ອົບພະຍົບ 25
25
ເຄື່ອງຖວາຍສຳລັບຫໍເຕັນ
(ອພຍ 35:4-9)
1ພຣະເຈົ້າຢາເວໄດ້ເວົ້າກັບໂມເຊວ່າ, 2“ຈົ່ງບອກຊາວອິດສະຣາເອນໃຫ້ນຳເອົາເຄື່ອງຖວາຍມາໃຫ້ເຮົາ. ເຈົ້າຈົ່ງຮັບເອົາເຄື່ອງຖວາຍມາໃຫ້ເຮົາຈາກທຸກຄົນທີ່ມີຄວາມສະໝັກໃຈທີ່ຈະຖວາຍ.
3“ຕໍ່ໄປນີ້ແມ່ນຂອງຖວາຍທີ່ເຈົ້າຈະຮັບຈາກພວກເຂົາມີຄື:
“ຄຳ, ເງິນ, ແລະ ທອງສຳລິດ;
4ດ້າຍສີຟ້າ, ສີມ່ວງ, ສີແດງ ແລະ ຜ້າຝ້າຍລິນິນເນື້ອລະອຽດ,
ຂົນແບ້,
5ໜັງແກະເຖິກຍ້ອມສີແດງ, ປະເພດໜັງສັດທີ່ທົນທານ,
ໄມ້ກະຖິນ,
6ນ້ຳມັນໝາກກອກສຳລັບແສງສະຫວ່າງ,
ເຄື່ອງເທດສຳລັບປຸງນ້ຳມັນເຈີມ ແລະ ສຳລັບເຄື່ອງຫອມ,
7ແລະ ຫີນໂກເມນກັບອັນຍະມະນີອື່ນໆສຳລັບຕົບແຕ່ງເສື້ອເອໂຟດ ແລະ ແຜ່ນປົກເອິກ.
8“ແລ້ວໃຫ້ຊາວອິດສະຣາເອນສ້າງສະຖານນະມັດສະການສຳລັບເຮົາ ແລະ ເຮົາຈະຢູ່ທ່າມກາງພວກເຂົາ. 9ຈົ່ງສ້າງຫໍເຕັນນີ້ ແລະ ເຮັດອຸປະກອນຕົບແຕ່ງທັງໝົດຕາມຮູບແບບທີ່ເຮົາຈະສະແດງແກ່ພວກເຈົ້າ”.
ຫີບພັນທະສັນຍາ
(ອພຍ 37:1-9)
10“ຈົ່ງໃຫ້ພວກເຂົາເຮັດຫີບດ້ວຍໄມ້ກະຖິນຍາວສອງສອກ, ກວ້າງໜຶ່ງສອກເຄິ່ງ ແລະ ສູງໜຶ່ງສອກເຄິ່ງ.#25:10 ຫລື ຍາວປະມານ 110 ເຊັນ, ກວ້າງ ແລະ ສູງຄືກັນປະມານ 68 ເຊັນ; ຄ້າຍຄືກັນກັບຂໍ້ 17 11ຫຸ້ມດ້ວຍຄຳບໍລິສຸດ ທັງຂ້າງໃນ ແລະ ຂ້າງນອກ, ໃຊ້ຄຳເຮັດຂອບອ້ອມຫີບນັ້ນ. 12ຈົ່ງຫລໍ່ບ້ວງຄຳສີ່ບ້ວງສຳລັບຫີບ ແລ້ວມັດຕິດບ້ວງເຫລົ່ານັ້ນໄວ້ທີ່ຕີນທັງສີ່ຂອງຫີບ ໂດຍສອງບ້ວງຢູ່ຂ້າງໜຶ່ງ ແລະ ສອງບ້ວງຢູ່ອີກຂ້າງໜຶ່ງ. 13ຫລັງຈາກນັ້ນ ຈົ່ງເຮັດຄານຫາມສອງອັນດ້ວຍໄມ້ກະຖິນແລ້ວໂອບດ້ວຍຄຳ. 14ຈົ່ງສອດຄານຫາມໃສ່ບ້ວງທັງສອງຂ້າງຂອງຫີບໄວ້ສຳລັບຫາມ. 15ໃຫ້ສອດຄານຫາມຄາໄວ້ໃນບ້ວງຂອງຫີບນີ້ຕະຫລອດ; ຢ່າໄດ້ຍ້າຍຄານຫາມອອກໄປ. 16ແລ້ວເອົາແຜ່ນຫີນທີ່ຈາລຶກພັນທະສັນຍາ ເຊິ່ງເຮົາຈະໃຫ້ແກ່ພວກເຈົ້າໃສ່ໄວ້ໃນຫີບນັ້ນ.
17“ຈົ່ງເຮັດຝາຫີບພັນທະສັນຍາດ້ວຍຄຳບໍລິສຸດຍາວສອງສອກເຄິ່ງ, ກວ້າງໜຶ່ງສອກເຄິ່ງ.#25:17 ຄື ຍາວປະມານ 110 ເຊັນ, ກວ້າງປະມານ 68 ເຊັນ 18ແລະ ຈົ່ງຕີຄຳເປັນຮູບເຄຣຸບສອງໂຕທີ່ປາຍທັງສອງສົ້ນຂອງຝາຫີບ. 19ຈົ່ງເຮັດເຄຣຸບໂຕທີໜຶ່ງໃສ່ສົ້ນໜຶ່ງ ແລະ ເຮັດເຄຣຸບໂຕທີສອງໃສ່ອີກສົ້ນໜຶ່ງ; ຈົ່ງເຮັດເຄຣຸບທັງສອງນີ້ຕິດໃສ່ປາຍທັງສອງສົ້ນໃຫ້ເຂົ້າເປັນເນື້ອດຽວກັນກັບຝາຫີບ. 20ເຄຣຸບຈະຕ້ອງກາງປີກຂອງຕົນຂຶ້ນເໜືອຝາຫີບ. ເຄຣຸບຕ້ອງປິ່ນໜ້າເຂົ້າຫາກັນ, ເບິ່ງໄປທີ່ຝາຫີບ. 21ຈົ່ງວາງຝາຫີບນີ້ໃສ່ເທິງຫີບ ແລະ ເອົາແຜ່ນຫີນທີ່ຈາລຶກພັນທະສັນຍາທີ່ເຮົາຈະມອບໃຫ້ພວກເຈົ້າໃສ່ໄວ້ໃນຫີບນັ້ນ. 22ຢູ່ທີ່ນັ້ນ, ຢູ່ເໜືອຝາຫີບລະຫວ່າງເຄຣຸບທັງສອງທີ່ຢູ່ເໜືອຫີບພັນທະສັນຍານັ້ນ, ເຮົາຈະມາພົບເຈົ້າ ແລະ ຈະມອບຄຳສັ່ງທັງໝົດຂອງເຮົາສຳລັບຊາວອິດສະຣາເອນໃຫ້ແກ່ເຈົ້າ.
ໂຕະ
(ອພຍ 37:10-16)
23“ຈົ່ງເຮັດໂຕະໜ່ວຍໜຶ່ງດ້ວຍໄມ້ກະຖິນຍາວສອງສອກ, ກວ້າງໜຶ່ງສອກ ແລະ ສູງໜຶ່ງສອກເຄິ່ງ.#25:23 ຫລື ຍາວປະມານ 90 ເຊັນ ກວ້າງປະມານ 45 ເຊັນ ແລະ ສູງປະມານ 68 ເຊັນ 24ຈົ່ງໂອບໂຕະນັ້ນດ້ວຍຄຳບໍລິສຸດ ແລະ ຈົ່ງໃຊ້ຄຳເຮັດຮູບແກະສະຫລັກແນບອ້ອມໂຕະ. 25ຈົ່ງເຮັດຂອບອ້ອມໂຕະນັ້ນກວ້າງໜຶ່ງຝາມື#25:25 ຄື ກວ້າງປະມານ 7,5 ເຊັນ ແລະ ເອົາຄຳທີ່ແກະສະຫລັກມາໂອບຂອບໂຕະເໝືອນກັນ. 26ຈົ່ງເຮັດບ້ວງຄຳສີ່ບ້ວງສຳລັບໂຕະ ແລະ ຕິດບ້ວງຄຳນັ້ນໃສ່ມູມທັງສີ່ທີ່ຂາໂຕະທັງສີ່ຢູ່. 27ບ້ວງເຫລົ່ານັ້ນຈະຕ້ອງຢູ່ໃກ້ກັບຂອບໂຕະສຳລັບສອດຄານຫາມໃສ່ເພື່ອໃຊ້ຫາມໂຕະ. 28ຈົ່ງເຮັດຄານຫາມດ້ວຍໄມ້ກະຖິນ, ໂອບຄານຫາມດ້ວຍຄຳ ແລ້ວຫາມໂຕະດ້ວຍຄານຫາມເຫລົ່ານັ້ນ. 29ແລະ ຈົ່ງເຮັດຈານ ແລະ ຖ້ວຍດ້ວຍຄຳບໍລິສຸດ, ເຊັ່ນດຽວກັນກັບໂຖ ແລະ ຊາມສຳລັບໃຊ້ຖອກເຄື່ອງດື່ມບູຊາ. 30ຈົ່ງວາງເຂົ້າຈີ່ແຫ່ງການມາປາກົດໃສ່ເທິງໂຕະນີ້ຕໍ່ໜ້າເຮົາຕະຫລອດເວລາ.
ຫລັກຕະກຽງ
(ອພຍ 37:17-24)
31“ຈົ່ງເຮັດຫລັກຕະກຽງອັນໜຶ່ງດ້ວຍຄຳບໍລິສຸດ. ຕີຖານ ແລະ ກ້ານຂອງຫລັກຕະກຽງ, ແລ້ວເຮັດຖ້ວຍຮອງຕະກຽງລັກສະນະຄືກັບດອກໄມ້, ທັງດອກຈູມ ແລະ ດອກບານໃຫ້ເປັນເນື້ອດຽວກັນກັບຖານ ແລະ ກ້ານຂອງຫລັກຕະກຽງ. 32ມີຫົກງ່າທີ່ແຍກອອກຂ້າງຂອງຫລັກຕະກຽງ ມີສາມງ່າຢູ່ຂ້າງໜຶ່ງ ແລະ ອີກສາມງ່າຢູ່ຂ້າງໜຶ່ງ. 33ສາມຖ້ວຍນັ້ນມີຮູບຮ່າງຄືກັບດອກອັນມອນທີ່ມີທັງດອກຈູມ ແລະ ດອກບານໃນງ່າດຽວກັນ, ແຕ່ລະງ່າມີສາມດອກ ແລະ ເໝືອນກັນໝົດທັງຫົກງ່າທີ່ຍື່ນອອກມາຈາກຫລັກຕະກຽງ. 34ແລະ ຢູ່ເທິງຫລັກຕະກຽງໃຫ້ເຮັດຮູບຈອກສີ່ອັນທີ່ມີຮູບລັກສະນະຄືກັບດອກອັນມອນ ມີທັງດອກຈູມ ແລະ ດອກບານ. 35ດອກຈູມດອກທີໜຶ່ງຢູ່ລຸ່ມຂອງງ່າຄູ່ທຳອິດທີ່ຍື່ນອອກມາຈາກຫລັກຕະກຽງ, ດອກຈູມດອກທີສອງຢູ່ລຸ່ມຂອງງ່າຄູ່ທີສອງ ແລະ ດອກຈູມດອກທີສາມຢູ່ລຸ່ມຂອງງ່າຄູ່ທີສາມ ທັງຫົກງ່ານີ້ແມ່ນຢູ່ໃນຫລັກຕະກຽງ. 36ດອກຈູມ ແລະ ງ່າທັງໝົດເປັນເນື້ອດຽວກັນກັບຫລັກຕະກຽງ ເຊິ່ງຕີດ້ວຍຄຳບໍລິສຸດ.
37“ແລ້ວຈົ່ງເຮັດຕະກຽງເຈັດໜ່ວຍ ແລະ ວາງໄວ້ເທິງຫລັກຕະກຽງເພື່ອວ່າຕະກຽງເຫລົ່ານັ້ນຈະສະຫວ່າງຢູ່ຕໍ່ໜ້າຫລັກຕະກຽງ. 38ຈົ່ງເຮັດມີດຕັດຕັດໄສ້ຕະກຽງ ແລະ ຖາດຮອງດ້ວຍຄຳບໍລິສຸດ. 39ຈົ່ງເຮັດຫລັກຕະກຽງ ແລະ ເຄື່ອງປະກອບທັງໝົດດ້ວຍຄຳບໍລິສຸດ 1 ຕາລັນຕົນ.#25:39 ຫລື ປະມານ 34 ກິໂລກຣາມ 40ເຈົ້າຈົ່ງເຮັດສິ່ງເຫລົ່ານີ້ຕາມແບບທີ່ເຮົາໄດ້ສະແດງແກ່ເຈົ້າຢູ່ເທິງພູເຂົານັ້ນ.
Currently Selected:
ອົບພະຍົບ 25: LCV
Highlight
Copy
Compare
Share
Want to have your highlights saved across all your devices? Sign up or sign in
Holy Bible, Lao Contemporary Version™| © 2023, 2025 by Biblica, Inc.|
Used with permission. All rights reserved worldwide.© 2023, 2025 by Biblica, Inc.
