Marcos 5

Nai Jesus duni sai espiritu aat barak hosi ema ida

(Mateus 8:28-34; Lucas 8:26-39)

1Nee liu tiha, Jesus ho Nia eskolanti sira too iha tasi Galileia nia sorin baa, iha ema Gerasa nia rain.

2-6Iha fatin nee, iha mane ida, espiritu aat tama iha nia, too nia bulak. Nia hela iha rate laran. Loron-kalan nia lao tuun-sae foho, molik hela i hakilar bebeik. Nia tuku nia aan rasik ho fatuk, too kanek tiha hotu. Mane nee forti la halimar. La iha ema mak bele kesi nia. Maski ema kesi bebeik nia liman-ain ho korenti besi mos, nia rasta kotu hotu kedas. I argola iha nia ain mos rahun. Nia forti teb-tebes, la iha ema ida bele kaer nia.

Bainhira Jesus sira tuun hosi bero, ema bulak nee haree Nia hosi dook. Depois nia sai hosi rate laran, i nia baa lalais hakneak iha Jesus nia oin. 7-8Jesus haree ema nee, Nia hatete, “Espiritu aat! Sai hosi ema nee!”

I ema nee hakilar makaas, “O atu halo saida mai hau?! Hau hatene O nee Jesus, Nai Maromak mak boot teb-tebes nia Oan. Hau husu ba O keta halo terus hau.”

9Liu tiha Jesus husu ba nia, “O naran saa?”

Ema nee hataan, “Hau nia naran, Lejiaun, tanba ami espiritu barak teb-tebes, hanesan tropas sira nia bataliaun barak.”#5:9:Iha tropas estadu Roma nian, lejiaun ida, mais-ou-menus ema rihun neen.

10I espiritu aat sira uza ema nee hodi husu ba Jesus, atu keta duni sira sai hosi rai nee.

11Besik fatin nee, iha ema balu hein hela fahi rihun rua, nebee sukit hela rai, iha foho lolon. 12I espiritu aat sira husu ba Jesus, “Haruka ami baa tama deit iha fahi sira nebaa.”

13Rona nunee, Jesus mos konkorda. I espiritu aat sira sai kedas hosi ema nee, baa tama fali iha fahi sira. Fahi sira halai saruntu malu tuun ba foho ninin i monu hotu ba bee laran. Nunee fahi rihun rua sira nee mout too mate hotu.

14Haree nunee, fahi atan sira tauk teb-tebes. I sira halai ba foo hatene iha aldeia-aldeia besik fatin nee. Too ema barak mai haree rasik saida mak akontese. 15Bainhira sira hetan Jesus, sira mos haree mane nebee uluk espiritu aat tama nee, tuur hakmatek hela. Ninia hanoin hanesan fali bai-bain i hatais fali hena ona. Haree nunee, ema sira tauk, tanba sira hatene ona, ema nebee duni sai espiritu aat barak nee, Nia iha kbiit boot teb-tebes. 16Depois ema sira nee konta ba malu dehan, sira haree rasik ho matan ema bulak nee diak tiha ona, i fahi sira nee mout too mate tiha hotu. 17Tuir mai, ema iha rai nee husu ba Jesus para sai tiha hosi sira nia rain.

18Bainhira Jesus atu sae fali ba bero, ema nebee espiritu aat foin sai nee, mai husu ba Jesus dehan, “Hau hakarak tuir Ita Boot.”

19Maibee Jesus lakohi. Nia dehan, “Diak liu o fila baa konta ba o nia familia sira hotu, saida mak Nai Maromak halo ona ba o. I foo hatene mos katak, Nai Maromak hadomi tebes o.”

20Entaun ema nee lao lemo-lemo iha rai ida naran ‘Dekapolis’. (Nee katak, rai nee iha sidade sanulu.) Nia konta saida mak Jesus halo ona ba nia. Ema hotu nebee rona nia koalia nee, sira admira dehan, “Tebes duni!”

Nai Jesus halo moris fali Jairo nia oan, i kura feto ida nebee nia raan suli la para

(Mateus 9:18-26; Lucas 8:40-56)

21Tuir mai Jesus sira sae fali bero hodi baa iha tasi sorin baa. Bainhira sira tuun hosi bero, ema barak mai hobur Jesus. 22Iha mos ema ida naran Jairo. Nia toma-konta uma kreda Judeu iha sidade nee. Bainhira nia haree Jesus, nia baa hakneak iha Jesus nia oin, 23hodi husu ho laran tomak dehan, “Senhor, tulun hau lai! Hau nia oan feto moras todan, besik mate. Nia foin tinan sanulu resin rua. Favoor, Ita Boot mai kura nia lai.”#5:23:Lian Gregu hakerek dehan, “Nai, favor ida, mai tau liman ba nia, para nia bele diak fali, i bele moris.” Iha nebaa, ‘tau liman’ nee katak ‘halo diak’. Labarik feto nia idadi nee, iha lian Gregu tama iha versikulu 42.

24Entaun Jesus tuir Jairo baa iha nia uma.

Maibee bainhira sira lao baa, ema barak mos tuir Nia, too sena malu metin.

25Iha ema sira nee, iha feto ida, nia fulan mai maibee nunka maran loloos, duranti tinan sanulu resin rua. 26Nia hasai ona osan no sasaan hotu nebee nia iha, hodi selu deit doutor sira. Maibee la iha ema ida mak bele kura nia. Nia moras nee aumenta todan ba bebeik. 27-29Feto nee rona ona buat barak kona ba Jesus. Nunee nia sena malu hosi ema barak nia leet, atu baa besik Jesus nia kotuk. Nia hanoin dehan, “Naran katak hau kona kois deit Nia hena mos, hau diak ona.”

Momentu nia kona Jesus nia hena, derepenti nia raan maran kedas. Nia senti diak ona.

30Iha momentu nee, Jesus senti iha forsa ida sai hosi Nia laran. I Nia fila ba kotuk, hodi haree ema barak nee. Nia husu, “See mak kona Hau nia hena nee?”

31Nia eskolanti sira hataan, “Nai rasik haree deit baa. Ema iha nee barak la halimar mak tuli malu baa-mai! Halo nusaa mak Ita Boot husu fali, ‘See mak kona Hau nia hena nee?’ ”

32Maibee Jesus haree baa-mai, atu buka hatene see loos mak kona Nia hena. 33Rona Jesus koalia hanesan nee, feto nee tauk atu mate. Depois nia baa hakneak iha Jesus nia oin, hodi foo sai, “Senhor, hau mak ohin kona Ita Boot nia hena.”

34Depois Jesus dehan, “Tanba senhora fiar teb-tebes mai Hau, nee mak ita diak ona. Agora senhora bele fila ona ho laran hakmatek, tanba ita la hetan tan terus nee ona.”

35Jesus sei koalia hela nunee, iha ema ida mai hosi Jairo nia uma, foo hatene, “Koitadu! Oan feto iis kotu tiha ona. Tan nee, lalika halo kolen tan Mestri. Nia lalika baa tan uma ona.”

36Maibee Jesus la interese ema nee nia koalia, i Nia hatete ba Jairo, “Keta laran susar! Ita fiar deit ba Maromak.” 37Depois Jesus lao husik hela Nia eskolanti balu. Nia lori deit Pedro, Tiago ho João, i sira baa ho Jairo.

38Bainhira sira too iha Jairo nia uma, sira haree ema barak fadigadu hela halerik i tanis hakilar. 39Jesus tama ba iha uma laran, Nia husu ba sira dehan, “Tanba saa mak imi hotu fadigadu i tanis hanesan nee? Labarik nee la mate ida. Nia toba deit.”

40Rona Jesus koalia nunee, sira hotu hamnasa goza Nia.

Depois Nia haruka sira hotu sai. I Nia bolu labarik nee nia inan-aman ho Nia eskolanti nain tolu nee, para sira tama hamutuk ba iha labarik nee nia kuartu laran. 41Depois Jesus kaer labarik nee nia liman, i dehan ho sira nia lian Aram nunee, “Talita kum!” (Nee dehan katak, “Noi, hadeer ona!”)

42-43Derepenti deit, anoi hadeer i lao kedas. I Jesus hatete ba labarik nee nia inan dehan, “Foo hahaan ba labarik nee.”

Ema hotu iha fatin nee, admira teb-tebes. Maibee Jesus bandu makaas ba sira dehan, “Imi la bele konta sai ba ema seluk dehan, Hau mak halo moris fali labarik nee!”

Currently Selected:

Marcos 5: BTDT

Highlight

Copy

Compare