Yiib 7

1Ka Zugsɔb yɛl Moses ye, “M na kɛ ka fʋ nwɛnɛ Wina'am nɛ tis Na'ab Faaro ka fʋ bier Aaron aan fʋ nɔdi'es. 2Yɛlim mam yɛlif si'el la wʋsa tis Aaron, ka o yɛl Na'ab Faaro ka o kɛ ka Israel dim la yi. 3Amaa m na kɛ ka Faaro sʋnf digilim, dinɛ na kɛ ka m tʋmmi m tʋʋmnyalima nɛ n zanbina la Egipt teŋin. 4Amaa Faaro kʋ wʋm tisi fɔ, dinɛ na kɛ ka m mɔri m nimbanɛ an Israel dim la yi Egipt teŋin ka ba dɔl taaba dɔɔg-dɔɔg. Ka Egipt teŋ dim na nyɛ namisʋg bɛdegʋ. 5M ya'a tiɛn m nu'ukanɛ mɔr paŋ tita'ar la yisi m nidib Israel ba sʋʋgin, ala ka Egipt dim la na baŋ ye manɛ an Zugsɔb la.” 6Ka Moses nɛ Aaron tʋm wʋʋ Zugsɔb la yɛli ba si'em la. 7Ban da pian' tis Faaro saŋa si'a la, Moses da anɛ yʋma pisnii ka Aaron an yʋma pisnii nɛ atan'.

Dansaar kilim waaf la yɛla

8Ka Zugsɔb yɛl Moses nɛ Aaron ye, 9“Na'ab Faaro ya'a ti yɛli ya ye ya maalim nyalima, fʋn yɛlim Aaron ye o nɔkim o dansaari la lɔbi bas teŋ ka li na kilim waaf Faaro tuon.” 10Ka Moses nɛ Aaron kpɛn' Na'ab Faaro san'an maal wʋʋ Zugsɔb la yɛli ba si'em la. Ka Aaron nɔk dansaar la lɔbi bas teŋ ka li kilim waaf, Faaro nɛ o kpɛɛmnam la tuon. 11Amaa Na'ab Faaro mɛ da buol o Egipt tiim dim banɛ tʋm nyalima la ka ba mɛ tʋm ala. 12Ka ba wʋsa mɛ nɔki ba dansaya lɔbi bas teŋ ka li kilim wiigi. Amaa ka Aaron dansaar la vɔli ba dansaya la wʋsa. 13Ka Na'ab Faaro sʋnf maligim digilim hali ka o pʋ wʋm tisi baa, wʋʋ Zugsɔb la pʋn yɛl si'em la.

Ku'om kilim ziim la yɛla

14Ka Zugsɔb yɛl Moses ye, “Na'ab Faaro sʋnf digilimnɛ ka o zan'as ye nidib la kʋ yii. 15Saa kem Faaro san'an bɛkɛung ka o saa na yii keŋ mu'arin la. Zi'enim Nail mu'ar la gbɛog ka mɔr dansaar kanɛ kilim waaf la fʋ nu'ugin ka o ya'a paae na 16fʋn yɛl o ye, ‘Zugsɔb onɛ an Hibiru dim Wina'am la, tʋm mam fʋ san'an na ye m yɛlif ye asɛɛ fʋ kɛ ka m nidib la yii keŋ pʋ'ʋs mam mɔɔgin. Amaa hali nɛ anwa, fʋ pʋ wʋmma.’ 17#Yib 16:4 Alazug, Zugsɔb la yɛl ye ‘M na tʋm nwa' ka fʋ baŋ ye manɛ an Zugsɔb la. Gɔsima, m ye m san'amnɛ ku'okanɛ bɛ mu'a nɛ kɔlisin la wʋsa ka li kilim ziim. 18Ka zimi banɛ bɛ mu'a nɛ kɔlisin la wʋsa na kpi, ka ku'om la na pun'oe, ka Egipt dim kʋ nyaŋi nu ku'om laa.’”

19Zugsɔb da lɛn yɛl Moses ye, “Yɛlim Aaron ka o nɔk dansaar la ʋki tiesi kpa' Egipt ku'obanɛ an mu'a nɛ kɔlis nɛ bɛɛnna nɛ kɔldaad nɛ bulis wʋsa. Ka ziim na di'e Egipt teŋ wʋsa, la'an nɛ ba nwama nɛ dʋgid.” 20Ka Moses nɛ Aaron maal wʋʋ Zugsɔb la yɛli ba si'em la, ka nɔk dansaar la ʋki tiesi kpa' ku'om la Faaro nɛ o kpɛɛmnam la nini ni, ka ku'om la kilim ziim. 21Ka zimi banɛ bɛ ku'omin la wʋsa kpi, ka ku'om la wʋsa pun'oe, ka Egipt dim pʋ lɛn nuud ku'om kɔlis la nii. Bɔzugɔ Egipt teŋgbauŋ la wʋsa da anɛ ziim.

22Ka Egipt dim banɛ tʋm nyalima la mɛ maal ala, ka Na'ab Faaro sʋnf maligim digilim ka o pʋ wʋm tisi ba, wʋʋ Zugsɔb la pʋn yɛl si'em la. 23Ka Faaro fɛndigi lɛbi kuli o yin ka li pʋ daami o sʋnf baa bi'elaa.

24Ka Egipt dim la tu bulisi kpi'el nɛ kɔlis la paam ku'om nuud, bɔzugɔ ba kʋ nyaŋi nu kɔlis la ku'om.

Lɔmisi daam Egipt dim la yɛla

25Daba ayɔpɔi nya'aŋ Zugsɔb da san'am ku'om la.

Currently Selected:

Yiib 7: kus_gh

Highlight

Copy

Compare