Kisah Para Rasul 4

Tomwatar ror Petrus ma Yohanes far mangtetak agamar

4:1-22

1Noak ma Petrus ma Yohanes ratanuk ror tomwat ngayadin, metryat e, mangsompar ulnir ma mangajakar na Ratu Ni Das Silai nir ulun numur tomwat Sadukyar#4:1 Tomwat Sadukyar ye klop sa nof agame Yahudi ma to ralele feti mangmwatar bise rmorip a rbali. rti rakmat sir. 2Tomwatar a ne rares desar fali Petrus ma Yohanes rafwibar ber tomwat ngayadin feti Yesus nmorip a nbali lo. Ma iane nfatutu feti mangmwate keta nmorip a nbali. 3Mpa romat sir ror mangamlukut a ne ma rnau sir na sel. Ramin iane terik bobole fali nronram lo. 4Nempa tomwatar ma rdengar safe ma raftutu ne yadin a rtafal ma ralele Yesus, terik ma tomwate ribun lim sir. 5Ni bobole ne mangfaret Yahudyar ror nir makenar, ma mangaftutu Musa ni faretar rabut sir a na Yerusalem ma rsidang. 6Mangsomp Silai Hanas ma Kayafas, Yohanes, Aleksander, ma tomwatar monuk ma rof dasdalam Mangsomp Silai ramin iane nbal. 7Ne rluan ma tomwatar ror ratel a ne far sonirlury. Ma renrat sir feti, “Ise ma nal kuase ber a kmi, ma myal ise ngarany ma mifngamone tomwate ne?” 8Ne Petrus nfen ber Ratu Smwangtany ma nfalak, “Hei mangfaretar ma makenar, 9msyidang kam lere ye fali mose ngamone mangamlukut a ne. Ma myenrat a mbyal feti safema bise ma nangamon. 10Nempa kfwalak ber tomwat Israelar monuk a kmi, ka mifai feti, tomwate ne bise ma nangamon a nbali ma namdir somirlury fali kam mal Yesus ngarany la mafngamone i. Yesus ye ma tomwat Nasaretar rsangwalu I, ma I ye nbal ma Ratu nafmorip a nbali I. 11Na Kitap Lelerap dalam rarengi feti ‘Yesus ye, bati ma tuknar a kmi myebas, nempa lere ye neluk baty fakoran lo.’#Mzm. 118:22 12To tomwate fen lese na saryamprene ye ma Ratu nal kuase ber i ma nfair tomwatar rof nir salar, lan Yesus ma bise nfair kit.” 13Tomwatar monuk ma ramin sidang a ne rampriang ma rsalan Petrus ma Yohanes rbaran ma ratanuk, safo radu a ne tomwat biase motak ma to raskol. Betno rafai feti radu a ne ma biase ror Yesus. 14Nempa to rbangal ral mangsidkwar a ne fali tomwate ma rafngamone i a ne, namdir nor sir. 15Ne rfalak ber mangsidkwar du a ne ma rti burit, ma sir raale a ndaun. 16Ne rfalak, “Keta tose farpe sir? Tomwatar monuk ma ramin Yerusalem rafai feti radu ye rose kabain mpasalan silai, mpa to tulak tal. 17Kit tose teri motak sir ma kete ral Yesus ngarany la ratanuk ber tomwatar. Nema ibar ye kete ntafal ma nsor tomwatar.” 18Mpene rtar a rbali mangsidkwar a ne ma rti dalam ma rfalak, “Kete mitanuk nre miftutu tomwatar myor Yesus ngarany lo.” 19Nempa Petrus ma Yohanes rfalak, “Koko kmi a mfyalak mpe ma diat ber Ratu, kam mlarat a kmi nre mlarat Ratu? 20Fali to bise ma mtatutuk ma mafwibar safe ma msalan ma mdengar.” 21Mpe to ain ma rukun sir mpa rtafal ma rkanre sir ma famudi e, rtate sir fali ramtaut tomwatar monuk ma rdangin Ratu na kabain mpasalan a ne. 22Ma tomwate ma rafngamone i ror kabain mpasalan a ne, ni ngarak buty fat resnir lo.

Tomwatar ma ralele Yesus nir sampayang

4:23-31

23Lama rtate Petrus ma Yohanes e, radu a rbali sir far mangsiduk walyetar. Ne rasaur safe-safe monuk ma mangsompar ulnir numur maken Yahudyar a rfalak ber sir. 24Noak ma tbwarnir rdengar ngrie ne, sir raktem a rsampayang ber Ratu farye, “O ninr Mangnrure, lan Ko ma Nim kuase ma mose langit, saryamprene, tasik numur safe-safe monuk.#Kel. 20:11; Neh. 9:6; Mzm. 146:6 25Luryain e, Smwangtam nkuase empmyamar nusmyamar rai Daud ma neluk Nim mangkaryae ne ma nfalak feti:

‘Fali safema tomwatar ma to Yahudi sir rares;

ma safema rose rerengyar ma to ubnir sasaf.#Mzm. 2:1-2

26Rayar ma mangfaretar na saryamprene ye rafburat sir ma rose ma rbangal Ratu ninr Mangnrure, ma Ray Silai ma Ratu nfil I a ne.’

27Safe ma Daud nafbotin luryain e, lere ye rafdiat fali ni botuan e, Herodes ma Pontius Pilatus numur tomwatar ma to Yahudi sir, ma tomwat Yahudyar, rabut sir a na Yerusalem ye ma rbangal Yesus. Yesus ye Ko Nim mangkarya lelerap ma mfwair I ma neluk Ray Silai.#Mat. 27:1-2; Mrk. 15:1; Luk. 23:1; 7:11; Yoh. 18:28-29 28Tomwatar a ne rose safe-safe monuk farlan ma Ko mtwetak mof luryain nlarat Nim kuase ma mpempeang. 29Ma ninr Mangnrure, mswalan ma lere ye sir rkanre kam. Mpa mose ma Nim mangkaryayar kam ye mbaran ma mafwibar Nim Ngribatnir. 30Ma mal Nim kuase la mafngamone mangafansar, ma mose ngrimpasalnar mor Yesus ngarany, Nim mangkarya lelerap a ne.” 31Lama rsampayang monuk e, ain ma rafburat sir a ne nawawan. Ma sir rfen ber Ratu Smwangtany, ma rbaran ma rafwibar Ratu Ni ngribatnir.

Tomwatar ma ralele Yesus nir wewelmpampane

4:32-37

32Tomwatar monuk ma ralele Yesus ne dalmir lese. Ma to fen lese nfalak feti safe kabain ma i nie e, koko i, i ni e, nempa safe-safe monuk ma ramin sir a ne sir nire monuk.#Kis. 2:44-45 33Ma Ratu nal kuase silai ber mangsidkwar a ne ma koko sir a rafbotin feti Yesus nmorip a nbali lo. Mpe Ratu nal nimet silai ber sir monuk. 34To tomwate fen lese nof sir ma rawatan, fali rfenri nir ompkar ma dasar, ma ronr dotyar a ne, 35ber mangsidkwar. Ne rasaman mpane dotyar a ne ber tomwatar rlarat nir perluar. 36Tomwatar sa nof sir a ne ngarany Yusuf. I nof dasdalam Lewi nof Siprus ma mangsidkwar rtar i a nbal feti Barnabas ma isiny feti kanak mangafsenange. 37I nfenri ni ompak, betno nal dotyar a ne ber mangsidkwar.

Currently Selected:

Kisah Para Rasul 4: YMD

Highlight

Copy

Compare