Ɔrɔmutɔnŋ kiri 8

Ɲaninkulutɔnbi wɔ̀ i kila-a Ɲiniwɔlinŋ ki baraka ra

(Galasitɔnŋ kiri 3.13–14; 5.16–25)

1Dɔnsaŋ, nwɔ̀ri fa Yesu i tenŋ i, Kirinŋ a kiti ki fɛɛn nini sun kili kì. 2Sabu Ɲiniwɔlinŋ ki i ɲaninkulutɔnbi wɔ̀ wɔri-ra Yesu Kirisa wɔ tenbi ki baraka ra, ninki míŋ mwu san-i bijɛ ki fa beŋ ki wɔ faan ki wu.

3Musa wɔ sariya ki wuru-ra so bi wɔ̀ ma-i yibɛɛ konanmini baraka ki rakurubi ki sababu ra kì, Kirinŋ yɛrima ki niŋ ma-i : Kirinŋ a Danshuru ki cin na-i, ntiŋ i na konanmini firi ru, nwɔ̀ i bijɛmatɔnŋ i. Bijɛ wɔ̀ wuru awɔ ŋununtinbi ki sɔɔ-ra yibɛɛ sun, Kirinŋ ntiŋ wɔri-i saraka niŋ bijɛ ki ŋunfɛ, ntiŋ i niŋ wɔ ŋununtinbi ki li.

4Kirinŋ niŋ ma-i, nwɔma sariya ki i telibi wɔ̀ ceeli-la, niŋ i nafaa yibɛɛ ru, yibɛɛ wɔ̀ri tiri kɛɲɛ-a yi dintɛ bi ki wu kili kì, duu Ɲiniwɔlinŋ ki dintɛ bi ki.

5Sɛli ki ra, konwɔtiŋ i tiri kɛɲɛ-a a yɛri dintɛ bi ki wu, nintiŋ ɲakili ki i tu-a niŋ bi kiri ra, nka konwɔtiŋ i tiri kɛɲɛ-a Ɲiniwɔlinŋ ki dintɛ bi ki wu, nintiŋ ɲakili ki i tu-a Kirinŋ wɔ bi kiri ra.

6Konwɔtiŋ ɲakili ki i tu-a a yɛri ki dintɛ bi kiri ra, niŋ i beŋ ki so-a ntiŋ sun, nka konwɔtiŋ ɲakili ki i tu-a Ɲiniwɔlinŋ ki dintɛ bi kiri ra, niŋ i ɲaninkulutɔnbi ki fa ɲaanfɛfili wɔri-ra nintiŋ tɛ. 7Konwɔtiŋ ɲakili ki i tu-a a yɛri ki dintɛ bi kiri ra, ntiŋ i ji-a Kirinŋ ɲa a, sabu ntiŋ a a kulu Kirinŋ wɔ sariya ki tɛ kì, ntiŋ yɛri so-a kì. 8Niŋ ki ra, nwɔ̀ri i tiri kɛɲɛ-a arì yɛri dintɛ bi kiri wu, nini a so Kirinŋ dintɛ bi ma-i kì. 9Ábɛɛ kɔniŋ tiri kɛɲɛ-a á firi ki dintɛ bi kiri wu kili kì, ábɛɛ i tiri kɛɲɛ-a Ɲiniwɔlinŋ ki dintɛ bi kiri wu, sabu Kirinŋ ɲini ki i ábɛɛ ciiru. A Kirisa ɲini ki ji konwɔtiŋ ciiru kì, nintiŋ Kirisa wɔ kì.

10A Kirisa ji ábɛɛ ciiru, ábɛɛ konanminibi firi ki a beeni jibi bɛɛ bijɛ ki sababu ra. Nka, miŋ tu ábɛɛ ji-i koŋ telimaan ni i, ábɛɛ ɲaninkulutɔnŋ ni yɛ Ɲiniwɔlinŋ ki baraka ra. 11Kirinŋ wɔ̀ ki Yesu Kirisa ki ŋmɛni-i, a niŋ ɲini ki sɔɔmaan ji ábɛɛ ciiru, mìnwɔ̀ ki Kirisa ŋmɛni po san-i konkwuu kiri kanfɛ, mìnki a na ábɛɛ firi kiri ŋmɛni Ɲiniwɔlinŋ ki baraka ra, ninwɔ̀ i ábɛɛ ciiru.

12Niŋ ɲaan ki tɛ, ńʼtindaŋ ni, kɔni wɔ̀ i yibɛɛ ra, firi ki wɔ i kì. Yibɔɔ ɲaninkulutɔnbi ki i ma-a ŋì i kɛɲɛ yi firi ki dintɛ bi kiri wu kili kì. 13A ábɛɛ ji tiri kɛɲɛ-a firi ki dintɛ bi kiri wu, ábɛɛ ra beeni, nka a ábɛɛ ji á firi ki dintɛ bi ki kilɛn-a Ɲiniwɔlinŋ ki baraka ra, ábɛɛ ɲaninkulutɔnŋ ni a tu. 14Sabu, Kirinŋ ɲini ki i koŋ finŋ woo finŋ jɛnpa-a, nini i Kirinŋ daŋ ni i.

15Ábɛɛ ɲini wɔ̀ kila-i, niŋ i ɲini i, nwɔ̀ ábɛɛ ji-a joŋ ni i, á i kɛni-ni kì, nka Kirinŋ ɲini yɛ, nwɔ̀ i ábɛɛ ji-a Kirinŋ daŋ ni i#8.15 Yi i ji Kirinŋ daŋ ni i, niŋ kɔri ki tu yibɛɛ ji-a miŋ tu Kirinŋ wɔ rakilidaŋ ni., ninki i ncusun-a yibɛɛ i so fali-i yi ǹʼbi : « Baba, yibɛɛ tiŋ! »

16Kirinŋ ɲini ki fa yibɛɛ ɲini ki i ǹʼbi-a yibɛɛ tɛ, tu yibɛɛ ji Kirinŋ daŋ ni i. 17A yibɛɛ ji ǹʼdaŋ ni i, yibɛɛ i ǹʼkanishitɔnŋ ni i sɛbɛ. Yibɛɛ i Kirinŋ kanishitiiri i, yi fa Kirisa i ji kanishishi ri i, sabu a yibɛɛ ji cɔɔri Kirisa fan, yibɛɛ fa ntiŋ a nɔɔri ki kila yimaŋ fan sɛbɛ.

Nɔɔri wɔ̀ a na, niŋ bi ki

18Mɔ́ɔ́n jaka ɲaan ki tɛ, Kirinŋ a na nɔɔri wɔ̀ ji yibɛɛ wu, yibɔɔ dɔnsaŋ cɔɔri kiri ra so pyi-i niŋ wu kì.

19Kirinŋ a na a daŋ kiri ji jibi wɔ̀, Kirinŋ wɔ finŋ pomaan ki bataa kɔrɔtɔmaan i niŋ jibi ki sunsuu-ra. 20Kirinŋ wɔ finŋ pomaan ki bataa ji-i finŋ ni i, nwɔ̀ri so-a bi tɔri ma-i arì yɛrɛtɛ kì. Niŋ ji yìrì yɛrima ki dintɛ bi kì, nka Kirinŋ yɛrima ki ǹʼji-i ninkunŋ, niŋ fa a fɔn na gbɛbilimaŋ i nmaŋ. 21Sabu Kirinŋ a na awɔ finŋ pomaan kiri po san beŋ ki wɔ jonbi ki ru, yìrì i arɔɔ lu kila Kirinŋ daŋ kiri wɔ jiyɛrɛtɛbi ki nɔɔri ki ra.

22Yibɛɛ ǹʼtɔ-i tu fɔ ŋì i na so jiŋ sun, tu Kirinŋ wɔ finŋ pomaan ki bataa i a cɔɔn-na cɔɔri ki gbɛɛra, miŋ tu mari ciitiŋ jɛrimaanna. 23Nini bantenŋ bi i kì, yibɛɛ wɔ̀ri Kirinŋ wɔ Ɲiniwɔlinŋ ki kila-i, niŋ i ji yibɛɛ gbɛ Kirinŋ wɔ shɔɔrinŋ jɔnɔ ki i, yibɛɛ yɛrima kiri i yi cɔɔn-na yi ciiru. Kirinŋ a na yibɛɛ ji a daŋ ni i, ŋì i yi firi ki po san jonbi ki ru pewu jibi wɔ̀, yibɛɛ i niŋ jibi ki sunsuu-ra.

24Sabu Kirinŋ yibɛɛ mwu-i, nka niŋ i faa gbɛbilimaŋ bi i. Yibɛɛ gbɛbilimaŋ ki i finŋ wɔ̀, a yibɛɛ ɲaniŋ ji niŋ na, niŋ ji-a gbɛbilimaŋ i kili kì. Miŋ ɲaniŋ i finŋ wɔ̀ sun kɔ, niŋ a so ji-i gbɛbilimaŋ i kili wa? 25Nka, a yibɛɛ yi gbɛ bili finŋ sun, yi ɲaniŋ nwɔ̀ sun kì, yibɛɛ i yi tɔnsunfili-la, yi i niŋ sunsuu-ri.

26Niŋ ɲaan ki tɛ, Ɲiniwɔlinŋ ki i ye-a yibɛɛ tɛ yi waa ǹʼna bi kiri ra, sabu yibɛɛ ǹʼnafɛ tanka ɲaantɔ-a kì, nka Ɲiniwɔlinŋ ki yɛrima ki i nafɛ ki tan-a yibɛɛ tɛ, cɔɔn wulu li lu, koŋ so-a nwɔ̀ri bi-i kì.

27Kirinŋ wɔ̀ ki i konanmini ciiru ki tɔ-a, ninki i Ɲiniwɔlinŋ ki dintɛ bi ki tɔ-a, sabu Ɲiniwɔlinŋ ki i nafɛ ki tan-a Kirinŋ wɔ wɔlinŋ kiri tɛ, ŋì i kɛɲɛ Kirinŋ dintɛ bi ki wu.

28Yibɛɛ ǹʼtɔ-i tu Kirinŋ i bi kiri bataa rapwulu-la, nwɔma a bidintɛtɔnŋ kiri maku i shɔ, ŋì nini wɔ̀ri dɔri-i, ŋì i kɛɲɛ a yɛrima ki wɔ bi gbɛbilimaan ki wu. 29Kirinŋ nwɔ̀ri ɲaannashi-i kabi juniɲa cɛtu ki jɛŋ, ǹʼfani ǹʼgbɛbili wuru mìŋ waarinŋ ki ru tu nini a ji a Danshuru ki sali. Niŋ ɲaan ki tɛ, a Danshuru ki i ji daŋ jɔnɔ ɔ, pwaŋ mwɔɔnna i nwɔ̀ ra. 30Kirinŋ nwɔ̀ri ɲaannashi-i kabi juniɲa cɛtu ki jɛŋ, ŋì nini dɔri-i sɛbɛ, ŋì i nwɔ̀ri dɔri-i, ŋì nini ji-i koŋ telimaan ni i sɛbɛ, ŋì nwɔ̀ri ji-i koŋ telimaan ni i, ŋì a nɔɔri ki wɔri-i nini tɛ sɛbɛ.

Kirinŋ wɔ bidintɛbi ki bi ki

31Yibɛɛ ra nfɛnŋ bi kili sa? A Kirinŋ ji yibɛɛ fan, nkɛnŋ a so yibɛɛ kari-i kili. 32Kirinŋ a kaan a yɛrima ki Danshuru ki wɔ cɔɔri ki sun kì, nka ŋì ǹʼwɔri-i beŋ ki tɛ yibɛɛ bataa bira, nfɛnŋ na, ŋì a finŋ bataa wɔri yibɛɛ tɛ ǹʼgbansanŋ i kì? 33Nkɛnŋ a so kiti ki kwuru-i Kirinŋ wɔ koŋ ɲaannashimaan kiri sun? Sabu Kirinŋ yɛrima ki i jii wɔri-ra kí tɛ. 34Nkɛnŋ a na kiti ki fɛɛn-ɛ kí sun? Sabu, nwɔ̀ beeni-i, Yesu Kirisa yɛ, niŋ bantenŋ i kì, ntiŋ ŋmɛni-i, ntiŋ sɔɔmaan i ji-i Tiŋ Kirinŋ pantɛ, ntiŋ i Tiŋ Kirinŋ nafɛ-ri yibɛɛ tɛ.

35Nfɛnŋ a so yibɛɛ po san-i Kirisa wɔ bidintɛbi ki ru sa? Ɲaanfɛkwulu bi kiri daa, walima ciirufɔnɔbi kiri? Koŋ wɔ cɔɔri kiri daa, walima bɛɛ sinaŋ ki? Gbɛwɔbi ki daa, walima kɛmi bi kiri fa beŋ ki? 36Miŋ tu ǹʼsɛbɛ-i Kirinŋ wɔ wulu ki ru ɲaan wɔ̀ tɛ, tu :

« Kí i yibɛɛ kilɛn-a jibi woo jibi ábɛɛ bira.

Yibɛɛ ji-i miŋ tu kí saa wɔ̀ri bo-i kilɛnmaanna tɛ. »#Shu kiri 44.23.

37Nka, niŋ fa a fɔn na, yibɛɛ bidi-i nwɔ̀ tɛ, niŋ yibɛɛ ji-i so kilatɔnŋ sinaŋ ni i. 38Míŋ bili-i ǹʼna, tu hali beŋ ki walima ɲaninkulutɔnbi ki, walima mɛlɛkɛn kiri, walima ŋununtinbi kiri, walima juniɲa nu dɔnsaŋ finŋ kiri fa finŋ na wɔ kiri, walima sotinbi kiri, 39walima kirinpɔli la finŋ kiri, walima pwɔkulinŋ fɛ finŋ kiri, ŋì i ta bo Kirinŋ wɔ finŋ pomaan kwuru tɔri kiri bataa sun, nini tɔri tenŋ a so yibɛɛ po san-i Kirinŋ wɔ bidintɛbi ki ru kì, ŋì ninwɔ̀ ji-i yibɛɛ wu yi Ŋuntiŋ Yesu Kirisa baraka ra.

Currently Selected:

Ɔrɔmutɔnŋ kiri 8: JOB

Highlight

Copy

Compare