Mateus 15

Maromak nia lei ho ema judeu sira nia lisan

(Marcos 7:1-13)

1Loron ida ema Farizeu balu ho mestri relijiaun balu mai hosi Jerusalém atu hasoru malu ho Jesus. Too iha nebaa sira husu ba Nia, 2“Tuir ita nia bei-ala sira nia lisan, molok atu haan tenki fasi liman lai. Maibee Ita Boot nia eskolanti sira lae. Nusaa mak sira kontra fali ita nia lisan nee?”

3Jesus hataan dehan, “Nusaa mak imi kontra Maromak nia lei tanba deit imi hakarak tuir imi nia lisan? 4Tanba Maromak hatete, ‘Respeita o nia inan-aman.’ Nia mos dehan, ‘See mak foo malisan ba nia inan ka nia aman, ema nee sei hetan kastigu mate.’#Ezodu 20:12; 21:17; Levitiku 20:9; Deuteronomio 5:16 5Maibee imi hanorin oin seluk fali. Tuir imi, ema bele hatete ba nia inan ka nia aman dehan, ‘Sasaan nebee apaa ho amaa presiza, hau la bele foo, tanba hau promete ona atu foo ba Maromak.’ 6Nunee imi hanorin ema atu la respeita sira nia inan-aman. Imi halakon tiha Maromak nia lei tanba deit imi hakarak halo tuir imi nia lisan. 7Imi ema laran makerek, Imi koalia oin ida, hahalok oin seluk! Buat nebee hori uluk kedas profeta Isaias hakerek, kona loos imi. Nia foo tutan Maromak nia Liafuan nunee:

8‘Povu nee hahii Hau ho ibun,

maibee sira nia laran dook hosi Hau.

9Sira adora Hau

maibee la iha folin.

Sira hanorin deit ema nia lei.’ ”#Isaías 29:13

Hahalok aat mai hosi ema nia fuan laran mak halo ema foer

(Marcos 7:14-23)

10Depois Jesus bolu ema hotu iha nebaa atu mai besik. I Nia dehan ba sira, “Rona mai, i komprende didiak Hau nia liafuan nee. 11Buat nebee tama ba ema nia ibun, nee la halo foer nia iha Maromak nia oin. Maibee buat nebee sai hosi ema nia ibun, nee mak halo foer nia.”

12Jesus nia eskolanti sira mai dehan ba Nia, “Ita Boot hatene ka? Ita Boot nia liafuan ohin nee xoke loos ema Farizeu sira.”

13Maibee Jesus hataan ba sira dehan, “Ai horis hotu-hotu nebee laos Hau nia Aman iha lalehan mak kuda, sei fokit sai hotu too nia abut sira. 14Husik baa! Sira nee hanesan ema matan delek nebee hatudu dalan ba ema matan delek seluk, too ikus sira hotu monu ba rai kuak.”#Lucas 6:39

15Pedro husu, “Mestri, komparasaun ohin kona ba buat nebee halo ema foer nee, dehan saida?”

16Jesus hataan, “Imi la komprende nafatin ka? 17Imi hatene katak buat nebee ema haan liu hosi nia ibun sei tama iha nia kabun laran depois sai fali. 18Maibee buat nebee mak sai hosi ema nia ibun mai hosi nia laran. Ida nee mak halo foer nia.#Mateus 12:34 19Tanba hosi ema nia laran mak mosu sala sira nee: hanoin aat, oho ema, halo sala ho ema nebee laos o nia feen ka o nia laen, sala seksual selu-seluk, naok, foo sasin falsu i hatete aat ema. 20Hahalok sira nee mak halo ema sai foer iha Maromak nia oin. Laos haan la fasi liman mak halo sira sai foer.”

Feto Kanaán ida fiar makaas ba Jesus

(Marcos 7:24-30)

21Depois Jesus husik tiha fatin nee hodi baa fali iha rai ida besik sidade Tiru ho Sidon. 22Iha nebaa, iha feto Kanaán ida hosi rai nee mai hasoru Jesus. Nia husu tulun ho lian makaas dehan, “Nai, Liurai David nia Jerasaun, hanoin hau lai! Hau nia oan feto, espiritu aat tama iha nia laran halo nia terus liu.”

23Maibee Jesus la hataan buat ida. I Nia eskolanti sira mai hatete ba Nia dehan, “Senhora nee hakilar la para iha ita nia kotuk, diak liu haruka nia fila.”

24Maibee Jesus hataan dehan, “Maromak haruka Hau mai atu ajuda deit ema Israel, tanba sira hanesan bibi malae nebee lao sala dalan ona.”

25Maski nunee senhora nee baa hakbesik aan iha Jesus nia oin i hakneak hodi dehan, “Nai, ajuda hau.”

26Jesus soe lia dehan, “La bele foti labarik nia hahaan soe fali ba asu. Nee la loos.”#15:26 Iha nee, labarik hatudu ba ema Judeu, i asu hatudu ba ema nebee mak laos Judeu.

27Senhora nee hataan fali dehan, “Loos duni Nai, maibee asu sira bele hili labarik nia hahaan nebee mak monu iha meza okos.”

28Rona nunee Jesus dehan, “Senhora, ita nia fiar makaas! Saida mak ita husu sei akontese duni.” Iha oras nee kedas senhora nee nia oan feto diak fali.

Nai Jesus kura ema barak

29Depois Jesus husik tiha fatin nee, lao tuir tasi Galileia nia ninin. I Nia sae ba foho ida hodi tuur iha nebaa. 30I ema barak nadodon mai iha Nia. Sira lori sira nia maluk nebee moras oi-oin hanesan: ain maten, ain aat, matan delek, monok, ho ema moras selu-seluk tan. Sira tau ema sira nee iha Jesus nia ain, i Nia kura sira hotu. 31Ema hotu admira bainhira sira haree saida mak Jesus halo nee. Ema nebee uluk monok agora bele koalia, ema ain maten ho ain aat bele lao, i ema matan delek bele haree. Entaun sira hotu hahii Israel nia Maromak.

Nai Jesus foo hahaan ba ema rihun haat

(Marcos 8:1-10)

32Depois Jesus bolu Nia eskolanti sira hodi dehan, “Hau hanoin loos ema barak nee. Sira hamutuk ho Hau loron tolu ona, i sira nia hahaan la iha ona. Hau lakohi haruka sira fila ho kabun mamuk. Se lae sira oin nakukun, bele monu iha dalan.”

33Nia eskolanti sira hataan, “Rai nee fuik. Ita atu hetan hahaan hosi nebee hodi foo ba ema barak hanesan nee?”

34Jesus husu, “Imi iha paun fuan hira?”

Sira hataan, “Iha deit paun fuan hitu ho ikan kiik-oan balu.”

35Depois Jesus haruka ema barak nee tuur hotu iha rai. 36Nia foti paun fuan hitu ho ikan nee hodi foo agradese ba Maromak. Nia silu halo rohan-rohan, i foo ba Nia eskolanti sira hodi fahe ba ema barak nee. 37Sira hotu haan too bosu. Depois Nia eskolanti sira tau hamutuk hahaan nebee resin iha bote hitu nakonu. 38Ema nebee haan nee, rihun haat. Nee mane deit, feto ho labarik la sura.

39Hotu tiha Jesus haruka ema barak nee fila. Depois Nia baa sae bero hodi baa iha rai Magadán.#15:39:Fatin nee la klaru iha nebee. Ho lian Gregu balun dehan Madala, balun hakerek dehan Magadán.

Currently Selected:

Mateus 15: BTDT

Highlight

Copy