Mabikiri 15

Bilinatɔnŋ kiri wɔ manja sinaŋ ki Yerusalɛmu kili ki ru

(Galasitɔnŋ kiri 2.1–9)

1Niŋ waaci ki ru, koŋ bɛɛ ri po wuru Yude sɔɔta ki ru, kí i na Antiyɔsi, kí i bilinatɔnŋ kiri kali-li tu : « A ábɛɛ sɔɔpeefɛ, ŋì i kɛɲɛ Musa wɔ sariya ki wu kì, ábɛɛ ra á mwu kì. »

2Pooli fa Barinabasi arì tu niŋ wulu kiri ra kì. Ŋì i ji sɔsɔɔlinŋ i kí fa niŋ koŋ kiri faninmwuŋ.

Ǹʼna shɔ kì, Antiyɔsi bilinatɔnŋ kiri i Pooli fa Barinabasi, niŋ fa bilinatɔnŋ tɔri ri cin ta niŋ wulu ki wu Yerusalɛmu, Yesu wɔ cindaŋ kiri fa cɛɛnni kiri tɛ. 3Antiyɔsi bilinatɔnŋ kiri i saafani ki wɔri kí tɛ. Kí tirira ki, kí i de Fenisi sɔɔta ki fa Samari sɔɔta kiri ru. Shiya tɔri kiri ji wuru Kirinŋ wɔ wulu ki tɛ ɲaan wɔ̀ tɛ, kí i niŋ nakali niŋ mani nu bilinatɔnŋ kiri tɛ. Niŋ wulu kiri i kí bataa ciirudi kusɛbɛ.

4Kí so-i Yerusalɛmu waarinŋ wɔ̀ ru, cindaŋ kiri fa jɛntɔnŋ kiri fa bilinatɔnŋ pyɛ kiri i kí ŋununafu. Kí so-i bi finŋ woo finŋ ma-i Kirinŋ wɔ sotinbi ki ciiru, kí i niŋ ɲaanbi nini tɛ. 5Nka, bilinatɔnŋ bɛɛ ri wuru nmaŋ, nini wuru Farinsiyɛnŋ ni i. Nini bɛɛ ri i jɔrɔkɔ tu, kí i ǹʼbi tu : « Waajibi yɛ, tu shiya tɔri wɔ̀ri bili Yesu ra, tu kí kakan kí i sɔɔpeefɛ, niŋ fa kí kakan kí i Musa wɔ sariya kiri bataa rasɔɔ. »

6Yesu wɔ cindaŋ kiri fa bilinatɔnŋ jɛntɔnŋ kiri i arìmaŋ nakɔli, nwɔma arì i niŋ wulu ki rufɔɔ.

7Kí i arìmaŋ sɔsɔ ǹʼmwɔɔnna, niŋ kɔɔtɛ, Pyɛɛri i wulu ki shi, ntiŋ tu : « Ńʼtindaŋ ni, ábɛɛ yɛrima kiri ǹʼtɔ-i tu Kirinŋ míŋ ɲaannashi, ŋì i po ábɛɛ kanfɛ kwumaŋ kabi waaci ŋmani na. Ŋì niŋ ma-i, nwɔma míŋ i Kirinŋ wɔ Wulujii ki bi shiya tɔri kiri tɛ, kí i ǹʼnama, kí i bili ǹʼna. 8Kirinŋ wɔ̀ i koŋ bataa ciiru ki tɔ-a, ninki Ɲiniwɔlinŋ ki wɔri-i shiya tɔri kiri tɛ, miŋ tu ŋì ǹʼwɔri-i yibɛɛ yɛri kiri tɛ ɲaan wɔ̀ tɛ, ŋì i ǹʼji niŋ na, tu nini bidi afinŋ tɛ sɛbɛ. 9Ŋì yibɛɛ fa kí po san yimaŋ nu kì. Ŋì kí ciiru kiri fɔɔ-ɔ bilinabi ki baraka ra. 10A ǹʼdumiŋ ji niŋ ɲaan ki tɛ, nfɛnŋ ncin-a ábɛɛ i Kirinŋ tɔnsunpa-ri, á i shii sɔɔ-ri shiya tɔri ru bilinatɔnŋ kiri yɛ sun, yibɛɛ fa yi tiŋ cɛɛnni kiri so nwɔ̀ fɛ kì? 11Á ǹʼtɔ tu, yibɛɛ bili-i ǹʼna tu Ŋuntiŋ Yesu yibɛɛ mwu ǹʼgbansanŋ i ɲaan wɔ̀ tɛ, tu ŋì kí gbɛ mìŋ ɲaan tenŋ ki tɛ. »

12Konaŋ ki bataa i a gbansan, kí i arì tɔɔnye Barinabasi fa Pooli tɛ. Kirinŋ kabakobi wɔ̀ri fa taanmashɛ wɔ̀ri ma-i kí gbɛ shiya tɔri kiri kanfɛ, kí i nini bataa rakali. 13Kí kɔ-i arɔɔ wulu ki ra waarinŋ wɔ̀ ru, Yakuba i wulu ki shi, ntiŋ tu : « Ńʼtindaŋ ni, á á tɔɔnye míŋ tɛ. 14Kirinŋ a ɲakili tu-i shiya tɔri kiri ra ɲaan wɔ̀ tɛ, kabi fɔlɔfɔlɔ, ŋì i ǹʼbɛɛ ri ɲaannashi, ŋì i kí ji awɔ ri, Simɔŋ#15.14 Pyɛɛri tɔ ki bɛɛ wuru tu Simɔŋ. po-i ntiŋ i niŋ bataa ɲaanbi yibɛɛ tɛ kaa. 15Niŋ fa Kirinŋ wɔ cintɔnŋ kiri wɔ wulu kiri i fu-a, miŋ tu Kirinŋ ǹʼbi-i awɔ wulu ki ru ɲaan wɔ̀ tɛ tu :

16‹ Niŋ kɔɔtɛ, míŋ a ńʼpwulu na.

Dawuda wɔ mwuu wɔ̀ fɛɛn-ɛ, míŋ a na niŋ tan ǹʼŋunaŋ i.

Míŋ a na ǹʼkurinŋ ki jɔrɔkɔ tu a kanŋ na.

17A niŋ ma, shiya tɔri ru konaŋ kiri ra na míŋ ceeli-li sɛbɛ,

aawe, míŋ shiya tɔri ru konaŋ wɔ̀ri dɔri-i, kí i ji ńʼwɔ ri,

nini bataa ra na míŋ ceeli-li.

Mínwɔ̀ i Ŋuntiŋ ki i, mínki tu ninkunŋ.

Míŋ i niŋ bi kiri ma-a,

18míŋ nini wɔ̀ri gbɛbili-i kabi fɔlɔfɔlɔ. › »

19Yakuba tu sɛbɛ : « Niŋ ki ra, míŋ ciiru ɲakilila, shiya tɔri wɔ̀ri arì tu-i kí i na Kirinŋ tɛ, yi fa bi furumaan ni sɔɔ nini sun kì. 20Nka yi sɛbɛ tan wɔri ta kí tɛ, yi i ǹʼbi kí tɛ tu kí fa pɛlilashɛn taa kí i arì yɛri nɔɔ kì. Kí i nankulunbi ki tu nmaŋ. Finŋ fɔɔn-ɔ finŋ wɔ̀ yɛ sun, ŋì i kilɛn, tu kí fa niŋ shɛn walima niŋ cunŋ nu kì. 21Kí ka bi dama kari rasɔɔ, nwɔma kí fa Yawutu kiri i fu tenŋ sun. Sabu, nini kanŋ cincin-i Musa wɔ sariya ki sun, kabi fɔlɔfɔlɔ, ninwɔ̀ i sunjo-a kili kiri bataa ra, ŋì i kali-li kalinfu kiri ru Nufaan jibi kiri sun. »

Sɛbɛ wɔ̀ wɔri ta-i shiya tɔri kiri ru bilinatɔnŋ kiri tɛ

22Yakuba kɔ-i awɔ wulu ki ra waarinŋ wɔ̀ ru, niŋ i di cindaŋ kiri fa jɛntɔnŋ kiri fa bilinatɔnŋ pyɛ kiri tɛ. Kí i fu ǹʼsun tu arì kpeeri ɲaannashi arì ru, arì i nini bo ta Antiyɔsi kili ki ra Pooli fa Barinabasi fan. Kí i Yodasi ɲaannashi, ninwɔ̀ wuru dɔri-ra sɛbɛ tu Barisabasi, ŋì i bo Silasi sun. Niŋ koŋ fuuli ki fɔn wuru bilinatɔnŋ kiri ru koŋ sinaŋ ni i. 23Sɛbɛ wɔ̀ wɔri ta-i kí gbɛ, niŋ i kaa :

« Ábɛɛ shiya tɔri ru bilinatɔnŋ kiri, ábɛɛ wɔ̀ri i Antiyɔsi, Siri niŋ fa Silisi sɔɔta kiri ru, yibɛɛ cindaŋ kiri fa bilinatɔnŋ jɛntɔnŋ kiri fa ábɛɛ tindaŋ pyɛ kiri bataa i ábɛɛ co-a, yi i sɛbɛ ka wɔri ta-ri ábɛɛ tɛ.

24Yibɛɛ ǹʼnama-i, tu kpeeri po yibɛɛ gbɛ kwumaŋ, kí i ta ábɛɛ ɲaanfɛkwulu-li arɔɔ wulu kiri wu, kí i á ciiru ɲakili ki ɲaanmi. Á ǹʼtɔ tu yibɛɛ kí cin kì dɛ! 25Niŋ ki ra, yibɛɛ fu-i ǹʼsun, yi i kpeeri ɲaannashi, yi i kí bo ta ábɛɛ tɛ. Kí a ta yibɛɛ tindaŋ shɔɔrinŋ kiri fan, nwɔ̀ri i Barinabasi fa Pooli. 26Shuru ri yɛ, nwɔ̀ri arì yɛri bataa wɔri-i yibɛɛ Ŋuntiŋ Yesu Kirisa bira. 27Yibɛɛ i Yodasi fa Silasi bo ta-a ábɛɛ tɛ. Yibɛɛ wulu wɔ̀ri sɛbɛ-i, kí a ta nini bi ábɛɛ tɛ arì tɔnŋ na.

28Ɲiniwɔlinŋ ki ǹʼji-i yibɛɛ wu tu yi fa shii tɔri sɔɔ ábɛɛ sun, ŋì i fwuu finŋ dama kari sun kì, nini wɔ̀ri i bi furu kiri i, miŋ tu : 29Á fa pɛlilashɛn taa kì, á fa cunŋ nu kì, niŋ fa finŋ fɔɔn finŋ wɔ̀ yɛ sun, ŋì i kilɛn, á fa niŋ shɛn taa kì. A ábɛɛ so á yɛri pa-i niŋ finŋ kiri kɛlina, ninki shɔ-i. Yi a ji faa. »

30Saa ki wɔri-i Pooli li tɛ waarinŋ wɔ̀ ru, nini i tiri Antiyɔsi. Kí ta-i so niŋ mani nu, kí i bilinatɔnŋ kiri rakɔli, kí i sɛbɛ ki wɔri kí tɛ. 31Kí ǹʼkali-i waarinŋ wɔ̀ ru, ŋì i kí cunadi, kí ciiru i di.

32Yodasi fa Silasi wuru Kirinŋ wɔ cintɔnŋ ni i sɛbɛ, nini i tɔnnafuru wulu li bi bilinatɔnŋ kiri tɛ, kí i kí siratu wulu mwɔɔnna wu. 33Kí i waaci pyaanŋ ma nmaŋ, niŋ kɔɔtɛ, bilinatɔnŋ kiri i juba san kí tɛ, kí i saa wɔri kí tɛ, nwɔma kí i arì pwulu ta cindaŋ kiri fa bilinatɔnŋ pyɛ kiri tɛ, nwɔ̀ri kí cin wuru-i. 34[Nka kí tiri waari ki na-i so, Silasi tu afinŋ a tu Antiyɔsi nmaŋ pyaanniŋ sɛbɛ. Yude tenŋ i a pwulu tiri.]

35Pooli fa Barinabasi i tu Antiyɔsi nmaŋ. Kí fa koŋ mwɔɔnna tɔri ri i konaŋ pyɛ kiri kali-li, kí i Ŋuntiŋ ki wɔ Wulujii ki bi-ri kí tɛ.

Pooli fa Barinabasi arì san-i arìmaŋ na

(Galasitɔnŋ kiri 4.13–15)

36Kí na-i waaci ma arìmaŋ fan, niŋ kɔɔtɛ, Pooli i ǹʼbi Barinabasi tɛ tu : « Yibɛɛ ta-i Ŋuntiŋ ki wɔ wulu ki sunjo kili wɔ̀ri bataa ra, yi yi pwulu ta nini na, yi i ta yìrì ru bilinatɔnŋ kiri ɲaan shɛɛli. »

37Yuhana wɔ̀ wuru dɔri-ra sɛbɛ tu Maraka, Barinabasi wuru ǹʼtɛ niŋ i ta arì fan. 38Nka niŋ fu Pooli sun fɛsɛfɛsɛ kì, sabu tu ŋì i arìbɛɛ tu Panfili kili ki ra, Maraka a kaan cinŋ ki tɛ, ntiŋ i a san arìbɛɛ ra. 39Niŋ i ji sɔsɔɔlinŋ sinaŋ i kí faninmwuŋ, fɔ ǹʼna shɔ kì, kí i arì san arìmaŋ na. Barinabasi i Maraka shi bo a sun, nini i tiri Sipirɛ. 40Pooli i Silasi ɲaannashi bo a sun, bilinatɔnŋ kiri i kí biye Ŋuntiŋ ki gbɛsun, nwɔma ŋì i ta shɔɔrinŋ ma kí tɛ. Niŋ kɔɔtɛ, kí i tiri. 41Pooli fa Silasi i tiri Siri kɛniŋ ki fa Silisi kɛniŋ ki bataa rumaanni, kí i bilinatɔnŋ kiri kali-li, kí i kí siratu-ri bilinabi ki ru.

Currently Selected:

Mabikiri 15: JOB

Highlight

Copy

Compare