Korɛntitɔnŋ kiri (1) 1

Pooli wɔ coolinŋ ki Korɛntitɔnŋ kiri tɛ

1Míŋ Pooli wɔ̀ dɔri ji-i Yesu Kirisa wɔ cindaŋ i, ŋì i kɛɲɛ Kirinŋ dintɛ bi ki wu, ŋì i bo yi tindaŋ Sɔsitɛni sun, 2yibɛɛ i sɛbɛ ka bo ta-a Korɛnti kili ki ru bilinatɔnŋ kiri tɛ, Kirinŋ nini wɔ̀ri wɔ bijɛ kiri tu-i kí tɛ Yesu Kirisa baraka ra, ŋì i kí ji awɔ konanbi i, niŋ fa yi i ǹʼbo ta-ri koŋ bataa tɛ mani bataa ru, finŋ woo finŋ i yibɛɛ Ŋuntiŋ Yesu Kirisa tɔ ki dɔri-ra. Mìntiŋ ki i yibɛɛ fa kíbɛɛ bataa Ŋuntiŋ ki i. 3Yi Tiŋ Kirinŋ fa yi Ŋuntiŋ Yesu Kirisa shɔɔrinŋ fa ɲaanfɛfili wɔri á tɛ.

Pooli i baraka bi-a Kirinŋ tɛ

4Míŋ i coolinŋ wɔri-ra ńʼwɔ Kirinŋ ki tɛ waaci bataa ru, awɔ shɔɔrinŋ mamaan ki bira ábɛɛ tɛ Yesu Kirisa gbɛ. 5Yesu Kirisa baraka ra, ábɛɛ ji-i Kirinŋ wɔ kafinŋ ki bataa tiŋ ni i, á i sɛli ki tɔ, niŋ fa á i ǹʼbika tɔ-ri. 6Niŋ i ǹʼji-a tu yibɛɛ Yesu Kirisa wulu wɔ̀ bi-i ábɛɛ tɛ, tu niŋ baraka kila ábɛɛ faninmwuŋ kusɛbɛ. 7Niŋ ki ra, ŋì i yibɛɛ tu Ŋuntiŋ Yesu Kirisa na shikaŋ ki sunsuu-ra, Kirinŋ i kafinŋ wɔ̀ri wɔri-ra awɔ shɔɔrinŋ ki baraka ra, niŋ tɔri dantenŋ waa ábɛɛ ra kì. 8Mìŋ Kirinŋ tenŋ ki a ábɛɛ pa tuka shɔ, fɔ ŋì i ta so waaci rakɔɔra kiri sun, nwɔma pɔlimaŋ fa na kila á ra, yibɛɛ Ŋuntiŋ Yesu Kirisa na shikaŋ ki ru kì. 9Kirinŋ i dariwulutiŋ i, ŋì ábɛɛ dɔri-i, ŋì i á fa a Danshuru, yi Ŋuntiŋ Yesu Kirisa ji bimashi ri i.

Korɛnti kili ki ru bilinatɔnŋ kiri wɔ fubalibi ki

10Ńʼtindaŋ ni, míŋ i ábɛɛ rafɛ-a, ńʼtu á ǹʼma yi Ŋuntiŋ Yesu tɔ ki bira, á i fu tenŋ sun. Á fa ncusun rukila ɲakili i de á faninmwuŋ kì. Á ɲakili kiri ji tenŋ áwɔ bi ma wɔ kiri bataa ra. 11Míŋ i ka bi-a ńʼtindaŋ ni, sabu míŋ ǹʼnama-i Kulowe wɔ kanindaŋ ki bɛɛ tɔnŋ na tu fubalibi ábɛɛ faninmwuŋ nmaŋ. 12Tu ábɛɛ ru, tu ǹʼbɛɛ ri ǹʼbi-a tu : « Míŋ i Pooli wɔ. » Ǹʼtɔri ri i ǹʼbi-ri tu : « Míŋ i Apolɔsi wɔ. » Ǹʼbɛɛ i ǹʼbi-ri tu : « Míŋ i Pyɛɛri wɔ. » Ǹʼtɔri ri i ǹʼbi-ri tu : « Míŋ i Kirisa wɔ. » 13Niŋ na, Kirisa rukilamaan yɛ wa? Kí míŋ Pooli kpinkpi-i suu ki sun ábɛɛ bira wa? Walima ábɛɛ wu-i míŋ Pooli tɔ ra wa? 14Míŋ i Kirinŋ co-a, sabu a Kiripusi fa Gayusi ji-i kì, míŋ koŋ wu ábɛɛ gbɛ nmaŋ kì. 15Niŋ na, koŋ tɔri ra so ǹʼbi-i tu afinŋ wu míŋ tɔ ra kì. 16Aa! Sɛli yɛ ncinŋ! Míŋ Sitefani wɔ kanindaŋ kiri wu-i sɛbɛ. Niŋ kɔɔtɛ, míŋ ɲakili koŋ tɔri ra kili tu míŋ nwɔ̀ wu kì. 17Sabu Kirisa míŋ cin kpeeri wu bira kì, ntiŋ míŋ cin-i tu míŋ na Wulujii ki sunjo. Míŋ i niŋ Wulujii ki bi-a ŋì i kɛɲɛ konanmini wɔ ɲakilitinbi wu kì, nwɔma Kirisa kpinkpi suu sun beŋ ki fa na ji bi gbansanŋ i kì.

Kirinŋ wɔ ɲakilitinbi ki fa ǹʼwɔ sotinbi ki

(Korɛntitɔnŋ kiri (1) 3.18–20; Matiyu 11.25–27)

18A kpinkpisuu ki wulu ji bi-a waarinŋ wɔ̀ ru, niŋ i ji-a julu la wulu kpeeri gbɛ, nwɔ̀ri i fɔni saa ki sun, nka yibɛɛ wɔ̀ri i mwu saa ki sun, yibɛɛ i Kirinŋ wɔ Sotinbi ki ja-a niŋ wulu ki ru. 19Ǹʼyɔ miŋ tu ǹʼsɛbɛ-i Kirinŋ wɔ wulu ki ru ɲaan wɔ̀ tɛ tu :

« Míŋ a bitɔtɔnŋ kiri wɔ bitɔbi ki li,

ŋí i ɲakilitiŋ kiri wɔ ɲakilitinbi ki ji bi tawɔ ɔ. »#Esayi 29.14.

20A Kirinŋ ji ǹʼbi ninkunŋ, bitɔtɔnŋ ki da kili? Sariya kalimɔɔ ki da? Ka juniɲa ka ru wulutɔtɔnŋ ki da? Kirinŋ juniɲa nu bitɔbi kiri bataa ji julu la bi kì wa? 21Juniɲa nu konaŋ kiri fa arɔɔ bitɔbi ki sun, kí Kirinŋ wɔ bitɔbi ki mabi ki ja-i, nka kí so ǹʼtɔ-i kì. Sɛli ki ra, yibɛɛ i wulu wɔ̀ sunjo-a, niŋ i ji konaŋ kiri ɲaanna julu la wulu u, Kirinŋ niŋ ji-i mwu saa a, a ra bilinatɔnŋ kiri tɛ. 22Yawutu kiri i taanmashɛ ri ceeli-la, shiya tɔri kiri i bitɔbi ceeli-li. 23Yibɛɛ i ǹʼsunjo-a tu Kirisa kpinkpi suu sun, niŋ wulu ki i Yawutu kiri yaa-ri, ŋì i ji julu la wulu u shiya tɔri kiri ɲaanna. 24Nka Kirinŋ nwɔ̀ri dɔri-i, Yawutu bili shiya tɔri sun, yibɛɛ i Kirisa wulu wɔ̀ sunjo-a, niŋ i Kirinŋ wɔ sotinbi ki fa ǹʼwɔ bitɔbi ki ji-a. 25A Kirinŋ wɔ bi mamaan ki ji julu la bi i konaŋ kiri ɲaanna, kí ǹʼtɔ tu niŋ julu la bi ki fwuu konanmini wɔ ɲakilitinbi ki bataa sun, tu kí i nwɔ̀ ji-ri Kirinŋ wɔ baraka balibi, tu niŋ i fwuu kɔ́ɔ́ barakatinbi kiri bataa sun.

26Míŋ tindaŋ ni, ábɛɛ yɛrima kiri á yɛri shɛɛli, Kirinŋ ábɛɛ wɔ̀ri dɔri-i, á i ji ǹʼpa ǹʼcɛfan, ŋì i kɛɲɛ konanmini wɔ miirika ɲaan ki wu, bitɔtɔnŋ mwɔɔnna ábɛɛ ru kì, faantiŋ mwɔɔnna dumiŋ á ru kì, koŋ tɔtiŋ sinaŋ mwɔɔnna ni á ru sɛbɛ kì. 27Nka bi wɔ̀ i julu la bi i juniɲa nu konaŋ kiri ɲaanna, Kirinŋ ninki shi-i, ŋì i ɲakilitiŋ kiri ɲaankwun, faan finŋ wɔ̀ ru juniɲa nu konaŋ kiri ɲaanna kì, ŋì i niŋ shi, ŋì i faantiŋ kiri ɲaankwun.

28Konaŋ kiri ɲaanna, koŋ wɔ̀ri finŋ tɔri kì, koŋ wɔ̀ri bi tɔ-a kì, kí i kí bikwɔ-ri arì sun, Kirinŋ niŋ koŋ gbansanŋ kiri ɲaannashi-i, nwɔma a i konaŋ kiri ɲaanna koŋ sinaŋ kiri ji koŋ gbansanŋ ni i.

29Ŋì niŋ ma-i, nwɔma koŋ tɔri dantenŋ fa na a yɛri ragbɛ afinŋ Kirinŋ ɲaanfɛ kì. 30Nka Kirinŋ baraka ra ábɛɛ fa Yesu Kirisa i tenŋ i. Kirinŋ Kirisa ji-i yibɛɛ fa ábɔɔ ɲakilitinbi ki fa yɔɔ telibi ki i. Kirinŋ i yibɛɛ ji-a koŋ fɔɔmaan ni i a ɲaanfɛ, ŋì i yi ji awɔ konanbi i, ŋì i yi mwu san-ni bijɛ ki wu Kirisa bira, 31miŋ tu ǹʼsɛbɛ-i Kirinŋ wɔ wulu ki ru ɲaan wɔ̀ tɛ tu : « A koŋ ji-a a yɛri ragbɛ, ntiŋ a yɛri ragbɛ Ŋuntiŋ ki ra. »

Currently Selected:

Korɛntitɔnŋ kiri (1) 1: JOB

Highlight

Copy

Compare