fiilibbi 4

aza 4

ṯoraca

1ŋwu ṯaŋwu, lieŋgeri linyi, lamɽanyji beṯen, linaŋnanyji beṯen tɔk eḏizeze, lir ṯinyiŋlana tinyi na taŋgi tinyi tɔk, eṯenji ŋwara lu teter ṯaŋwu, eḏi Kweleny-na, limɽi linyi.

2nyi kwutureca layu lu leni afuḏya ŋwuzi zinṯiki gi, eḏamiḏina eḏi Kweleny-na. 3nyi kwuṯicaŋa lu tɔk, kwumaṯ kwinyi kweṯindi kiɽmiḏina, eḏi meci layu kla, kaka akaḏinyi li ŋɔḏɽor ruɽma ri ŋeḏi injiil, aklimanḏaz ŋali na limeḏgeri liḏaḏu tɔk ki ŋɔḏɽor-na, leḏi yiriny kiṯam-na keḏi yiriny-na yeḏi kla leḏi ŋimiiḏa.

4eti nyeŋlena ŋwamin tatap eḏi Kweleny-na, ŋazi eca kwokwony ŋwu: eti nyeŋlena. 5efriceri lizi tatap eḏeze ŋaŋwuzi liḏi nana jiɽem ŋimɽi ŋi. Kweleny kwumaḏiḏi eḏila. 6etere apirazi rugwori lu kwɔmne gi kwere mac, lakin ki ŋiɽaŋal-na tatap, ṯara ṯi ki yiriny, ṯuṯalu ṯi, eṯandaci Allah kwɔmne gi kwalu tatap kwunaŋnaḏi ŋa, na eṯeca ŋunduŋwu zukran tɔk. 7mindaŋ ma ŋiɽena ŋeḏi Allah, ŋeṯiṯamḏu ŋiɽaŋali la tatap ŋetir zi elŋena, er aŋraci rugwori ralu, ṯireca ṯi ṯalu yey lu tɔk, eḏi Kwruztu-na kweni Yecu.

8lieŋgeri, ŋu ŋimirmiḏiḏi. ŋa tatap ŋir rerem, ŋa tatap ŋeṯi zi nii-na, ŋa tatap ŋofḏana, ŋa tatap ŋuzuɽuna cucuɽic, ŋa tatap ŋami beṯen, ŋa tatap ŋeḏi yiriny yizaw, mer nani ŋere ŋiṯemiḏizi-la, mer nani ŋere ŋeŋgi ortani, ŋinderṯa ŋu tatap eḏi ŋi ortutinina. 9eṯir zi erri kaka ŋimezelŋe nani nyi gwu, na ŋa ŋimezafi tɔk, na ŋa ŋineŋnaŋazi tɔk, na ŋa ŋizacarnyji tɔk, mindaŋ a Allah weḏi ŋiɽena ŋwunanni ŋaŋa li.

buuluz muŋw eca lizi leḏi kaniiza zukran

10nyi kwunyeŋlena beṯen eḏi Kweleny-na ŋiɽaŋal ŋi ŋeḏi ṯikitica-yey ṯalu duŋgwinyi ŋgi kwokwony, ŋaŋa leṯi nyi kekitice yey lakin keni na ere kaṯazi ṯay mac eḏi zi ruwezelu. 11nyi kwiti kwunaŋna eḏeḏi orŋweya mac kwɔmne gi kwunaŋna nyi. kaka ilŋiiḏini nyi gwu eḏamina ki ŋiɽaŋal-na tatap. 12nyi kweṯelŋe eḏamina menyorɔ kwuway ya menyorɔ kwurṯu; emba, nyi kweṯelŋe ŋejmeṯi eḏi ŋi amina ki ŋiɽaŋal-na tatap, menyi be, ya menyi yaŋwu ye; menyeḏi kwɔmne kwuru, ya menyi nani cakicagi kwiira tɔmne tere. 13nyi kweṯeḏi ŋuma eḏizerri ŋete nyiḏak Kwruztu ŋgi, ŋgwa kweṯinyi lirli nana.

14lakin keni a limenyi gi ari ŋimɽya beṯen kaka oɽmaṯir gwu ki ṯurfa-na ṯinyi kwokwony. 15ŋilŋiicaŋazi, ŋaŋa leḏi fiilibbiŋw, kinaŋw ki nyamin la nyir kwɔnkwɔn andizanyji gwu ŋir injiil, menyi gwu ṯaya makḏunyaŋw lu, ner orɔ dak leḏi kaniiza kalu loɽmaṯi nyi li ṯimeciḏiza ṯi. 16emba, nyamin nyimorɔ-na nyiɽen nyimernyi uzica kwuruuza eḏi meci nyuŋwu, nani nyi keni ṯazaluniiki. 17nyi kwiti kwicace haḏiya mac, lakin nenyi icaci ŋaŋwuzi eḏafa ujra nani gwu Allah kaka uzicarnyi gwu haḏiya walu. 18nyi kwumafi haḏiya walu wuṯiŋadi ŋa abafruṯuz ŋgi, wir kaka wəŋ weḏi haḏiya wami nyel nyel; wunderṯa wir kaka kwɔmne kwirlinelu ter kweṯəmi Allah-na eḏafi. nyi ma eḏi kwɔmne kwugwubaḏu, na kwuṯemḏelu tɔk, nenyeni kwumɔ be. 19Allah winyi wɔŋazi inḏeḏa kwɔmne kwere nyiḏak kwiiracaŋazi, ŋiɽaŋal ŋi ŋeḏi ŋurṯu ŋuŋun ŋinit ŋi eḏi Kwruztu-na kweni Yecu. 20eḏi ŋiniṯ nani dɔk dɔk nani gwu Allah weri, wir Papa kweri tɔk. emba.

21agnari lizi tatap lere lere leni lirlinelu ter eḏi Kwruztu-na kweni Yecu. lieŋgeri linani nyi li kunuŋ lagnaŋazi tɔk. 22lizi lirlinelu ter tatap kunuŋ lagnaŋazi, na kla leḏi duənu kweḏi gezar lamina tɔk kakaḏa kwere eḏi ṯiŋaci ŋaŋwuzi ṯagna ṯeŋen.

23eḏi ṯimeca ṯeḏi ŋimɽi ŋeḏi Kweleny kweni Yecu Kwruztu nani ki rigɽim-na ralu lere lere.

Currently Selected:

fiilibbi 4: KIB1967

Highlight

Copy