Filipitɔnŋ kiri 1

Pooli wɔ coolinŋ ki

1Míŋ Pooli fa Timote, yibɛɛ wɔ̀ri i Yesu Kirisa wɔ joŋ ni i, yibɛɛ i ka sɛbɛ ka wɔri ta-a Kirinŋ wɔ konanbi wɔlinŋ kiri bataa tɛ, nini wɔ̀ri i Filipi kili ki ra, kí i ji bili-la Yesu Kirisa ra, yi i ǹʼwɔri ta-ri bilinatɔnŋ kiri jɛntɔnŋ kiri fa arì jɛnpatɔnŋ kiri tɛ.

2Yi Tiŋ Kirinŋ fa yi Ŋuntiŋ Yesu Kirisa shɔɔrinŋ fa ɲaanfɛfili wɔri á tɛ.

Pooli wɔ Kirinŋ nafɛ ki

(Kɔlɔsitɔnŋ kiri 1.3–11)

3A míŋ ɲakilila bo ábɛɛ bi tɛ waarinŋ woo waarinŋ, míŋ i coolinŋ wɔri-ra ńʼwɔ Kirinŋ ki tɛ. 4Míŋ ciirudimaan i Kirinŋ nafɛ-a ábɛɛ tɛ waarinŋ bataa ru, ńʼwɔ rafɛ kiri bataa ru, 5sabu ábɛɛ ji-i míŋ baara mashi ri i Wulujii ki bi bi ki ru, kabi fɔlɔfɔlɔ ŋì i na so dɔnsaŋ sun. 6Míŋ bili-i ǹʼna tu Kirinŋ wɔ̀ ki baara shɔɔrinŋ ka tɔnpa-i ábɛɛ ciiru, ńʼtu mìnki a tu ábɛɛ fan, fɔ á i ǹʼnafaa, fɔ ŋì i ta so Yesu Kirisa na jibi ki sun.

7Sɛli ki ra, míŋ kakan-i ŋí i ńʼmiiri-ri ábɛɛ bataa bira ka ɲaan ka tɛ, sabu ábɛɛ bi ki gbɛ-i míŋ gbɛ kusɛbɛ. Kirinŋ shɔɔrinŋ wɔ̀ ma-i míŋ tɛ, ábɛɛ á so ma-i niŋ bataa ru. Ábɛɛ i niŋ ma-a dɔɔ, ŋì i míŋ tu nkasu ki ru, niŋ fa á i ji ǹʼma-ni waarinŋ wɔ̀ ru, míŋ wuru Wulujii ki sunjo-a, ŋí i ǹʼsɛli ki ji-ri konaŋ kiri wu. 8Kirinŋ i míŋ shɛɛri ki i, tu ábɛɛ fyii ki míŋ wu dɔɔ, ŋì i kɛɲɛ Yesu Kirisa wɔ bidintɛbi ki wu.

9Míŋ i Kirinŋ nafɛ-a, ńʼtu ŋì ǹʼbɛɛ bo ábɔɔ bidintɛbi ki sun, á i ta-ri jɛŋ áwɔ tɔbi shɔɔrinŋ ki fa áwɔ ɲakilitinbi shɔɔrinŋ ki ru, 10nwɔma á i so shɔɔrinŋ ki ɲaannashi-i, á i ji koŋ fɔɔmaan pɔlibali li i, fɔ ŋì i ta so Kirisa na shikaŋ ki sun, 11á i áwɔ bi kiri bataa ma-ni telibi wu Yesu Kirisa baraka ra. Niŋ bataa ra ji Kirinŋ gbɛ bi i, niŋ fa nɔɔri i bili ǹʼtɔ ki sun.

Ɲaninkulutɔnbi ki, niŋ i Kirisa

12Ńʼtindaŋ ni, míŋ i ǹʼtɛ ńʼtu ábɛɛ i ǹʼtɔ, tu bi finŋ woo finŋ i míŋ kila-a kwumaŋ, ńʼtu niŋ i ǹʼtɔri san Kirinŋ wɔ Wulujii ki ta jɛŋ ki ra kì, nka ńʼtu nini bataa ji sababu, ŋì i ta jɛŋ. 13Niŋ ɲaan ki tɛ, masa ki wɔ kubi ki ru tɔnŋ kiri fa koŋ tɔri kiri bataa ǹʼtɔ-i, tu míŋ kɔli bo nkasu ru jɔlɔkɔ ra Kirisa tɔ ki bira. 14Mɔ́ɔ́n nkasu ru bo ki ji-i sababu bilinatɔnŋ mwɔɔnna i arì gbɛbilimaŋ ji Ŋuntiŋ ki i, kí i siratubi kila, kí i Kirinŋ wɔ wulu ki sunjo konaŋ kiri tɛ.

15Ǹʼbɛɛ ri kɔniŋ i Kirisa wulu ki sunjo-a tɛnbi fa sɔsɔɔlinŋ wu, nka ǹʼtɔri ri i ǹʼsunjo-ri ciirufɔɔbi wu. 16Nini i arɔɔ baara ki ma-a bidintɛbi wu, sabu kí ǹʼtɔ-i tu Kirinŋ míŋ ɲaannashi, ŋí i Wulujii ki sɛli ki ji konaŋ kiri wu.

17Koŋ pyɛ kiri Kirisa wulu ki sunjo-a ciirufɔɔbi wu kì, kí i ǹʼma-a tɛnbi wu. Kí i niŋ ma-a, nwɔma tu arì i ǹʼbɛɛ bo mɔ́ɔ́n cɔɔri ki sun nkasu ki ru. 18Nka sɛli ki ra, niŋ tɔri finŋ tɔri míŋ ɲaanna kì. A kí ǹʼma ciirufɔɔbi woo, a kí ǹʼma ciirufɔɔbi wu kì woo, a Kirisa wulu ki ji sunjo-a kɔ, niŋ i míŋ ciirudi-a. Ǹʼfani i ji-a ńʼciirudi waarinŋ bataa ru. 19Sabu, míŋ ǹʼtɔ-i ńʼtu ábɔɔ rafɛ kiri baraka ra, Yesu Kirisa Ɲiniwɔlinŋ ki a ye míŋ tɛ, niŋ bi kiri bataa i rapwulu ji míŋ mwu sababu.

20Sɛli ki ra, míŋ i ninwɔ̀ saarashɛɛli-la, niŋ fa míŋ ńʼgbɛ bili-i ninwɔ̀ sun, míŋ a ɲaankwun fyewu kì, nka míŋ a tɔnnafurubi kila dɔɔ niŋ fa waarinŋ bataa ru, nwɔma míŋ ɲaninkulutɔnŋ i woo, míŋ beenimaan i woo, nɔɔri i bili Kirisa sun míŋ bira. 21Sabu mɔ́ɔ́n ɲaninkulutɔnbi ki i ma-a Kirisa tɛ, ŋí i beeni ntiŋ bira, niŋ i ji pari ǹʼbataa wu. 22Nka a míŋ ɲaninkulutɔnŋ tu, a níŋ ji-a mɔ́ɔ́n Kirisa tɛ baara ki shɔ, míŋ ńʼɲaanna tɔ-a kili kì. 23Míŋ ciiru ɲakili ki ɲaanmimaan yɛ bi fuuli bira. Míŋ ǹʼtɛ ŋí i tiri Kirisa tɛ, ŋí i ta tu ntiŋ fan nmaŋ, ninki a pari míŋ sun kusɛbɛ. 24Nka, míŋ ɲaninkulutɔnŋ i tu ka juniɲa ka ru, nafan i niŋ nu ábɛɛ bira.

25Míŋ fani bili-i ǹʼna tu míŋ a tu juniɲa ka ru ábɛɛ fan sɛbɛ, nwɔma ábɛɛ i so baraka kila-i, á i ta jɛŋ, á i á ciirudi bilinabi ki ru. 26A niŋ ma, míŋ na ńʼpwulu ta ábɛɛ tɛ, míŋ a ji sababu ábɛɛ i á yɛri ragbɛ ŋuŋ ŋunaŋ kila Kirisa baraka ra.

Bilinabi ki ŋununu kari ki

(Tesalonikitɔnŋ kiri (1) 2.12–16; Iburu kiri 10.32–36)

27A ǹʼji ɲaan finŋ woo finŋ tɛ, ábɛɛ kɔniŋ tiri kɛɲɛ Kirisa Wulujii ki wu, nwɔma a míŋ na ta ábɛɛ tɛ nmaŋ woo, walima a míŋ na ábɛɛ wulu lama woo, ábɛɛ banbamaan i ta kila, á fumaan i ji-i ɲakilila tenŋ wu, á i ye-ri ámaŋ tɛ bilinabi ki ŋununu kari ki ra, nwɔ̀ cɛ sɔɔ Wulujii ki sun. 28Á fa ncusun ábɛɛ ɲa kiri i kɛmi de á ru ɲaan dantenŋ tɛ kì. Kíbɛɛ tirika ɲaan ki i ǹʼji-a, tu kí a haliki, nka ábɛɛ tirika ɲaan ki i ǹʼbi-ri, tu ábɛɛ mwu saa ki sun, tu niŋ i ji po-a Kirinŋ nu. 29Kirinŋ ka shɔɔrinŋ ka ma ábɛɛ tɛ, nwɔma á i bili bantenŋ tan Kirisa ra kì dɛ! Nka ŋì ǹʼma-i, nwɔma ábɛɛ i cɔɔri ǹʼbira sɛbɛ. 30Ábɛɛ míŋ ja-i kari wɔ̀ri ru waarinŋ fwuudemaan kiri ra, fɔ ŋì i na so dɔɔ, á ǹʼtɔ tu ábɛɛ yɛrima kiri niŋ bishi ki ru kaa.

Currently Selected:

Filipitɔnŋ kiri 1: JOB

Highlight

Copy

Compare