Efɛsitɔnŋ kiri 3

Cinŋ wɔ̀ biye Pooli gbɛsun shiya tɔri kiri kanfɛ

(Kɔlɔsitɔnŋ kiri 1.24–29; 2.1–3; Pyɛɛri (1) 1.10–12)

1Niŋ ki ra, míŋ Pooli i Kirinŋ nafɛ-a ábɛɛ tɛ waarinŋ bataa ru. Míŋ i nkasu ru Yesu Kirisa tɔ ki bira, sabu míŋ i Wulujii ki sunjo-a ábɛɛ shiya tɔri kiri tɛ.

2Ábɛɛ ǹʼnama tu Kirinŋ ka cinŋ ka wɔri míŋ tɛ, tu ŋí i ǹʼma ábɛɛ tɛ, ŋì shɔɔrinŋ ma-i míŋ tɛ, a niŋ ji-i kì, míŋ wuru-ra so ǹʼkila-i kì. 3Kirinŋ yɛrima ki awɔ gonto ki ji-i míŋ wu, nwɔma ŋí i ǹʼtɔ miŋ tu míŋ pyaanŋ sɛbɛ-i ǹʼsun ɲaan wɔ̀ tɛ. 4A ábɛɛ mɔ́ɔ́n sɛbɛ ki kali waarinŋ wɔ̀ ru, míŋ Kirisa wɔ gonto ki tɔ-i ɲaan wɔ̀ tɛ, ábɛɛ ra niŋ tɔ.

5Kirinŋ niŋ gonto ki ji konanmini sɛri tɔri tenŋ wu waarinŋ fwuudemaan ki tɔri tenŋ nu kì. Nka dɔnsaŋ, ŋì ǹʼji-i Yesu wɔ cindaŋ kiri fa Kirinŋ wɔ cintɔnŋ wɔlinŋ kiri wu Ɲiniwɔlinŋ ki bira. 6Niŋ gonto ki i tu Kirinŋ bi shɔɔrinŋ finŋ woo finŋ tɔnŋ wɔri awɔ konanbi ki tɛ, tu ábɛɛ shiya tɔri kiri lu kila niŋ na, á i dɛbɛ ji firi tenŋ i. Kirinŋ a tɔnŋ wɔri-i bi wɔ̀ ra Yesu Kirisa bira, ábɛɛ niŋ kila-i Wulujii ki sunjomaan ki bira.

7Kirinŋ shɔɔrinŋ ma-i míŋ tɛ, ŋì i míŋ shi awɔ baara ki ra, tu míŋ Wulujii ki sunjo konaŋ ki tɛ. Ŋì niŋ ma-i a yɛri ki wɔ sotinbi ki wu. 8Mínwɔ̀ i Kirinŋ wɔ wɔlinŋ kiri bataa ru pyaanŋ ki i, Kirinŋ niŋ kafinŋ ki wɔri-i míŋ tɛ, tu míŋ Wulujii ki sunjo shiya tɔri ru konaŋ kiri tɛ, niŋ Wulujii ki i Yesu Kirisa wɔ shɔɔrinŋ kɔbali ki i. 9Ǹʼtu míŋ niŋ gonto ki po manisarinŋ tɛ, nwɔma konaŋ kiri i ǹʼtɔ. Kirinŋ wɔ̀ ki finŋ kiri bataa ramɔni-i, ka gonto ka radumaan wuru mìnki gbɛ nmaŋ kabi fɔlɔfɔlɔ. 10Ŋì ncin-i niŋ gonto ki i tɔ dɔɔ, nwɔma bilinatɔnŋ kwuru kiri bira, kirinpɔlila masabi kiri fa sotinbi kiri bataa i ǹʼtɔ, tu ɲakilitinbi Kirinŋ gbɛ finŋ bataa ru. 11Kirinŋ niŋ ma-i, ŋì i ǹʼkɛɲɛ awɔ bi gbɛbilimaan kiri wu, kabi fɔlɔfɔlɔ juniɲa tɔnpa waaci ki jɛŋ, ŋì i ǹʼma yibɛɛ Ŋuntiŋ Yesu Kirisa bira.

12Yibɛɛ ɲakili sɔɔmaan ni i so-a yi kpari-i Kirinŋ tɛ ŋununfurubi wu, sabu yibɛɛ bili-i Ŋuntiŋ Yesu Kirisa ra. 13Niŋ ki ra, ńʼtindaŋ ni, cɔɔri wɔ̀ i míŋ kila-a ábɛɛ bira, niŋ fa á firi kilɛn kì, ninki i ábɛɛ ŋununfɛshi ŋuŋ ki i.

Kirinŋ wɔ bidintɛbi ki tɔ bi ki

14Niŋ ki ra, míŋ i ńʼkwushiri-ra, ŋí i Tiŋ Kirinŋ nafɛ, 15mìnwɔ̀ ki i finŋ kiri bataa tiŋ ki i, pwɔkulinŋ ki sun, niŋ fa kirinpɔli ki ra, 16ńʼtu ǹʼwɔ Ɲiniwɔlinŋ ki faan fa tɔnnafurubi wɔri ábɛɛ tɛ, ŋì i kɛɲɛ a yɛri ki wɔ nɔɔri sinaŋ ki wu, 17niŋ fa tu Yesu i so sɔɔ ábɛɛ ciiru tɔnŋ kiri ra bilinabi ki bira, nwɔma á banbamaan i tu bidintɛbi ki ra ɲaan bataa tɛ. 18A niŋ ma, ábɛɛ fa Kirinŋ wɔ wɔlinŋ kiri bataa ra na Kirisa wɔ bidintɛbi ki ciiru cuubi ki fa ǹʼgbɛbi ki fa ǹʼŋmaka ki tɔ. 19Daŋ Kirisa wɔ bidintɛbi wɔ̀ ra kì, ábɛɛ ra so niŋ tɔ-i, á i á ciiru ki bataa faa Kirinŋ wɔ bidintɛbi ki ra, fɔ á i pyii.

20Yibɛɛ i finŋ woo finŋ nafɛ-a, walima yi ɲakili i ji finŋ woo finŋ bi sun, Kirinŋ i so-a niŋ bi kiri bataa ma-i yibɛɛ tɛ, fɔ ŋì i ǹʼfwuu niŋ bataa sun awɔ sotinbi ki baraka ra, niŋ sotinbi ki wɔ̀ i baara ki ma-a yibɛɛ ciiru. 21Coolinŋ wɔri Kirinŋ tɛ awɔ bilinatɔnŋ kwuru kiri faninmwuŋ, Yesu Kirisa wɔ tenbi ki bira waarinŋ bataa ru, sɛri kiri bataa gbɛ. Amiina!

Currently Selected:

Efɛsitɔnŋ kiri 3: JOB

Highlight

Copy

Compare