Ɔrɔmutɔnŋ kiri 13

Bilinatɔnŋ kiri fa juniɲa nu faan ki bi ki

(Pyɛɛri (1) 2.13–17)

1Dɔnsaŋ, tu koŋ bataa a kulu yi ŋununu faantiŋ kiri tɛ, sabu faantinbi tɔri tenŋ nmaŋ kì, tu nwɔ̀ po-a Kirinŋ gbɛ kì. Faantiŋ wɔ̀ri i yibɛɛ ŋununu, Kirinŋ yɛrima ki nini bataa sɔɔ-ɔ. 2Niŋ ki ra, konwɔtiŋ i a kaan-na faantiŋ kiri wulu pa, nintiŋ i a kaan-na Kirinŋ wɔ bi sɔɔmaan ki tɛ mìnki i. Nwɔ̀ri i arì kaan-na faan ki wɔ wulu ki tɛ, nini i kiti ki dɔri-ra arì yɛri wu. 3Sɛli ki ra, faan ki bi shɔɔrinŋ matɔnŋ kiri rukɛni-na kì, duu bi kulinŋ matɔnŋ kiri. Miŋ i ǹʼtɛ tu ŋi i kɛni faan ki jɛŋ kì wa? Bi shɔɔrinŋ ma, ŋì a miŋ tɔ shɔɔrinŋ bi. 4Faantiŋ kiri i Kirinŋ tɛ baara matiiri i, ábɔɔ ɲaanfɛfili ki bira. Nka, a miŋ ji bi kulinŋ ma-a, kɛni faantiŋ kiri jɛŋ dɛ! Sabu kí sɔɔ faan ki sun, kari tanfinŋ kiri wɔri kí tɛ ŋuŋ bali kì. Kirinŋ wɔ baara matiiri yɛ, nwɔma Kirinŋ wɔ tɔnkwulu ki i ji, bi kulinŋ matɔnŋ kiri wɔ bi kulinŋ kiri kɔni ki i sali kí wu. 5Niŋ ki ra, ǹʼpari-i yi i yi kulu faantiŋ kiri tɛ. Niŋ fa ji kɛmi bantenŋ i kì, nka yi yi kulu, sabu yibɛɛ ǹʼtɔ-i yi ciiru, tu ǹʼshɔ yi i ǹʼma.

6Niŋ ki ra, yibɛɛ i ɲinisa ki sali-li sɛbɛ. Faantiŋ wɔ̀ri i ɲinisa ki mwu-a, Kirinŋ yɛrima ki nini bo-i niŋ baara ki ra, tu kí ǹʼmaka shɔ. 7Niŋ ɲaan ki tɛ, á koŋ bataa wɔ wɔri ntiŋ tɛ. Ábɛɛ kakan-i á i ɲinisa ki wɔri nwɔ̀ tɛ, á ɲinisa ki wɔri nintiŋ tɛ, á kakan-i á i kukarasan ki wɔri nwɔ̀ tɛ, á i niŋ wɔri nintiŋ tɛ. Ábɛɛ kakan-i á i kɛni nwɔ̀ jɛŋ, á kɛni nintiŋ jɛŋ. Ábɛɛ kakan-i á i nwɔ̀ gbɛ, á niŋ gbɛ.

Bidintɛbi ki bi ki

(Matiyu 22.35–40; Yuhana (1) 3.11–13)

8Dɔnsaŋ, ńʼtindaŋ ni, a bidintɛbi ji-i kì, finŋ tɔri kɔni fa kila ábɛɛ faninmwuŋ kì. A konwɔtiŋ i koŋ tɔri ki bidi a tɛ, nintiŋ Kirinŋ wɔ sariya ki rafaa-a. 9Sabu, cinŋ wɔ̀ri bi-i tu : « Fa nankulunbi ma kì, fa koŋ kilɛn kì, fa kwunŋ tan kì, fa nʼɲaninpo koŋ wɔ finŋ tɛ kì », niŋ fa bi pyɛ kiri bataa i kila-a ka cinŋ bimaan tenŋ ka ru, tu : « Miŋ kakan-i ŋi i nʼkaashi ki bidi nʼtɛ, miŋ tu nʼyɛrima kì. » 10A miŋ kaashi ki bidi miŋ tɛ, miŋ bi kulinŋ ma-a ntiŋ wu kì. Niŋ ki ra, a miŋ ji koŋ pyɛ kiri bidi-a nʼtɛ, miŋ i sariya ki rafaa-ra niŋ i.

Cɛrukɔlibi ki yi Ŋuntiŋ ki na ki jɛŋ

11Ábɛɛ kakan-i á i ámaŋ bidi ámaŋ tɛ, sabu yibɛɛ i waarinŋ wɔ̀ ru, ábɛɛ niŋ tɔ-i. Ábɛɛ ŋmɛni po san waari ki so-i ɲini ki sun, sabu yibɛɛ bilinabi ki ma-i waarinŋ wɔ̀ ru, mwubi ki myɛ-ɛ yibɛɛ tɛ dɔɔ, ŋì i fwuu niŋ waari ki sun. 12Cii ki ta-i jɛŋ, si ki i juu-ra sari kɔ. Niŋ ki ra, yi mancinŋ ki mabi kiri san yi ra, yi i manisarinŋ ki wɔ kari tanfinŋ kiri bo yi sun. 13Yi tiri tirika ɲaan shɔɔrinŋ tɛ, miŋ tu koŋ i tiri-ra suunna ɲaan wɔ̀ tɛ. Yi fa ji wulatiŋ ni fa lɔrutɛfɛ ri i kì. Yi yi yɛri paka tɔ nankulunbi kwuru ki bataa kɛlina. Yi fa ji kari kwurutiiri fa ɲaannajuutɔnŋ ni i kì. 14Á yi Ŋuntiŋ Yesu Kirisa bi ki bo á sun miŋ tu jɛrɛbi, firi ki dintɛ bi kiri fa so á fɛ kì.

Currently Selected:

Ɔrɔmutɔnŋ kiri 13: JOB

Highlight

Copy

Compare