Korɛntitɔnŋ kiri (2) 6
6
1Niŋ ɲaan ki tɛ, yibɛɛ wɔ̀ri i Kirinŋ baara mashi ri i, yibɛɛ i ábɛɛ rafɛ-a, tu ábɛɛ Kirinŋ wɔ shɔɔrinŋ wɔ̀ kila-i, tu á fa niŋ bo á gbɛ kɔɔsun, ŋì i ji finŋ gbansanŋ i kì. 2Á ǹʼtɔ tu Kirinŋ ǹʼbi-a awɔ wulu ki ru tu :
« Míŋ ábɔɔ rafɛ kiri mwu-i ńʼdintɛ waaci kiri ru.
Ŋí i ye á tɛ á mwu shikaŋ ki ru. »#Esayi 49.8.
Á ǹʼshɛɛli, Kirinŋ dintɛ waaci ki i dɔɔ,
mwu shikaŋ ki i jiŋ.
3Nwɔma pɔlimaŋ fa kila yibɔɔ baara ki ra kì, yibɛɛ i yi banba-a ɲaan ki fɔn tɛ, yi fa ji koŋ tɔri tenŋ fɛɛn ŋuŋ i kì. 4Niŋ ki ra, yibɛɛ i ǹʼma-a ɲaan ki fɔn bataa tɛ, yi i ǹʼji tu yibɛɛ Kirinŋ tɛ baara matɔnŋ sɛlɛsɛli li i.
Yibɛɛ i cɔɔri kiri fa tɔnfɔɔbi kiri fa yɛlinŋ sinaŋ kiri bataa kwun-a yi ru.
5Kí i yi bwɔ-a, kí i yi bo-ri nkasu ru, kí i kpeeri rusu bo-ri yi sun,
kí i yi yɛli-li, kí i yi san-ni yi ɲaanna, yi bɛɛkɔni ki i tu-ri,
6niŋ bataa ciiru, yibɛɛ fɔɔmaan ni yɛ, yi sɛli ki tɔ-ri, yi tɔnsunfilimaan ni i ji-i.
Yibɛɛ i shɔɔrintiŋ ni i, Ɲiniwɔlinŋ ki i ji yi fan, koŋ bataa bi i ji di yi tɛ ciirufɔɔbi wu.
7Yibɛɛ i wulu ki sunjo-a konaŋ ki tɛ, sɛli niŋ fa Kirinŋ wɔ sotinbi ki wu.
Telibi ki i yibɔɔ kari tanfinŋ ki fa yi sunsuufinŋ ki i.
8Konaŋ kiri bɛɛ ri i yibɛɛ gbɛ-a, ǹʼtɔri ri i yi rufyɛ-ri.
Ǹʼbɛɛ ri i yi tɔ jɛ bi-a, ǹʼtɔri i yi tɔ shɔɔrinŋ bi-ri sɛbɛ,
niŋ tɔri ǹʼtɔri san-a yibɛɛ ra kì.
Ǹʼbɛɛ ri tu yibɛɛ konaŋ ni sunnɛɛn-na, nka yibɛɛ dumiŋ i ji sɛli ki sun.
9Kí i ǹʼji-a miŋ tu arìbɛɛ yibɛɛ tɔ-a kì, nka kí bataa i yibɛɛ tɔ-a,
tu yibɛɛ beenimaan ni i, nka yibɛɛ ɲaninkulutɔnŋ ni i ji-i.
Kí i ɲaniŋ kwuru ki bataa sɔɔ-ra yibɛɛ sun, nka kí yi kilɛn kì.
10Kí ɲaanna, yibɛɛ i makwulukoŋ ni i, nka yibɛɛ ciirudimaan yɛ waarinŋ bataa ru.
Kí tu yi yɛlinkɔni ni i, nka yibɛɛ i koŋ mwɔɔnna ji-a fintiŋ ni i,
kí tu yi gbɛwɔ ri i, nka finŋ bataa i ji yibɔɔ.
11Korɛntitiiri, yibɛɛ sɛli ki bi-i ábɛɛ tɛ, yi i ábɛɛ bidi yi tɛ ciirufɔɔbi wu. 12Yibɛɛ yi kaan ábɛɛ bidi yi tɛ kì, nka yibɛɛ bidi ábɛɛ kiri tɛ kì. 13Á ncusun ŋí i wulubi á tɛ miŋ tu koŋ i wulubi-a a dintɛ daŋ ni tɛ ɲaan wɔ̀ tɛ : « Á fa á kaan yi tɛ kì, yibɛɛ ábɛɛ bidi-i yi tɛ ɲaan wɔ̀ tɛ, á yi bidi á tɛ mìŋ ɲaan ki tɛ. »
Mancinŋ ki fa manisarinŋ ki fubalibi ki
(Korɛntitɔnŋ kiri (1) 10.14–22; Efɛsitɔnŋ kiri 5.5–11; Pyɛɛri (1) 2.9–12)
14Koŋ wɔ̀ri bili Yesu ra kì, á fa nini fa dɛbɛ arɔɔ bi kulinŋ mabi kiri sun kì. Telibi ki fa telibalibi ki a so fu-i dɔɔkunŋ? Ɲaan tɔri tɛ, manisarinŋ ki fa mancinŋ ki so-a dɛbɛ-i dɔɔkunŋ? 15Fubi danwɔ Kirisa fa shitaanni faninmwuŋ? Bilinatɔnŋ ki fa bilinabali ki ciiru ɲakili kiri ra so ji-i tenŋ i dɔɔkunŋ?#6.15 Ka mani ka i ǹʼbi-a tu yi fa yi kaan wulubi walima bi ma bilinabali fan kì dɛ, nka tu yi fa kí fa dɛbɛ arɔɔ ɲakilila jɛ kiri sun kì. 16Fu danwɔ Kirinfusinaŋ ki fa pɛli kiri faninmwuŋ? Yibɛɛ kiri i Kirinŋ ɲaninkulutɔnŋ ki wɔ fu ki i.#Sarakawɔrɔtɔnŋ kiri 26.11; Korɛntitɔnŋ kiri (1) 3.16. Kirinŋ yɛrima ki niŋ bi-i awɔ wulu ki ru tu :
« Míŋ a sɔɔ kí faninmwuŋ,
ŋí i tiri-ri kí fan
míŋ a ji kɔ́ɔ́ Kirinŋ ki i,
kí i ji mɔ́ɔ́n konanbi ki i. »
17Niŋ ki ra, Ŋuntiŋ Kirinŋ tu awɔ konanbi ki tɛ tu :
« Á po san kí kanfɛ, á i á san kí ra,
á fa myɛ finŋ nɔɔmaan tɔri tenŋ na kì.
A niŋ ma, míŋ a ji ábɛɛ tɛ.#Esayi 52.11; Esekiyɛli 20.34, 41.
18Míŋ a ji ábɛɛ tiŋ ki i,
ábɛɛ i ji míŋ danshuru ri fa ńʼdanmari ri i,
Ŋuntiŋ ki, Sobataatiŋ ki tu ninkunŋ. »#Esekiyɛli 37.27; Samuyɛli (2) 7.14; Esayi 43.6.
Currently Selected:
Korɛntitɔnŋ kiri (2) 6: JOB
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc.
