Korɛntitɔnŋ kiri (2) 2

1Niŋ ki ra, míŋ ǹʼtɛ ŋí i ta ábɛɛ tɛ sun kì, nwɔma tɔnfɔɔ tɔri fa ábɛɛ kila kì. 2A míŋ ábɛɛ tɔnfɔɔ, nkɛnŋ a míŋ ciirudi sɛbɛ ábɛɛ kiri kɔɔtɛ? Ábɛɛ wɔ̀ri i míŋ ciirudi-a, a míŋ ábɛɛ tɔnfɔɔ, ábɛɛ ra so míŋ ciirudi-i dɔɔkunŋ? 3Niŋ ki ra, míŋ i sɛbɛ wɔri ta ábɛɛ tɛ, nwɔma míŋ fa ta ábɛɛ tɔnfɔɔmaan ni kila kì, sabu ábɛɛ kiri kakan-i á i míŋ ciirudi. Míŋ bili-i ǹʼna, tu míŋ ciirudimaan ki ábɛɛ bataa ciirudibi i. 4Sɛli ki ra, míŋ tɔnfɔɔmaan cɔɔrimaan ɲaannajutiŋ ki sɛbɛ ki wɔri ta-i ábɛɛ tɛ. Nka, á bili ǹʼna, tu sɛbɛ ki wɔri ŋuŋ ki wuru ŋí i ábɛɛ tɔnfɔɔ kì, míŋ ǹʼsɛbɛ-i, nwɔma ábɛɛ i ǹʼtɔ tu ábɛɛ bidi míŋ tɛ haali.

Pɔlitiŋ ki wɔ pɔli ki tu bi ki ntiŋ tɛ

5Konwɔtiŋ na-i ka tɔnfɔɔ ka wu, ntiŋ míŋ bantenŋ tɔnfɔɔ kì, nka ntiŋ ábɛɛ bataa tɔnfɔɔ-ɔ walima ábɛɛ mwɔɔnna. 6Ábɛɛ mwɔɔnna fu-i ǹʼsun, á i ntiŋ kulu ɲaan wɔ̀ tɛ, ŋì fa fwuu niŋ sun kì. 7Dɔnsaŋ, ábɛɛ kakan-i á i ntiŋ wɔ pɔli ki tu ntiŋ tɛ, á i ntiŋ siratu, nwɔma ntiŋ fa a yɛri tɔnfɔɔka jitan, ntiŋ i a yɛri baraka kɔ kì. 8Niŋ ki ra, míŋ i ǹʼceeli-la ábɛɛ gbɛ, ńʼtu á ǹʼji ntiŋ wu, tu ntiŋ bidi ábɛɛ tɛ hali jiŋ. 9Sabu mɔ́ɔ́n sɛbɛ ki wɔri ŋuŋ ki bɛɛ wuru ábɛɛ tɛ sɛbɛ, tu ŋí i ábɛɛ sunsunu, a ábɛɛ ji faa míŋ wulu pa-a bi bataa ra, ŋí i niŋ tɔ. 10Ábɛɛ koŋ woo koŋ wɔ pɔli tu ntiŋ tɛ, míŋ yɛri ki nintiŋ wɔ pɔli ki tu-i ntiŋ tɛ. A míŋ konwɔtiŋ wɔ pɔli tu ntiŋ tɛ, míŋ niŋ tu-i ntiŋ tɛ ábɛɛ bira, ŋí i Kirisa ji yi shɛɛri ki i. 11Niŋ bataa ŋuŋ ki i nwɔma yi fa ncusun shitaanni ki i so kila yi sun kì, sabu yi i ǹʼwɔ fɛɛli kiri tɔ-a.

Pooli ciirufɔnɔbi ki Torohasi kili ki ra

12Míŋ so-i Torohasi kili ki ra Kirisa wɔ Wulujii ki sunjorama ki wu waarinŋ wɔ̀ ru, míŋ i ǹʼja-i ńʼtu Ŋuntiŋ ki saa rawwulu míŋ jɛŋ niŋ cinŋ ki bira. 13Nka míŋ ciirufɔnimaan wuru-i kusɛbɛ, sabu míŋ ńʼtindaŋ Tite ja-ri kì. Niŋ ki ra, míŋ i saarafɛ kí gbɛ, ŋí i tiri Maseduwanɛ sɔɔta ki ru.

Pooli wɔ cinŋ ki maka ɲaan ki

(Ɔrɔmutɔnŋ kiri 15.17–19; Korɛntitɔnŋ kiri (1) 1.17–24; Korɛntitɔnŋ kiri (2) 4.1–7)

14Míŋ i baraka bi-a Kirinŋ tɛ, sabu mìnki i yibɛɛ bo-a waarinŋ bataa ru so kilatɔnŋ kiri fan Kirisa baraka ra. Kirinŋ i yibɛɛ sɔɔ-ra, ŋì i Kirisa bi ki sunjo ta-ri mani ki bataa ru, miŋ tu ŋuŋ kini jii i mani ki bataa shi-a ɲaan wɔ̀ tɛ. 15Yibɛɛ i miŋ tu Kirisa sun ŋuŋ kini jii i Kirinŋ gbɛ, nwɔ̀ i so-a koŋ bataa sun, nwɔ̀ri i mwu saa ki fan niŋ fa nwɔ̀ri i fɔni saa ki fan. 16Nwɔ̀ri i fɔni saa ki fan, niŋ kini ki i kini jɛ ɛ, ŋì i kí bo-ri beŋ nu. Nka nwɔ̀ri i mwu saa ki fan, kini jii yɛ, ŋì i ɲaninkulutɔnbi kɔbali ki wɔri-ri kí tɛ.

Dɔɔ, nkɛnŋ a so niŋ cinŋ ki maka shɔ-i sa? 17Koŋ mwɔɔnna i Kirinŋ wɔ wulu ki rapwulu-la, kí i ǹʼnu jɔɔ tan-ni, yibɛɛ kɔniŋ miŋ tu nini kì. Kirinŋ yibɛɛ cin-i, yibɛɛ i wulu ki bi-a fɔɔbi wu ǹʼɲaanfɛ Kirisa baraka ra.

Currently Selected:

Korɛntitɔnŋ kiri (2) 2: JOB

Highlight

Copy

Compare