Roma 6

Ita tenki husik ita nia sala hodi moris tuir Maromak nia hakarak

1Se nunee, agora ita atu dehan saida? Keta halo be ema ruma hanoin nunee: “Se Maromak hatudu Nia laran diak ba ema nebee mak halo sala, entaun diak liu ita halo sala nafatin atu nunee Maromak hatudu liu tan Nia laran diak mai ita.” 2Nee la loos! Tanba kona ba sala, ita hanesan mate tiha ona, i ema nebee mate la halo tan sala ona.

3Tuir loloos imi hatene, momentu ita hotu simu batizmu para ita sai laran ida ho Kristu Jesus, nee hanesan ita mos mate hamutuk ho Nia. 4Bainhira ita simu batizmu, ita hanesan mate tiha ona no hakoi hamutuk ho Kristu. Ita tenki mate uluk ho Nia atu ita bele moris foun, hanesan mos Kristu moris fali ona hosi mate liu hosi Aman Maromak nia kbiit boot.#Kolose 2:12

5Ita sai laran ida ona ho Kristu tanba ita hanesan mate tiha ona hamutuk ho Nia. Entaun klaru katak ita mos sei moris fali hanesan Nia.

6Ita hatene katak, uluk ita hakarak halo buat aat oi-oin. Maibee agora, bele dehan, ita nia moris ida uluk nee, la iha tiha ona, tanba ita prega tiha ona ita nia moris ba iha krus hamutuk ho Kristu. Nunee ita laos atan ona ba sala, 7tanba ema nebee mate tiha ona ba sala, nia livre ona hosi sala.

8Entaun, se ita mate ona ho Kristu, ita fiar katak ita mos sei moris hamutuk ho Nia. 9Ita hatene katak, tanba Kristu moris fali ona hosi mate, entaun Nia sei la mate tan. Mate la domina ona Nia. 10Nia mate dala ida hodi halakon tiha sala nia kbiit. Maibee agora, Nia moris fali hodi halo Maromak nia hakarak.

11Imi mos tenki konsidera imi nia aan nunee: imi hanesan mate tiha ona ba sala, nee mak sala la domina imi nia aan ona. Nunee, agora imi tenki moris hodi foti aas Maromak, tanba imi laran ida ho Jesus Kristu.

12Nee duni, la bele husik sala domina imi nia aan nebee too loron ida sei mate. La bele tuir fali buat aat sira nebee mak imi nia aan hakarak halo. 13La bele foo imi nia isin lolon para halo sala, hanesan fali buat nebee ema uza hodi halo sala. Maibee foo imi nia aan tomak ba Maromak, hanesan ema nebee uluk mate tiha ona, maibee agora moris. Nunee entrega imi nia isin lolon ba Nia para Nia uza hodi halo buat nebee mak loos. 14Tanba sala la domina ona imi. Agora imi la moris ona iha Moisés nia lei nia okos, maibee Maromak nia grasa mak domina fali imi.

Ita sai atan nebee halo serbisu tuir Maromak nia hakarak

15Se ita la moris ona iha lei relijiaun judeu nia okos, maibee Maromak nia grasa mak domina fali ita, entaun ita bele moris nafatin iha sala nia laran ka? La bele!

16Imi hatene katak, se imi foo imi nia aan ba ema seluk hodi halo tuir nia hakarak, nee hanesan imi sai ona atan ba ema nee. Nunee mos se imi foo aan hodi halo sala, imi sai atan ba sala, i too ikus sala nee halo imi mate tinan ba tinan. Se imi foo aan hodi halo tuir Maromak nia hakarak mak sei lori imi ba moris loos.

17Hau foo agradese ba Nai Maromak, uluk imi sala nia atan, maibee agora ho laran tomak imi moris tuir ona hanorin loos nebee imi simu tiha ona. 18Maromak hasai ona imi hosi sala nia laran, i agora imi sai fali atan ba moris loos nian.

19Hau foo ezemplu loro-loron nian hosi patraun ho atan tanba se lae susar ba imi atu komprende. Uluk imi foo imi nia isin lolon sai atan ba sala, nebee halo imi sai ema moris iha sala, too imi nia hahalok aat aumenta ba bebeik. Agora nee imi tenki foo imi nia isin lolon sai atan ba moris loos nian, too imi sai ema nebee moris ho laran moos.

20Uluk imi sei atan ba sala, imi la hatene lia loos. 21Iha tempu nebaa imi simu buat diak saida hosi imi nia sala nee? La iha! Imi nia sala so halo moe deit imi, i too ikus lori imi ba mate.

22Maibee agora Maromak halo imi livre ona hosi sala, i imi sai ona Maromak nia atan. Buat diak nebee imi simu mak nee: Imi sai ema nebee moris ho laran moos, nunee iha ikus imi sei hetan moris rohan-laek. 23Tanba konsekuensia ba ema nebee moris iha sala mak mate. Maibee moris rohan laek, Maromak foo gratis deit ba ema nebee fiar iha Kristu Jesus, ita nia Nai.

Currently Selected:

Roma 6: BTDT

Highlight

Copy