, feleles motak. Fali Ratu ye lan lese ma neluk Mangnrure ber tomwatar monuk. I nal berkat ma nlie nlengan ber tomwatar monuk ma rtak tulung rof I. 13Fali tomwatar ma rtak tulung rof Mangnrur Silai keta nfair sir.#Yl. 2:32
14Nempa rtak tulung rof I farpe, farlan tomwatar to ralele I? Ma ralele I farpe, farlan to rdengar Ibar na I a fuky? Ma rdengar na I farpe, farlan tomwatar to rafwibar ibar na I a fuky? 15Ma keta sir rafwibar Ibar na Ratu farpe, farlan tomwatar to rsiduk sir a fuky ma rafwibar ibar na I. Iane farlan ma rarengi na Kitap Lelerap dalam farye: Keta tsenang resi farlan tomwatar sa nma ma nafwibar Ibar Ngamone.#Yes. 52:7
Tomwat Israelar to rlangun Ratu Ni ngribatnir
10:16-21
16Nempa to tomwatar monuk ma rlangun Ibar Ngamone ne. Ma luryain e, nabi Yesaya nfalak lo, “O Mangnrure Silai Ko, mpear ma keta ralele Ibar Ngamone ma kam mafwibar ye.”#Yes. 53:1 17Mpa tomwatar ka rdengar Ibar Ngamone ne fuky betno ralele Yesus. Ma tomwatar ketnir ka rti rafwibar Ibar Ngamone na Ray Silai betno sir rdengar Ibar a ne. 18Nempa yakw kwenrat, “Ali tomwat Israelar to rdengar Ibar a ne fuky e? Tate, sir rdengar Ibar a ne lo nre!” Fali rarengi na Kitap Lelerap dalam farye,
“Tomwatar rti saryamprene ni kateman lo ma rafwibar Ibar a ne,
ma nir ngribatnir a ne nsor monuk saryamprene ye lo.”#Mzm. 19:5
19Mpa yakw kwenrat, “Ali tomwat Israelar rkaul ral Ibar a ne lo e? Sir rkaul ral e lo nre!” Fali baluan e, Musa nfalak Ratu Ni ngribatnir farye,
“Keta kose ma tomwat Israelar a kmi dalmir maninik tomwatar ma to Israelar sir,
ma keta kose ma mirese tomwatar ma to Yahudi sir, ma mdyaun feti to rkaul ral sasaf desar.”#Ul. 32:21
20Ma nabi Yesaya nbaran ma nfalak Ratu Ni ngribatnir na tomwatar ma to Yahudi sir a ne farye nbal,
“Tomwatar ma to ranriak Yakw ne, sir a ne ma rtungan Yakw lo,
ma tomwatar ma to raenrat Yakw ne, kfwatutu Yakw ber sir lo.”#Yes. 65:1
21Nempa nabi Yesaya nfalak Ratu Ni ngribatnir na tomwat Yahudyar farye,
“Lere nronram e, Yakw kureke ma Ningw tomwatar rangamon a rbali ror Yakw, nempa to ralarat liry ma rbangal Yakw.”#Yes. 65:2
Currently Selected:
Roma 10: YMD
Highlight
Copy
Compare
Share
Want to have your highlights saved across all your devices? Sign up or sign in
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
