Tesalonikitɔnŋ kiri (2) 1
1
Pooli wɔ coolinŋ ki
1Míŋ Pooli fa Silinfɛnŋ fa Timote wɔ coolinŋ i ábɛɛ Tesaloniki bilinatɔnŋ kwuru kiri tɛ, ábɛɛ wɔ̀ri i yibɛɛ Tiŋ Kirinŋ fa yi Ŋuntiŋ Yesu Kirisa wɔ kiri. 2Yi Tiŋ Kirinŋ fa Ŋuntiŋ Yesu Kirisa shɔɔrinŋ fa ɲaanfɛfili wɔri á tɛ.
Kiti wɔ̀ a tan Kirisa pwulu na shikaŋ ki ru
(Tesalonikitɔnŋ kiri (1) 1.2–7; Filipitɔnŋ kiri 1.3–6, 27–30; Matiyu 13.40–43; 25.31–46)
3Ńʼtindaŋ ni, yibɛɛ i coolinŋ wɔri-ra Kirinŋ tɛ waarinŋ bataa ru ábɛɛ bira. Sɛli ki ra, niŋ fa ma kakan-i, sabu ábɔɔ bilinabi ki i ta-a jɛŋ, niŋ fa ǹʼbɛɛ i bo-ri á faninmwuŋ bidintɛbi ki sun jibi woo jibi. 4Ninki ncin-i, yibɛɛ i ábɛɛ wulu bi-ri Kirinŋ wɔ konanbi kwuru ki tɛ, fɔ yi i yɛri ragbɛ-ri ábɛɛ wu áwɔ bilinabi ki fa áwɔ cɛrukɔli ki bira. Sabu hali ábɛɛ ji ɲaanfɛkwulu fa tɔnfɔɔ kwuru ki bataa ru, ábɛɛ niŋ bataa pa-i á ra.
5Niŋ bataa i ǹʼji-a tu Kirinŋ wɔ kiti ki telimaan a. Ábɛɛ i bi wɔ̀ri pa-a á ra, niŋ kiri i ǹʼji-a tu ábɛɛ ɲaanfɛkwulu ki kila-a Kirinŋ wɔ Masabi wɔ̀ bira, tu ábɛɛ ra niŋ kila. 6Ǹʼfɔɔ, tu ŋì i kɛɲɛ Kirinŋ wɔ telibi ki wu, tu nwɔ̀ri ábɛɛ ɲaanfɛkwulu-la, tu nini kakan kí i ɲaanfɛkwulu bi kila.
7Niŋ ɲaan ki tɛ, ábɛɛ wɔ̀ri i cɔɔri ki ru, ŋì a na nufaan wɔri yibɛɛ fa ábɛɛ tɛ. Niŋ a na ma, yibɛɛ Ŋuntiŋ Yesu Kirisa pwulu na shikaŋ ki ru, waarinŋ wɔ̀ ru ntiŋ a na, ntiŋ i po kirinpɔli ki ra, ntiŋ fa awɔ mɛlɛkɛn sotiŋ kiri. 8Ntiŋ a na tuucu faninmwuŋ, nwɔ̀ri Kirinŋ tɔ-a kì, niŋ fa kí i ji arì kaan yibɛɛ Ŋuntiŋ Yesu Kirisa Wulujii ki tɛ, ntiŋ i na kiti ki kwuru nini sun. 9Kɔ́ɔ́ ki a na ji ɲaanfɛkwulu kɔbali i. Kí i kalikali po san Ŋuntiŋ ki fa awɔ sotinbi ki nɔɔri ki fɛ. 10A Ŋuntiŋ ki na niŋ shikaŋ, nwɔma awɔ konanbi ki fa a ra bilinatɔnŋ kiri i a gbɛ, ábɛɛ yɛrima kiri ra na ji nini bɛɛ ri i, sabu yibɛɛ wulu wɔ̀ sunjo-i ábɛɛ tɛ, ábɛɛ bili-i niŋ na.
11Niŋ ki ra, yibɛɛ i Kirinŋ nafɛ-a ábɛɛ tɛ waarinŋ bataa ru, nwɔma ŋì ábɛɛ dɔri-i ŋuŋ wɔ̀ ra, ábɛɛ i niŋ nafaa. Yi i ǹʼnafɛ-ri tu ŋì i awɔ sotinbi ki wɔri á tɛ, ábɛɛ ǹʼtɛ á i ǹʼdintɛ bi finŋ woo finŋ fa bilinabi ki ru bi shɔɔrinŋ finŋ woo finŋ ma, á i so niŋ ma-i, á i ǹʼnafaa. 12A niŋ ma, yibɛɛ Ŋuntiŋ Yesu tɔ ki a gbɛ ábɛɛ bira, ábɛɛ yɛrima kiri i gbɛbi kila ntiŋ bira, ŋì i kɛɲɛ yibɔɔ Kirinŋ ki fa yi Ŋuntiŋ Yesu Kirisa wɔ shɔɔrinŋ ki wu.
Currently Selected:
Tesalonikitɔnŋ kiri (2) 1: JOB
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc.