Tesalonikitɔnŋ kiri (1) 4

Tirika ɲaan wɔ̀ di-i Kirinŋ tɛ

(Pyɛɛri (1) 1.14–16; 4.1–5; Efɛsitɔnŋ kiri 5.3–8; Korɛntitɔnŋ kiri (1) 6.13–20)

1Ńʼtindaŋ ni, ábɛɛ kakan-i á i tirika shɔ Kirinŋ ɲaanfɛ ɲaan wɔ̀ tɛ, yibɛɛ niŋ ɲaanji-i ábɛɛ wu kɔ, ábɛɛ yɛrima kiri i ji juu tiri-ra niŋ ɲaan ki tɛ kɔ. Yibɛɛ i nwɔ̀ ceeli-la ábɛɛ gbɛ dɔnsaŋ, niŋ i tu á ǹʼbɛɛ bo niŋ sun sɛbɛ. 2Yibɛɛ ábɛɛ kali-i bi wɔ̀ri ra, yibɛɛ Ŋuntiŋ Yesu bi ki sun, ábɛɛ nini tɔ-i.

3Kirinŋ dintɛ bi ki i tu ábɛɛ á yɛri bo afɔɔn bo ru, á fa nankulunbi ma kì. 4Tu koŋ bataa tenŋ tenŋ a firi ki pa ɲaan shɔɔrinŋ tɛ, ntiŋ i ǹʼbo Kirinŋ wɔ bo ru, ntiŋ i Kirinŋ tɔ ki gbɛ. 5Á fa kakaalibi ki bidi á tɛ, miŋ tu Kirinŋ tɔbali kiri ǹʼji-a ɲaan wɔ̀ tɛ kì.

6Koŋ fa a kaashi bilinatɔnŋ daali niŋ bi bishi ki ru kì, sabu miŋ tu yibɛɛ dali-i yi i ǹʼbi furu ábɛɛ tɛ ɲaan wɔ̀ tɛ, Ŋuntiŋ ki a ǹʼtɔri kɔni salibali tu kì. 7Sabu, Kirinŋ yibɛɛ dɔri tu yi ji koŋ nɔɔmaan ni i kì, nka ŋì yibɛɛ dɔri-i, tu yi ji wɔlinŋ ni i. 8Konwɔtiŋ a kaan ka wulu ka tɛ, nintiŋ a kaan koŋ tɛ kì, ntiŋ a kaan-a Kirinŋ tɛ, ninwɔ̀ a Ɲiniwɔlinŋ ki wɔri-i ábɛɛ tɛ.

9Ǹʼso koŋ i sɛbɛ tan wɔri ta ábɛɛ tɛ bilinatɔnŋ kiri wɔ maŋ bidintɛbi ki bi sun kili kì, sabu Kirinŋ yɛrima ki ábɛɛ kali-i niŋ na kɔ, tu á ámaŋ bidi ámaŋ tɛ. 10Ábɛɛ i juu ninki ma-a á tindaŋ kiri tɛ kɔ, nini wɔ̀ri i Maseduwanɛ sɔɔta kiri bataa ru. Ǹʼfa a fɔn na, ńʼtindaŋ ni, yibɛɛ i ǹʼbi-a ábɛɛ tɛ, tu á ǹʼbɛɛ bo niŋ sun ǹʼmwɔɔnna ǹʼmwɔɔnna.

11Á ncusun ɲaanfɛfili i ji á faninmwuŋ. Á i á yɛri ŋununubi kiri ramɔni-ni. Á i baara ma á gbɛ kiri wu, miŋ tu yibɛɛ ǹʼbi wuru ábɛɛ tɛ ɲaan wɔ̀ tɛ. 12Niŋ ɲaan ki tɛ, koŋ wɔ̀ri bilinabi ki ma kì, nini a na ábɛɛ tirika ki gbɛ, ábɛɛ ra ji koŋ tɔri sun shii i kì.

Bilinatɔnŋ beenimaan kiri bi ki fa Ŋuntiŋ ki pwulu na bi ki

(Korɛntitɔnŋ kiri (1) 15.19–58)

13Ńʼtindaŋ ni, a bilinatɔnŋ ki beeni, bi wɔ̀ i ma-a ntiŋ wu, míŋ ǹʼtɛ ábɛɛ i tu niŋ tɔbali kì, nwɔma ábɛɛ fa na á gbɛɛratɛɛ-ɛ miŋ tu koŋ pyɛ kiri kì. Gbɛbilimaŋ nini na kì. 14Yibɛɛ bili-i ǹʼna ɲaan wɔ̀ tɛ tu Yesu beeni, ntiŋ i ŋmɛni, yibɛɛ bili-i ǹʼna mìŋ ɲaan tenŋ ki tɛ, tu nwɔ̀ri ja ji beeni, ŋì i kí tu bilinabi ki ru Yesu ra, tu Kirinŋ a na nini ŋmɛni Yesu baraka ra, kí i ji ntiŋ fan.

15Yibɛɛ ra ka bi ábɛɛ tɛ, ŋì i kɛɲɛ Ŋuntiŋ ki wɔ wulu ki wu, tu yibɛɛ wɔ̀ri ɲaninkulutɔnŋ ni a na ji-i Ŋuntiŋ ki pwulu na shikaŋ ki ru, tu yibɛɛ ra na niŋ koŋ beenimaan kiri jɛnkwuru fyewu kì. 16Sabu Ŋuntiŋ ki yɛrima ki a na jɛri po yiri kirinpɔli ki ra, fali wulu sinaŋ fa mɛlɛkɛn kiri ŋununtiŋ ki wulu sinaŋ wu, niŋ fa Kirinŋ wɔ bwuru shinwulu wu. A niŋ ma, nwɔ̀ri beeni-i, ŋì i kí tu Yesu wɔ bilinabi ki ru, nini a ŋmɛni ǹʼjɔnɔ. 17Niŋ kɔɔtɛ, a niŋ na fa yibɛɛ bilinatɔnŋ pyɛ wɔ̀ri wu yi ɲaanna, Ŋuntiŋ ki a na yibɛɛ fa kí shi, yi bataa i dɛbɛ fɛshi kirinpɔli ki ra, yi tunpa tiri Ŋuntiŋ ki ŋununafumaŋ ki ru loŋ kiri ru. Niŋ ɲaan ki tɛ, yi a tu Ŋuntiŋ ki fan waarinŋ bataa ru. 18Ńʼtindaŋ ni, á ámaŋ cunadi ka wulu kari wu.

Currently Selected:

Tesalonikitɔnŋ kiri (1) 4: JOB

Highlight

Copy

Compare