Tesalonikitɔnŋ kiri (1) 2

Pooli baara wɔ̀ ma-i Tesaloniki kili ki ru

(Mabikiri 20.18–21, 31–35; Korɛntitɔnŋ kiri (2) 6.3–10; 12.12–15)

1Ńʼtindaŋ ni, ábɛɛ yɛrima kiri ǹʼtɔ-i tu yibɛɛ tamaan ki ji ǹʼgbansanŋ i ábɛɛ tɛ kì. 2Ábɛɛ ǹʼtɔ-i tu kí yibɛɛ ki, niŋ fa kí i yi paka jɛ tan Filipi kili ki ru, nka niŋ fa a fɔn na, yibɛɛ yi gbɛ bili-i yɔɔ Kirinŋ ki sun, yi i ta Wulujii ki bi ábɛɛ tɛ kari mwɔɔnna faninmwuŋ. 3Yibɛɛ yɔɔ Kirinŋ wɔ wulu ki bi, nwɔma yi konaŋ ni fɔni kì, yi dumiŋ ǹʼbi ɲakilila jɛ walima wulu fuuli wu kì. 4Yibɛɛ i Kirinŋ wɔ Wulujii ki bi-a, ŋì i kɛɲɛ Kirinŋ dintɛ bi ki wu, sabu Kirinŋ yibɛɛ sunsunu-i, ŋì i bili yi ra, ŋì i awɔ Wulujii ki biye yi gbɛsun. Niŋ ɲaan ki tɛ, yibɛɛ i ǹʼbi-a, nwɔma yi bi i di konaŋ ni tɛ kì, nka yibɛɛ i ǹʼbi-a, yi i yi yɛri bidi Kirinŋ tɛ, ninwɔ̀ ki i konaŋ ciiru ki rufɔɔ-ra.

5Ábɛɛ yɛrima kiri ǹʼtɔ-i, tu yibɛɛ koŋ tɔri tenŋ ɲaanna wulu bi kì. Yi dumiŋ finŋ ceeli kì. Kirinŋ i yibɛɛ shɛɛri ki i. 6Yibɛɛ ǹʼceeli koŋ i yi gbɛ kì, yi ǹʼceeli ábɛɛ gbɛ kì, yi fani dumiŋ ǹʼceeli koŋ tɔri gbɛ kì. 7Yibɛɛ wuru-ra so faan bo-i ábɛɛ sun, sabu tu yibɛɛ Kirisa wɔ cindaŋ ni, nka yibɛɛ niŋ ma kì. Yibɛɛ ábɛɛ pa-i sunjɛribi wu, miŋ tu daŋ ɲiŋ a ɲakili tu-a a daŋ ni na ɲaan wɔ̀ tɛ. 8Ábɛɛ bidi wuru yibɛɛ tɛ kusɛbɛ, niŋ ki ra, yibɛɛ i yi tu yi i Kirinŋ wɔ Wulujii ki bi ábɛɛ tɛ, niŋ fa yi ji wuru-ra yi tu yi i yi ɲini ki wɔri ábɛɛ bira, sabu ábɛɛ bi ki gbɛ wuru yibɛɛ gbɛ kusɛbɛ.

9Ńʼtindaŋ ni, yibɛɛ cinŋ ki ma-i sunfurubi wu ábɛɛ kanfɛ ɲaan wɔ̀ tɛ, ábɛɛ ɲakililafɔni-i niŋ tɛ wa? Yibɛɛ baara ki ma-i cii fa sunŋ, nwɔma yi fa ji koŋ tɔri tenŋ wɔ shii i, yɔɔ Kirinŋ wɔ Wulujii ki sunjomaŋ ki ru ábɛɛ tɛ kì. 10Ábɛɛ i yibɛɛ shɛɛri kiri i, Kirinŋ yɛrima ki i ji yi shɛɛri i, tu ŋì i yibɛɛ tu ábɛɛ bilinatɔnŋ kiri kanfɛ, tu yibɛɛ tiri fɔɔbi wu. Yibɛɛ telimaan wuru-i, pɔlimaŋ wuru yi ra kì. 11Yibɛɛ ábɛɛ bataa tenŋ tenŋ pa-i, miŋ tu tiŋ i a daŋ pa-a ɲaan wɔ̀ tɛ. 12Yibɛɛ ábɛɛ racin-i, yi i á siratu, yi i ǹʼbi furu á tɛ, tu á tiri kɛɲɛ Kirinŋ dintɛ bi ki wu. Mìnki ábɛɛ dɔri-i, nwɔma á i de awɔ̀ masabi ki ru, niŋ fa a nɔɔri ki ru.

Tɛsalonikitɔnŋ kiri wɔ bilinabi ki fa kɔ́ɔ́ makwulubi kiri

13Yibɛɛ i baraka bi-a Kirinŋ tɛ waarinŋ bataa ru ábɛɛ bira, sabu yibɛɛ Kirinŋ wɔ wulu wɔ̀ bi-i ábɛɛ tɛ, ábɛɛ niŋ ji konanmini tɔnŋ na wulu gbansanŋ i kì. Ábɛɛ ǹʼji-i Kirinŋ dariwulu ki yɛrima ki i. Mìnki dumiŋ i ji-i sɛli ki ra. Ábɛɛ wɔ̀ri bili-i niŋ wulu ki ra, ŋì i baara ki ma-a ábɛɛ ciiru.

14Yibɛɛ tindaŋ ni, Kirinŋ wɔ konanbi kwuru wɔ̀ri i Yude sɔɔta ki ru, kí i ji bilinabi ki ma Yesu Kirisa ra, ábɛɛ nini naki-i, sabu ábɔɔ konanbi ki á cɔɔri-i ɲaan wɔ̀ tɛ, Yawutu kiri kíbɛɛ cɔɔri-i mìŋ ɲaan tenŋ ki tɛ. 15Mìŋ Yawutu kiri Ŋuntiŋ Yesu kilɛn-i, kí i cintɔnŋ kiri kilɛn sɛbɛ. Kí i ji yibɛɛ yɛrima kiri cɔɔri. Kɔ́ɔ́ bidi Kirinŋ tɛ kì, niŋ fa kí i ji koŋ bataa ɲa a. 16Kí i ǹʼtɛ arì i yibɛɛ suu Kirinŋ wɔ mwubi ki wulu ki sunjo ki sun shiya tɔri kiri tɛ. Niŋ ɲaan ki tɛ, kí i ǹʼbɛɛ bo ta-ri arɔɔ bijɛ kiri sun waarinŋ bataa ru. Nka, Kirinŋ wɔ tɔnkwulu ki rakɔɔra a fɛɛn kí sun.

Pooli i a miiri-ra Tɛsalonikitɔnŋ kiri bi sun

(Mabikiri 17.14–16)

17Ńʼtindaŋ ni, yibɛɛ yi san-i ábɛɛ ra waaci pyaanŋ nu, niŋ ji-i firi ki ra, nka yibɛɛ ɲakili ki san ábɛɛ bi sun kì. Yibɛɛ wuru ǹʼtɛ ɲaan ki bataa tɛ, yi i yi pwulu ta ábɛɛ ja sɛbɛ, sabu ábɛɛ fyii sinaŋ tu-i yibɛɛ ru. 18Yibɛɛ wuru ǹʼtɛ, yi i ta po ábɛɛ tɛ nmaŋ, míŋ Pooli, míŋ ábɛɛ tɛ ta ki gbɛbili-i, kaan tenŋ i kì, nka shitaanni ki yibɛɛ suu ta ki sun.

19Nkɛnŋ ni yibɛɛ gbɛbilimaŋ ki fa yi ciirudi ŋuŋ ki fa yɔɔ ŋununfɛshi ŋuŋ ki i Yesu Kirisa ɲaanfɛ? Ábɛɛ kiri niŋ i, Ŋuntiŋ Yesu ɲaanfɛ, a na shikaŋ ki ru kì wa? 20Sɛli ki ra, ábɛɛ kiri i yibɔɔ ŋununfɛshi ŋuŋ ki fa yi ciirudi ŋuŋ ki i.

Currently Selected:

Tesalonikitɔnŋ kiri (1) 2: JOB

Highlight

Copy

Compare