1 Tione 3

1Ɂau ka niɂirae rikaɂa soɂona ɂare ɂaiɂe. Waratoɂo ɂe iria ɂi koru hakae tarena noɂo. Ɂare nena ɂe haataɂania raetoɂoha naia hana koru ɂe tohonani rete rikaɂa. Ma ɂi koru hakae tarena waraɂimori noɂo. Taɂaa ni maraukari ɂaiɂe kira mae raea ɂi koru hakae tarena Waratoɂo, tona ɂana kira mae raea Maamana koru ke. 2Rikimana hihikuma nau, ɂihaitaa ana horoɂa ɂaiɂe ɂi koru hakae tarena Waratoɂo noɂo, taɂa ɂe mae hane taha kane hana koru ka reesia rauta ni noni ɂutaa ɂi koru ka rao rau hai. Taɂa, koru raea noɂo, koru kae rau mara Tisasi, tona ɂana koru ka rao reesia ɂi naia waraɂimori ana ɂe ka rao hane taha ana horoɂa ɂe ka rao ori mai na. 3Rikimana noni kira ka ririo maasia rikitaɂiha nena ka rao rau ana kira tona ɂana Tisasi, ɂe hatonana hii noni nena, kira ani tau ana ɂare ɂe otooto, mara Tisasi Karaesi ɂe otooto.

4Taɂa, rikimana noni ɂe ka haɂe tau taua mae senaha, ɂe hehenoroɂa ana wara otooto Waratoɂo. Mae senaha ɂe hehenoroɂaha ana wara otooto Waratoɂo. 5Ɂau raea noɂo, wau sii Karaesi ɂe hane taha kosuna mako ɂaiɂe hana tata ana rikimana mae senaha koru maani koru. Ma mae senaha ɂe mao ana Karaesi. 6Tona ɂai, rikimana noni kira ɂoni toɂo ana norutoɂoha kira ana Tisasi, kira ka mae haɂe ɂoni ɂoni ana mae senaha. Taɂa, rikimana noni kira ani ɂoniha ana mae senaha, kira mae rio raea Karaesi ma kira mae hiku taɂe rihi haɂania.

7Tamai, hakae tareku, ɂau ka ririo ana ɂau tautauma te noni ɂe kaesi ɂau. Atai noni ɂe ka haɂe tau taua ɂare ɂe otooto, ɂi naia ɂe otooto ana maana Waratoɂo, mara ɂi naia Karaesi ɂe otooto ana maana Waratoɂo. 8Ma atai ɂe ka haɂe tau taua mae senaha, ɂi naia ɂe hakae tarena Saetana, tona ɂana Saetana ɂe ani tau ana ɂare mae sena wau sii mai, taraɂae naɂo hana rua marahuna koru kira rua teke raona mae senaha. Miɂi Tarena Waratoɂo ɂe hane taha hana haɂasiko ana rikimana toɂiha Saetana. 9Rikimana noni kira huta haoru noɂo ana Waratoɂo, kira ka mae haɂe ɂoni ɂoni ana mae senaha, tamana warahana Waratoɂo ɂe ɂoni toɂo ana kira. Ma kira si haɂe ɂoni ɂoni ana mae senaha, tona ɂana kira huta haoru ana Waratoɂo noɂo. 10Tona ɂai, koru rae rio rae ana atai ɂe mera Waratoɂo, ma atai ɂe mera Saetana. Rikimana noni kira ka mae haɂe tau taua ɂare ɂe otooto moa ka mae raetoɂo ana haka ni waɂana ma hahonena ana Karaesi, ɂi kira, kira mae mera Waratoɂo.

Ɂe Hana Koru Ka Raetoɂo Ana Koru

11Wara otooto ne ɂau noro sikoa noɂo, taraɂae ana horoɂa ɂau piɂi norutoɂo ana Tisasi, ɂe ɂuriɂe, “Koru ka raetoɂo ana ɂi koru siko.” 12Koru si ɂuri hana Keeni, ne naɂo ni enisero mae sena, Saetana ɂe toɂo ana. Keeni ɂe waɂi maesia waɂana ke. Ɂe tamana ɂitaa Keeni ɂe waɂi maesia Ɂaiporo na? Ɂe waɂi maesia waɂana, tamana totoraha Ɂaiporo ɂe otooto ma raena Keeni ɂe mae toɂo ana Ɂaiporo tona ɂana totoraha ɂi naia Keeni ɂe mae sena. 13Ma ɂi ɂau, haka ni waɂaku ma hahoneku, taɂaa ni apa kira si raetoɂo ana ɂau. Ɂau si rahea ɂare nena.

14Ma tamana koru ani raetoɂoha ana haka ni waɂana ma hahonena koru ana Karaesi na, koru raea noɂo, koru raa maania maeha noɂo hi raona mauriha. Atai noni raetoɂoha ɂe mao ana, ɂe ɂoni raona maeha kane. 15Rikimana noni ne kira ka mae raetoɂo ana waɂana moa hahonena kira, ana maana Waratoɂo kira noni hani waiɂha. Ma ɂau raea noɂo, noni hani waɂiha mauriha taraunaɂi ɂe mao ana.

16Tisasi ɂe watea maraana hana maeha honosi koru. Tona ɂai, koru raea noɂo, raetoɂoha waraɂimori ɂe ɂare ɂutaa. Tamai, ɂe hana koru ka maroɂita hana maeha hana haka ni waɂana ma hahonena koru ana Karaesi. 17Ɂaremara te noni ɂe ka toɂo ana toɂoɂareha hana ɂoniɂoniha kosuna mako ɂaiɂe ma ɂe reesia poɂopoɂoha rikaɂa ɂe ana waɂana moa hahonena, taɂa ɂe ka mae haipoonia, ma ɂi naia, ɂe haataɂania raetoɂoha hana Waratoɂo ɂe mao ana noni nena. 18Hakae tareku, koru si iria koru raetoɂo ana taɂaa Waratoɂo ana naɂaha horaɂai. Taɂa, haipooniha koru ka tau tauɂi hana kira na ɂe haataɂania raetoɂoha waraɂimori ɂe ana koru.

19Raetoɂoha koru nena hana taɂaa Waratoɂo, ɂe ka rao taua koru raea waraɂimoriha Waratoɂo ɂe ɂoni toɂo ana koru. Tona ɂai, raena koru ɂe si iki naɂo hana Waratoɂo ana hoɂaha koru tarea. 20Ɂihaitaa niɂiraehana koru ɂe ka oro wara haahi koru, taɂa raeuruha Waratoɂo hana koru ɂe paina taroriua niɂiraehana koru. Ma Waratoɂo ɂe raea rikimana ɂare soɂona koru. 21Rikimana hihikuma nau, ɂaremara niɂiraehana koru ɂe ka mae oro wara haahi koru, ma koru ka ɂoni hahuru noɂo ana norutoɂoha koru naɂo hana Waratoɂo. 22Ma ɂaremara koru ka sukaa hana taɂena ɂare, ma koru ka rao tarahuaa maania, tona ɂana koru ka roɂo roɂo soɂona hii wara otooto naia na ma koru ka tau taua hii ɂare ne kira rete ana. 23Ma Waratoɂo ɂe iria wara otooto ɂaiɂene hana koru. Ɂe iria hana koru hana koru ka norutoɂo ana Miɂi Naia, ratana Tisasi Karaesi, ma hana koru ka raetoɂo ana ɂi koru siko taraha, mara wara otooto Tisasi ɂe iria hana koru wau sii noɂo. 24Ma atai noni ɂe ka roɂo soɂona hii wara otooto Waratoɂo, ɂi naia ɂe ɂoni toɂo ana Waratoɂo, ma Waratoɂo ɂe ɂoni toɂo ana ke raɂo. Ma Waratoɂo ɂe watea Anoa Maea mai hana koru, ma Anoa Maea ɂe taua koru raea Waratoɂo ɂe ɂoni toɂo ana koru noɂo.

Currently Selected:

1 Tione 3: ALU

Highlight

Copy

Compare