Kisah Para Rasul 8

Saulus nsil a nbabal tomwatar ma ralele Yesus

8:1-3

1Saulus nyoding a nbal feti tomwatar rfen Stefanus. Ntabw nof a ne, rafuri soranyar a na Yerusalem ma rsil a rbabal sir. Tomwatar monuk a ne rakes rasam sir far propinsi Yudea ma Samaria, ma lan mangsidkwar ma ramin dedesar Yerusalem. 2Tomwatar ketnir ma ralele Ratu ne rtasing desar Stefanus ma rafonak i. 3Nempa Saulus nareke ma nafyatak soranyar a na Yerusalem, ma nasunge dasar ma nakei bate merwane far burit ma ral sir far sel dalam.#Kis. 22:4-5; 26:9-11

Filipus nafwibar Ibar Ngamone na Samaria

8:4-8

4Mpe tomwatar ma ralele Yesus ne rakes rasam sir ma rafwibar Ibar Ngamone na mpenempen. 5Ma Filipus nti kote sa na Samaria ma nafwibar ber tomwatar na iane feti, Yesus ye Ray Silai. 6Noak ma tomwatar a ne rdengar safe ma Filipus nafwibar, ma nose fanikar e, sir dalmir lese ma rlangun safe ma nfalak a ne. 7Fali rsalan smwangat yatkar ma rsung tomwatar a ne rbie ma fwayak fwoik sir. Ma mangamluktwar ma sabaloyar yadin rangamon. 8Mpa tomwatar na kote ne rampumpuki desar sir.

Simon mangsafak

8:9-25

9Na kote ne tomwat sa ngarany Simon. Nof luryain e i nose ni snyafkar nwayat ma tomwat Samariar rampriang, ma i nose felany far tomwat silayar sa. 10Tomwatar monuk silai marumat ranaumat i ma rfalak, “Tomwate ye Ratu nal kuase ber i ma rtar feti mangkuase silai.” 11Mpa rlarat i, fali ni snyafkar a ne dodo lo nwayat ma rampriang. 12Nempa lere ye sir ralele Filipus fali nafwibar Ibar Ngamone na Ratu Ni farete dalam, ma na Yesus ninr Rai Silai ngarany. Ne nadiris bate merwane sir. 13Simon koko i a nalele nbal. Lama radiris monuk i e, i nlarat dedesar Filipus. Ma nampriang ma nsalan fanikar a ma kabain mpasalan silayar ma Filipus nose.

14Mangsidkwar a na Yerusalem rdengar feti tomwat Samariar rlangun Ratu Ni ngribatnir lo, mpa rsiduk Petrus ma Yohanes ma rti. 15Lama rait iano e, mangsidkwar du a ne rsampayang ber tomwat Samariar a ne ma rfen ber Ratu Smwangtany. 16Nof sir a ne to fen lese ma nfen ber Ratu Smwangtany a fuky fali betno radiris sir ror Yesus ninr Mangnrur Silai ngarany. 17Mpene radu a ne rsaup limnir a na tomwatar a ne, mpe Ratu nal Smwangtany ber sir.

18Simon nsalan feti Ratu nal Smwangtany ber tomwatar noak ma mangsidkwar du a ne rsaup limnir a na sir. Mpa nose ma nal doit ber sir, 19ma nfalak, “Myal kuase ne ber yakw nbal, nema farlan kswaup limangw na tomwatar e, Ratu nal Smwangtany ber sir a nbal.”

20Nempa Petrus a nfalak ber i, “La ryebas ko mor nim dotyar a ne far neraka, mufliak feti nim doit a ne bise ma mswelir Ratu Ni kuase e? 21Ratu nafai feti ko dalam to namlonry mpa to bise ma mlwarat na karyae ye. 22Mpa mtwate nim salar, ma mswampayang ber Ratu, nema I nlure nim andaun yatkar a ne; 23Yakw kufai feti dalam maninik kam ma mdwaun lan kabain yatkar.”

24Ne Simon a nfalak, “Msyampayang ber Ratu nrela nema kabanir monuk ma mfyalak a ne to fen lese nbal ma diat yakw.” 25Lama radu a rasaur safe ma rafai na Yesus ma rafwibar Ratu Ni ngribatnir, rbali sir far Yerusalem. Ma na nir mpampane ne sir rafwibar Ibar Ngamone na pnuar yadin na yampren Samaria.

Filipus nadiris mangonbain silayar sa nof Etiopia

8:26-40

26Ne Ratu Ni malaekat sa nfalak ber Filipus, “Mpwote ko ma mpwan far balisya trangan, mulyole dalamtene ma nrunrur rof Yerusalem far Gaza.” Dalamtene ne lan ketnir ma rmpan rof. 27Na dalamtene let e, natungan nor tomwat sa. Tomwate ne mangonbanir sa i ma nomat rai bate nof Etiopia#8:27 Na Etiopia e rtar nir rai feti Kandake ni doit. Ma tomwate ye betno nsampayang na Yerusalem ma nbali i far ni nuse. 28Ne nfangat kereta ma nbali i, ma na ni mpampane dalam e, i nbaca nabi Yesaya ni kitap. 29Mpe Ratu Smwangtany a nfalak ber Filipus, “Mtwi mlosir kereta ne!” 30Ne Filipus nasnyalik ma nti nlosir kereta ne ma nasaitling tomwate ne ma nbaca nabi Yesaya ni kitap. Mpe nenrat i, “Ko mufai kitap ne isiny e?”

31Ne nfalak, “To kekes ma raflonri isiny ber yakw ma kufai farpe?” Mpa nfalak ber Filipus ma nfangat ma radu a ramtoran. 32Ayat ma nbaca ne farye,

“I ye farlan domba ma tomwatar ronry ma rfen.

I keta to nfalak ngribatnir sa nbal

farlan domba anak ma rgunting fuluny e, to liriny.#Yes. 53:7-8

33Ma rafbwere I ma to kekes a rafdiat I.

Ma keta to kekes ma rasaur Ni dasdalam fali rfen I lo.”#Yes. 53:7-8

34Mpene mangonbain silai ne nfalak ber Filipus, “No mfwalak, nabi ma nfalak a ne snyain ise? Snyain i nre tomwat walyetar?” 35Mpa Filipus naflyonri safe ma nbaca ne, ma ntabw ma nafwibar Ibar Ngamone na Yesus nof ayat a ne. 36Na dalamtene let e, sir rtungan kloloku. Ne mangonbain silai ne nfalak, “Mswalan weye ne, bise ma mudiris yakw e?”

37[Ne Filipus a nfalak, “Farlan mulele Yesus ninr Ray Silai mor dalam kateman e, kudiris ko.” Ne nfalak, “Yakw kulele feti, Yesus ninr Ray Silai ye Ratu Anaky I.”]

38Ne tomwat Etiopia ne nfalak ber mangomat kereta ne ma nar, ma radu a rtompur, ma Filipus nadiris i. 39Lama rbie rof kloloku ne, metryat e, Ratu Smwangtany naflae Filipus, mpa mangonbain silai ne to nkeban Filipus lo. Mpe naloran ni mpampane nor dalamy senange. 40Farye e, Filipus namin Asdod lo. I naloran ni mpampane ma nafwibar Ibar Ngamone na Yesus na pnuar monuk tila nait Kaisarea.

Currently Selected:

Kisah Para Rasul 8: YMD

Highlight

Copy

Compare