Jenesis 35

Jacó sira halai ba Betél

1Nee liu tiha, Nai Maromak koalia ho Jacó, dehan, “Hau nee Maromak ida nebee hatudu Aan ba o momentu o halai hosi o nia maun Esaú. Agora, o muda ba Betél. Too iha nebaa, halo altar ida mai Hau. I hela ona iha nebaa.”

2-3Depois Jacó hatete ba nia familia uma laran tomak, dehan, “Agora, ita hotu atu muda ba aldeia Betél. Iha nebaa, hau atu halo altar ida hodi adora Nai Maromak. Nia mak tulun hau bainhira hau iha susar laran. I Nia sempre hamutuk ho hau iha nebee-nebee deit. Nee duni agora, imi hasai tiha imi nia estatua lulik sira hotu. Imi hariis tiha, troka tiha imi nia hena, tanba ita atu baa adora Maromak.” 4Depois sira entrega sira nia estatua lulik ho sira nia brinkus sira hotu.#35:4:Tempu nebaa, brinkus iha figura lulik nian. I Jacó hakoi sasaan sira nee hotu iha ai huun boot ida besik aldeia Sikem. 5Bainhira Jacó sira sai hosi rai Sikem, Nai Maromak halo tauk ema sira nebee hela haleu sidade nee, too ema ida la brani halo aat ba sira.

6Nunee Jacó sira hotu too ho diak iha aldeia Betél (uluk naran Lus), iha rai Kanaán. 7Iha nebaa, Jacó halo altar ida hodi fatuk, i nia bolu fatin nee, El-Betél, (nee dehan katak ‘Betél nia Maromak’), tanba uluk Nai Maromak hatudu Nia Aan ba Jacó iha nebaa, momentu nebee nia halai hosi nia maun.

8Iha ai huun boot ida besik iha aldeia Betél, nebee ema bolu Alon Bakute, nee dehan katak ‘ema tanis lelir iha ai huun nee’. Ema foo naran nee, tanba feto ida nebee hein Rebeca bainhira nia sei kiik, naran Debora, mate iha nebaa, i sira tanis lelir hodi hakoi nia iha ai huun boot nee.

9Bainhira Jacó fila ona hosi Mezopotámia, Nai Maromak hatudu Aan dala ida tan, hodi foo bensaun ba nia.#35:9:Lian orijinal dehan ‘Padan Arán’. Nia naran seluk Mezopotámia. Agora rai nee halo parte rai Síria norte nian, besik Irake. 10Maromak hatete, “Komesa agora, o nia naran, laos tan Jacó. Maibee Hau tau o nia naran foun mak nee: Israel.#35:10:Israel dehan katak ‘deut malu ho Maromak’. 11Hau Maromak Boot Liu. O tenki iha oan ho bei oan bara-barak ba. Nasaun barak sei sai hosi o nia jerasaun, i liurai barak mos sei sai hosi o. 12Rai nebee Hau foo ona ba o nia avoo Abraão ho o nia aman Isac, agora Hau foo ba o ho o nia jerasaun sira.”

13Koalia hotu nunee, Nai Maromak sae fali ba lalehan. 14I Jacó harii fatuk ida hanesan sinal hodi hanoin Maromak nia promesa. I nia fui tua uvas ho mina azeiti ba fatuk leten, hodi adora Maromak. 15Fatin nee nia tau naran Betél.

Raquel mate

16Nee liu tiha, Jacó sira sai hosi Betél. Bainhira sira besik ona Efrata (mak Belém), Raquel nia loron tuur ahi mos too. Maibee nia tuur ahi susar. 17Bainhira nia kanotak moras makaas, parteira dehan ba nia, “Senhora Raquel! Hakaas aan, tanba ita hetan oan mane ida tan.” 18Bainhira nia iis atu kotu, nia tau naran ba labarik nee Benoni, (nee dehan katak ‘oan terus’). Depois nia mate. Maibee Jacó tau labarik nee naran Benjamim, (nee katak, ‘oan liman loos’).

19I sira hakoi Raquel iha dalan ninin atu baa iha Efrata, (nebee agora naran Belém). 20Jacó hada tiha rate nee. Too ohin loron, rate nee sei iha.

Jacó nia oan sira

21Liu tiha nee, Jacó#35:21:Dokumentu antigu dehan ‘Israel’. Israel nee Jacó nia naran seluk. kontinua nia viajen. Dala ida, nia halo tenda iha uma aas Eder nia sorin baa. 22Bainhira sira sei iha fatin nee, Ruben halo fali relasaun seksual ho nia aman nia feen kiik, Bila. Jacó rona buat nee, nia hirus teb-tebes.

Jacó nia oan mane nain sanulu resin rua.

23Lea nia oan mak nee: Ruben (Jacó nia oan mane boot), Simeão, Levi, Judá, Isakar, ho Zebulón.

24Raquel nia oan mak nee: José ho Benjamim.

25Raquel nia atan Bila nia oan mak nee: Dan ho Naftali.

26I Lea nia atan Zilpa nia oan mak nee: Gad ho Asér.

Jacó nia oan sira nee moris iha Mezopotámia.#35:26:Lian orijinal dehan ‘Padan Arán’. Nia naran seluk Mezopotámia. Agora rai nee halo parte rai Síria norte nian, besik Iraque.

Jacó nia aman Isac mate

27Depois Jacó baa haree nia aman Isac iha Manre besik aldeia Kiriate-Arba (nee mak agora naran Hebron). Uluk nia avoo Abraão mos hela iha fatin nee. 28-29Isac moris too nia tinan 180, foin nia mate. I nia oan Esaú ho Jacó hakoi nia.

Currently Selected:

Jenesis 35: BTDT

Highlight

Copy