Kisah Para Rasul 1

Ratu nyoding Smwangtany

1:1-5

1Amangw Teofilus, yakw kurengi safe-safe monuk ma Yesus nose ma naftutu, na ningw kitap luryain a ne,#Luk. 1:1-4 2-3ntabw nof ma nkarya terik ma nfangat far surga. Lama nmat ma nmorip a nbali nfatutu I ber Ni mangsidkwar ma nfil sir a ne. Ma nose fanikar yadin la nfatnyot feti I nmorip lo. I nfatutu felany dedesar terik lere buty fat ma natanuk ber sir na Ratu neluk Rai ma nfarete tomwatar. I nal Ratu Smwangtany la nsurat sir betno nfangat far surga. 4Na ler sa, noak ma ntame nor Ni mangsidkwar e, I nfalak, “Kete mbyie myof Yerusalem, la mdyaf safe ma Amangw nyoding ber a kmi. Iane ma luryain e, kufbwotin ber a kmi lo.#Luk. 24:49 5Fali Yohanes nal weye la nadiris tomwatar, nempa to dodo a nbal e, Amangw nadiris a kmi. Iane kmi mfyen ber Ratu Smwangtany lo.”#Mat. 3:11; Mrk. 1:8; Luk. 3:16; Yoh. 1:33

Yesus nfangat far surga

1:6-11

6Na ler sa mangsidkwar rabut sir ror Yesus ma renrat, “Mangnrur Silai, lere ye bise ma mwal a mbwali ninr nuse e, nema tomwat Romar kete reluk rai ma rfarete kit lo.” 7Ne Yesus nfalak ber sir, “To mpyerlu ma mifai feti bengfir e, ngrie ne nbotin, fali lan Amangw ma Ni kuase ma ntetak ngrie ne. 8Nempa keta myonri kuase noak ma mfyen ber Ratu Smwangtany ma keta myeluk mangtungan ma mifwibar ibar na Yakw na Yerusalem, propinsi Yudea ni kateman, Samaria nti nait saryamprene ni kateman.”#Mat. 28:19; Mrk. 16:15; Luk. 24:47-48 9Lama Yesus nfalak farane, koko sir a rsalan ma I nfangat far surga. Ne mutnar a rteri I mpa to rkeban I lo.#Mrk. 16:19; Luk. 24:50-51 10Sir lolone rfon far langit, metryat e tomwatar du a rfonak rabit mafutyar ramdir a rlosir sir. 11Ne tomwatar a ne rfalak, “Hei tomwat Galilear! Safema mfyon dedesar far langit? Yesus ma nfangat far surga ye, keta ntompur a nbal ma nma saryamprene e, farlan ma msyalan ye.”

Mangsidkwar rfil Matias ma nlikur Yudas

1:12-26

12Lama Yesus nfangat far surga e, mangsidkwar a ne rbali sir rof lenran Zaitun far Yerusalem ma doan fafa kilo lese.#1:12 Nof Yahudyar nir yayatrwar e tomwatar to rmpan rlengan nof kilo lese na nir ler Sanari. Mpe kilo lese na ayat ye isiny feti nir mpampane na ler Sanari. 13Noak ma rait kote ne, sir rti ain ma ralos a ne ma rfangat far loteng. Sir a ne Petrus, Yohanes, Yakobus, Andreas, Filipus, Tomas, Bartolomeus, Matius, Yakobus Alfeus anaky, Simon tomwat Zelot#1:13 Zelot ye klopar sa nof Yahudi ma to rlarat ma tomwat Romar ral nir nuse. ma Yudas Yakobus anaky.#Mat. 10:2-4; Mrk. 3:16-19; Luk. 6:14-16 14Ne dalmir lese ma rafburat sir ma rsampayang dedesar, ror Maria Yesus enany, ainy wainy, ma batar ketnir. 15Na ler sa e, tomwatar ma ralele Yesus ne rafburat sir. Sir a ne fafa tomwate rati buty du. Ma noak a ne Petrus namdir twalelenir ma nfalak, 16“Wangur mir kateman! Safe ma rarengi na Kitap Lelerap dalam ka rafdiat. Fali luryain e, Ratu Smwangtany nafbotin ber Daud na Yudas ma keta nrure tomwatar ma romat Yesus. 17I ye tomwatar sa nof kam, ma Yesus nfil i lo ma maktem a mkarya.” 18(Yudas nal doit nof ma nanrenre Yesus ne la nselir ompak. Ne npelak natlabar i ma kampuny ntarbis nwayat ma kampuny ene anaky rmadas mpa nmat. 19Tomwatar monuk ma ramin Yerusalem rafai ni mamate ne, nwayat ma rafngare ompak a ne feti, “Hakal Dama.” Nir liliri isiny feti Ompak Dare.)#Mat. 27:3-8 20Petrus nfalak a nbal, “Na kitap Mazmur dalam rarengi feti, ‘Farane nema ni das a ne kape’ ma to kekes a ramin. Ma keta ‘tomwat walyetar ronri ni kadere.’#Mzm. 69:26; 109:8 21-22Mpa ka tfil tomwatar sa ma ntafal kit ma teluk mangtungan nema taktem a tafwibar ber tomwatar feti Yesus nmorip a nbali. Ka tfil tomwate ne nof tomwatar ma dedesar rafburat sir ror kit ma tlarat Yesus, ntabw nof Yohanes nadiris tomwatar terik ma Yesus nfangat far surga.”#Mat. 3:16; Mrk. 1:9; 16:19; Luk. 3:21; 24:51 23Ne rfil tomwatar du, sir a ne Yusuf ma Matias. Yusuf ne ma rtar feti Barsabas, ma rtar a nbal feti Yustus. 24Betno rsampayang, “Mangnrur Silai, Ko mufai monuk tomwatar dalmir, mpa mfwatutu ber kam feti, nof tomwatar du ye ise ma Ko mfwil i, 25ma nlikur Yudas ma neluk mangsiduk ma nkarya ber Mangnrur Silai. Fali Yudas ye nmat a ntate ni karyayar ma nonri ni wayat lo.” 26Ne sir rose undi na tomwatar du a ne, ne undi ne nfufw ber Matias. Mpa ral i ma ntafal mangsiduk buti resin lese ne.

Currently Selected:

Kisah Para Rasul 1: YMD

Highlight

Copy

Compare